ၽူႈၵွၼ်းၸႄႈဝဵင်းၼမ်ႉၸၢင် ပိုၼ်ၽၢဝ်ႇၶဵင်ႈၶႅင်လွင်ႈၵူၼ်းမိူင်းၵႂႃႇမႃး တႃႇၵုမ်းၸိူဝ်ႉမႅင်းတၢင်းပဵၼ်။

ၽူႈၵွၼ်းၸႄႈဝဵင်းၼမ်ႉၸၢင် ပိုၼ်ၽၢဝ်ႇ ႁႂ်ႈဢွၼ်ၵၼ်ယူႇ ၼႂ်းႁိူၼ်းယေးၽႂ်မၼ်း ႁၢမ်ႈၵူၼ်းမိူင်းၸူႉတုမ်ၶွၼ်ႈၵၼ်၊ ႁၢမ်ႈၵႂႃႇမႃးၽွင်းၵၢင်ၶမ်ႈၵၢင်ၶိုၼ်း တႃႇၶၢဝ်းတၢင်း ၼိုင်ႈလိူၼ် တႄႇဢဝ် ဝၼ်းတီႈ 1-30/4/2020 ။

ဢူးၺီႇၺီႇဢွင်ႇ ၽူႈၵွၼ်းၸႄႈဝဵင်းၼမ်ႉၸၢင် လၢတ်ႈတီႈၽူႈတွႆႇႁွၵ်ႈဝႃႈ “ ႁဝ်းၶႃႈ ဢွၵ်ႇလိၵ်ႈပိုၼ်ၽၢဝ်ႇ ႁၢမ်ႈၵူၼ်းမိူင်းဢွၵ်ႇႁိူၼ်း ၵႂႃႇမႃး သူႇၸႂ်းႁႃၵၼ်ၼႂ်း ယၢမ်းၵၢင်ၶမ်ႈ 7 မူင်းထိုင် 6 မူင်းၵၢင်ၼႂ်။ ႁၢမ်ႈၵူၼ်းမိူင်းၸူႉတုမ်ၶွၼ်ႈၵၼ်ၼမ် ၼႆၶႃႈဢေႃႈ။ ယဝ်ႉၵေႃႈ ပေႃးပဵၼ်လႆႈႁႂ်ႈဢွၼ်ၵၼ်ယူႇၼႂ်းႁိူၼ်းယေး ၵူၺ်း။ ယႃႇပေဢွၵ်ႇလႄႇလၢဝ်း ၼႆဢေႃႈ။ ဢၼ်ဝႃႈ ၵူၼ်းမိူင်းဢမ်ႇလႆႈၵႂႃႇမႃးတၢင်းလႂ် ဢမ်ႇလႆႈဢွၵ်ႇႁိူၼ်းၼႆတႄႉ ဢမ်ႇၸႂ်ႈၼင်ႇၵဝ်ႇၶႃႈ” ဝႃႈၼႆ။

တၢင်းပဵၼ်ၶူဝ်ႊဝိတ်ႉ 19 လၢမ်းၽႄႈၸွတ်ႇတူဝ်ႈလုမ်ႈၾႃႉႁၢဝ်ႈႁႅင်း ၼႂ်းမိူင်းႁူမ်ႈတုမ်ၵေႃႈ လၢမ်းၽႄႈထိုင်မႃး ပႃးၸဵမ်ၼႂ်းမိူင်းတႆး 1 ၵေႃႉ။ ၵူၼ်းတိတ်းၸပ်း ၵမ်ႈၼမ် ပဵၼ်ၵူၼ်းလုၵ်ႉၼွၵ်ႈမိူင်းမႃး။ ၵွပ်ႈၼႆလႄႈ ၽူႈၵွၼ်းၸႄႈဝဵင်းၼမ်ႉၸၢင် တုၵ်းယွၼ်းဝႃႈ ႁႂ်ႈၵူၼ်းလုၵ်ႉတၢင်ႇတီႈမႃးၼၼ်ႉ ပွင်ႇၶၢဝ်ႇၸူးထိုင်ၵၢင်ႉၵႄႇဝၢၼ်ႈဢိူင်ႇၽႂ်မၼ်း ဝႃႈၼႆ။

ဢူးၺီႇၺီႇဢွင်ႇ သိုပ်ႇလၢတ်ႈဝႃႈ “ ၵူၼ်းၸိူဝ်းလုၵ်ႉတၢင်ႇမိူင်းမႃး ၸိူဝ်းၼၼ်ႉ တေလႆႈပွင်ႇၶၢဝ်ႇၸူးတီႈၽူႈၵွၼ်းပွၵ်ႉ/ ဢိူင်ႇၽႂ်မၼ်း၊ ပွင်ႇၶၢဝ်ႇၸူးႁွင်ႈၵၢၼ် ၾၢႆႇပၢႆးယူႇလီ ၊ လွင်ႈဢွၵ်ႇၼွၵ်ႈႁိူၼ်းၼႆႉ ဢေႇလႆႈၵႃႈႁိုဝ်လီၵႃႈၼၼ်ႉ ၶႃႈဢေႃႈ” ဝႃႈၼႆ။

တေႃႈလဵဝ် တီႈၸႄႈဝဵင်းၼမ်ႉၸၢင် ၵူၼ်းမိူင်းဢၼ်ထုၵ်ႇ ပႂ်ႉတူၺ်းငဝ်းလၢႆးဝႆႉ 14 ဝၼ်း မီးဝႆႉႁူဝ်ၵူၼ်း 380 ၵေႃႉယဝ်ႉ။ ဢၼ်ပႂ်ႉတူၺ်း တီႁူင်းယႃဝႆႉသမ်ႉ မီး 2 ၵေႃႉ ၵူၼ်းၼမ်ႉၸၢင်ၵေႃႉၼိုင်ႈလၢတ်ႈ။

မိူဝ်ႈၼႆႉ ဝၼ်းတီႈ 3/4/2020 ၵူၼ်းမိူင်းဢၼ်ထုၵ်ႇပႂ်ႉတူၺ်းငဝ်းလၢႆးတၢင်းပဵၼ် တင်းမူတ်း ၼႂ်းမိူင်းတႆး မီး 93 ၵေႃႉ၊ ဢၼ် လႆႈပႂ်ႉတူၺ်း တီႈႁူင်း ယႃသမ်ႉမီး 57 ၵေႃႉ၊ ဢၼ်လူင်းႁူင်းယႃၵႂႃႇယဝ်ႉၼၼ်ႉ 29 ၵေႃႉလႄႈ ထူပ်းႁၼ် ၵူၼ်းၸပ်းတၢင်း ပဵၼ်ၶူဝ်ႊဝိတ်ႉ 19 သမ်ႉ မီးၼိုင်ႈၵေႃႉ Dr. မဵဝ်းထုၼ်း ၽွင်းလူင်ၾၢႆႇတူင်ႇဝူင်းၵူၼ်း ၸုမ်းလူင်ပွင်ၸိုင်ႈမိူင်းတႆး လၢတ်ႈတီႈ ၽူႈတွႆႇႁွၵ်ႈဝႆႉၼင်ႇၼႆ။