ၵူၼ်းမူႇၸေႊ သွင်ၵေႃႉ ဢၼ်ထုၵ်ႇၵုမ်းတူဝ်ပႂ်ႉတူၺ်းငဝ်းလၢႆးၶူဝ်ႊဝိတ်ႉ-19 ဝႆႉၼၼ်ႉ လႆႈၶေႃႈတွပ်ႇဢွၵ်ႇမႃးဝႃႈ ဢမ်ႇၸပ်းၸိူဝ်ႉမႅင်း ဝႃႈၼႆ။
မိူဝ်ႈၼႆႉ ဝၼ်းတီႈ 3/4/2020 ယၢမ်းၵၢင်ၼႂ် 10 မူင်း ပႃႈၼၢင်းၶိၼ်ႇထေး တင်း ပႃႈၼၢင်းၵျီႇဢူး ၵူၼ်းမူႇၸေႊသွင်ၵေႃႉ ဢၼ်သူင်ႇ ၼမ်ႉမုၵ်ႈ ၼမ်ႉလၢႆး ၵူတ်ႇထတ်းၶူဝ်ႊဝိတ်ႉ-19 ဝႆႉၼၼ်ႉ လႆႈႁူႉၶေႃႈတွပ်ႇဝႃႈ ဢမ်ႇမီးၸိူဝ်ႉမႅင်း။
ပႃႈၼၢင်းၶိၼ်ႇထေးၶဝ်ၼႆႉ မိူဝ်ႈဝၼ်းတီႈ 19/3/2020 ၼၼ်ႉ ၶီႇရူတ်ႉၵႃး “ၶၢႆႇမၼ်းတလေး” လုၵ်ႉတႃႈၵုင်ႈ ထိုင်ဝဵင်းလိူဝ်ႇ၊ ပဵၼ်ရူတ်ႉၵႃးလမ်းလဵဝ်ၵၼ်တင်း ၵူၼ်းမီးၸိူဝ်ႉမႅင်းဝႆးရတ်ႉသ် ၊ ပဵၼ်ၵူၼ်းၸၢႆး ဢႃႇယု 33 ပီ (ဢၼ် လုၵ်ႉမိူင်းဢမေႊရီႊ ၵၼ် ပွၵ်ႈၶိုၼ်း မႃး မိူင်းႁူမ်ႈတုမ်) ။ ၽိူဝ်ႇထိုင်မူႇၸေႊ ၵေႃႈ ပႃႈၶဝ်သွင်ၵေႃႉ ၺႃးႁွင်ႉၵႂႃႇၵုမ်းတူဝ်တီႈႁူင်းယႃ ၸဵမ်မိူဝ်ႈဝၼ်းတီႈ 27/3/2020 ။
လုင်းသႅင်ၶမ်းႁိူင်း ၵူၼ်းမူႇၸေႊ လၢတ်ႈတီႈၽူႈတွႆႇႁွၵ်ႈဝႃႈ “ ၶဝ်သွင်ၵေႃႉလႆႈႁူႉၵႂၢမ်းတွပ်ႇမိူဝ်ႈၼႆႉ ၵၢင်ၼႂ် ယၢမ်း 10 မူင်း ဢမ်ႇပဵၼ်ၶူဝ်ႊဝိတ်ႉ 19 ၼႆလႄႈ ယၢမ်းလဵဝ် ၶဝ်ပွၵ်ႈမိူဝ်းၶိုၼ်းႁိူၼ်းယေးလီငၢမ်း ယဝ်ႉ ။ ၶဝ်သွင်ၵေႃႉၼႆႉ လုၵ်ႉဝဵင်းလိူဝ်ႇမႃးထိုင် မူႇၸေႊ မွၵ်ႈ ဝၼ်းတီႈ 21 ၼႆႉ။ လၢတ်ႈသိုဝ်ႈၵေႃႈ ယူႇတီႈႁိူၼ်း 7 ဝၼ်း။ တီႈႁူင်းယႃ 7 ဝၼ်း ႁူမ်ႈၵၼ် ပဵၼ် 14 ဝၼ်း ” ဝႃႈၼႆ။
ပႃႈၼၢင်းၶိၼ်ႇထေး ဢႃယု 64 ပီ တင်း ပႃႈၼၢင်းၵျီႇဢူး ဢႃယု 62 ပီၼႆႉ ပဵၼ်ပီႈၼွင်ႉၵၼ် ယူႇပွၵ်ႉၸၢၼ်း ၸႄႈဝဵင်း မူႇၸေႊ ၸိုင်ႈတႆးပွတ်းႁွင်ႇ။ မိူဝ်ႈဝၼ်းတီႈ 27/3/2020 ၼၼ်ႉ ဝၢႆးႁွင်ႉပႃႈတင်းသွင် ၵႂႃႇႁူင်းယႃၼၼ်ႉ ယူႇတီႈၽူႈမီး ပုၼ်ႈၽွၼ်း ၾၢႆႇမေႃယႃၶဝ် လူင်းပိုၼ်ႉတီႈ သိတ်းလၢင်ႉယႃႈၶႃႈၸိူဝ်ႉမႅင်း ၸွမ်းႁိမ်းႁွမ်း ႁိူၼ်းၼၼ်ႉသေ ဢိုတ်း ပႃးၵိဝ်ႇသဵၼ်ႈတၢင်းဝႆႉ ဢမ်ႇပၼ်ၽႂ်လတ်းၽၢၼ်ႇၵႂႃႇမႃးဝႆႉၵမ်းၼိုင်ႈ ဝႃႈၼႆ။
ၸၢႆးႁိၼ်လဵၵ်း လၢတ်ႈဝႃႈ “ ဝၢႆးသေ ပႃႈၶဝ်သွင်ၵေႃႉႁွင်ႉၵႂႃႇၵူတ်ႇထတ်း တီႈႁူင်းယႃၼၼ်ႉ မွၵ်ႈ 3 ဝၼ်း ၸဝ်ႈၼႃႈတီႈလႄႈၵူၼ်းဝၢၼ်ႈ Lock Down ဝႆႉတီႈတၢင်းၵိဝ်ႇပွၵ်ႉၼၼ်ႉ ။ ၵူၺ်းၵႃႈမိူဝ်ႈၼႆႉတႄႉ ႁဝ်းၶႃႈ ၶိုၼ်းပိုတ်ႇပၼ်ၵူၼ်းပိုၼ်ႉတီႈလတ်းၽၢၼ်ႇၵႂႃႇမႃးယဝ်ႉၶႃႈ။ ၵူၼ်းမူႇၸေႊႁဝ်း ယႃႇပေမႆႈၸႂ် တူၵ်းၸႂ်ၵၼ်ႁၢဝ်ႈႁႅင်း၊ ပႃႈၶဝ်တင်းသွင်ၼႆႉ ဢမ်ႇမီးၸိူဝ်ႉမႅင်း ဢမ်ႇလႆႈပဵၼ်သင်။ ၶႂ်ႈႁႂ်ႈ ၵူၼ်းပိုၼ်ႉတီႈႁဝ်း မေႃပွင်ႇၸႂ်ပၼ်သေ ႁႂ်ႈၶဝ်ႈဢွၵ်ႇၵႂႃႇမႃးႁႃၵၼ်ၶိုၼ်းမိူၼ်ၵဝ်ႇ” ဝႃႈၼႆ။
မိူဝ်ႈၼႆႉ ဝၼ်းတီႈ 3/4/2020 ၵူၼ်းမိူင်းဢၼ်ထုၵ်ႇပႂ်ႉတူၺ်းငဝ်းလၢႆးတၢင်းပဵၼ် တင်းမူတ်း ၼႂ်းမိူင်းတႆး မီး 93 ၵေႃႉ၊ ဢၼ် လႆႈပႂ်ႉတူၺ်း တီႈႁူင်း ယႃသမ်ႉမီး 57 ၵေႃႉ၊ ဢၼ်လူင်းႁူင်းယႃၵႂႃႇယဝ်ႉၼၼ်ႉ 29 ၵေႃႉလႄႈ ထူပ်းႁၼ် ၵူၼ်း ၸပ်းတၢင်း ပဵၼ်ၶူဝ်ႊဝိတ်ႉ 19 သမ်ႉ မီးၼိုင်ႈၵေႃႉ Dr. မဵဝ်းထုၼ်း ၽွင်းလူင်ၾၢႆႇတူင်ႇဝူင်းၵူၼ်း ၸုမ်းလူင်ပွင်ၸိုင်ႈ မိူင်းတႆး လၢတ်ႈတီႈ ၽူႈတွႆႇႁွၵ်ႈဝႆႉၼင်ႇၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ