လူမ်းလူင်ၽတ်ႉပဝ်ႇ ၼႂ်းတူင်ႇဝဵင်းပၢင်လူင် ၸႄႈဝဵင်းလွႆလႅမ် ၸိုင်ႈတႆး ပွတ်းၸၢၼ်း ဝၼ်းမိူဝ်ႈၼႆႉ ၼၼ်ႉ လင်ႁိူၼ်းၵူၼ်း၊ ၸရွပ်ႈသႃလႃး၊ ဝိႁၢရ်ၵၢၼ်ႇၵျွင်း ၸိူဝ်းၼႆႉလင်ၶႃးပိဝ် – သုမ်းၶၼ်ငိုၼ်း ႁူဝ်သႅၼ်။

ဝၼ်းတီႈ 2/4/2020 ယၢမ်းၵၢင်ဝၼ်း 12:10 မူင်း လူမ်းလူင် ၽတ်ႉပဝ်ႇ ၼႂ်းၸႄႈဝဵင်းလွႆလႅမ်၊ တီႈဝၢၼ်ႈၵုင်းၼႃးသၢႆး ဢိူင်ႇၼွင်လႅင် ဝဵင်းပၢင်လူင် ၼၼ်ႉ လင်ၶႃးဝတ်ႉၵေႃႈပိဝ်၊ ၸရွပ်ႈၵေႃႈ ၵွႆသွင်လင်၊ ႁိူၼ်းယေး ၵူၼ်းဝၢၼ်ႈၵေႃႈ ၺႃးပႃးၸွမ်း။ တီႈဝတ်ႉ တင်း ၸရွပ်ႈၵူၺ်း လူႉၵွႆ ဢမ်ႇယွမ်းမွၵ်ႈ 15 သႅၼ်ပျႃး – ၵူၼ်းဝၢၼ်ႈ လၢတ်ႈၼႄၼင်ႇၼႆ။

ၸၢႆးဢွင်ႇၶမ်း ၽူႈၵွၼ်းဢိူင်ႇဝၢၼ်ႈၼွင်လႅင် လၢတ်ႈတီႈၽူႈတွႆႇႁွၵ်ႈဝႃႈ “ ၸႂ်ႈၶႃႈဢေႃႈ။ လူမ်းၼႆႉ မၼ်းၵိုင်ႉၵၢင်ႉၽတ်ႉပဝ်ႇ ႁႅင်းႁႅင်း ၵမ်းလဵဝ်ၶႃႈ။ ၾူၼ်တႄႉ ဢမ်ႇတူၵ်း။ လူမ်းၵူၺ်း ၽတ်ႉမႃး။ တိူဝ်ႉၺႃးတီႈ ဝတ်ႉဝိႁၢရ်ႁဝ်းၶႃႈတႄႉ ၼႃႈ တၢင်းဢွၵ်ႇလႄႈ ၼႃႈတၢင်းႁွင်ႇ ၵွႆၵႂႃႇမူတ်း ဝတ်ႉၼႆႉ မၼ်းပဵၼ်သီႇၾၢႆႇဝႆႉ ၾၢႆႇတၢင်းတူၵ်းလႄႈ ၾၢႆႇတၢင်းၸၢၼ်းတႄႉ ဢမ်ႇၵွႆၼင်ႇၵဝ်ႇ” ဝႃႈၼႆ။

ဝတ်ႉၵုင်းၼႃးသၢႆးၼႆႉ မီးပီႈၼွင်ႉဝၢၼ်ႈၼမ်ႉမေႃႇလူင်၊ ၵုင်းၼႃးသၢႆး၊ ၼႃးသူမ်ႈၶွၼ်၊ ဝၢၼ်ႈၵျွင်း၊ သႅင်ၵၢပ်ႇလႄႈ ၵုင်း ၼမ်ႉသိမ်ႇ မူႇဝၢၼ်ႈၸိူဝ်းၼႆႉ ႁူမ်ႈၵၼ်၊ မူႇဝၢၼ်ႈၸိူဝ်းၼႆႉၵေႃႈ ၺႃးလူမ်းလူင် ၽွင်ႈၼင်ႇၵဝ်ႇ။ ဢၼ်လူႉသုမ်းၼႆႉ ၾၢႆႇၵူၼ်းလူင် ဝၢၼ်ႈဢိူင်ႇၶဝ် တၢင်ႇသၢႆမၢႆ တီႈ ၽူႈမီးၼႃႈတီႈ ပုၼ်ႈၽွၼ်းၶဝ်ဝႆႉ။ ယူဝ်လူင်ပွင်ၸိုင်ႈမိူင်းတႆး မီးငိုၼ်းတႃႇၵမ်ႉၸွႆႈ ပူၵ်းပွင်ဝၢၼ်ႈဢိူင်ႇ ၽူႈမီးပုၼ်ႈ ၽွၼ်းၶဝ်ႈလၢတ်ႈၼႄၼင်ႇၼႆ။