ၵူၼ်းၼုမ်ႇတႆး လူင်းပိုၼ်ႉတီႈ ၼႂ်းၸႄႈဝဵင်းလႃႈသဵဝ်ႈ ပၼ်ပိုၼ်ႉႁူႉ ၵူၼ်းဝၢၼ်ႈၵူၼ်းသူၼ် ႁႂ်ႈမေႃ ဢဝ်တူဝ်လွတ်ႈ ယႃႇႁႂ်ႈလႆႈၸပ်း တၢင်းပဵၼ် ၶူဝ်ႊဝိတ်ႉ 19 ။
ဝၼ်းတီႈ 2/4/2020 တႄႇဢဝ်ယၢမ်းၵၢင်ၼႂ် ထိုင်ၵၢင်ၶမ်ႈ ယူႇတီႈၵူၼ်းၼုမ်ႇတႆး ပႃးတင်းဢူတ်ႇဢူဝ် ၸၢၵ်ႈၶႂၢၵ်ႈသဵင်ႈ ပၼ်ႇၸွမ်းၵိဝ်ႇ ဢိူင်ႇယဝ်ႉဢိူင်ႇ ဝၢၼ်ႈယဝ်ႉဝၢၼ်ႈ ႁွင်ႉပၢဝ်ႇ ပၼ်တၢင်းႁူႉ ၵူၼ်းဝၢၼ်ႈ ၵူၼ်းသူၼ် ႁႂ်ႈၵႆယၢၼ် တၢင်းပဵၼ်ၶူဝ်ႊဝိတ်ႉ 19 ။ ဝၼ်းမိူဝ်ႈၼႆႉၵူၼ်းၼုမ်ႇ ၵႂႃႇတၢင်း ဝၢၼ်ႈ ႁူဝ်ပိုၵ်ႉ၊ ၵွင်းၵေး၊ ဢီႇၼၢႆး၊ သူၼ်ၵွႆ၊ ၶိူဝ်းၼိမ်း လႄႈ ဝၢၼ်ႈၶိူဝ်းၶမ်း သေ မိူဝ်ႈၽုၵ်ႈ ဝၼ်းတီႈ 3/4/2020 တႄႉ တေလူင်းပိုၼ်ႉတီႈ ၵႂႃႇတၢင်းဢိူင်ႇမိူင်းယေႃ ဝႃႈၼႆ။
ၸၢႆးႁၢၼ်ႇ ၽူႈဢွၼ်ႁူဝ် တူင်ႉၼိုင် ၵူၼ်းၼုမ်ႇတႆး လႃႈသဵဝ်ႈ လၢတ်ႈတီႈၽူႈတွႆႇႁွၵ်ႈဝႃႈ -“ ဢၼ်ႁဝ်း ၶႃႈ လူင်းပိုၼ်ႉတီႈ ပၼ်ပိုၼ်ႉႁူႉၼႆႉ ယူႇတီႈႁဝ်းၶႃႈ ၵူၼ်းၼုမ်ႇတႆးလႃႈသဵဝ်ႈ တေ ၶတ်းၸႂ် လူင်းပိုၼ်ႉ တီႈ ႁႂ်ႈပေႃးၸွတ်ႇၸေး ၼႂ်းၸႄႈဝဵင်းလႃႈသဵဝ်ႈႁဝ်းၼႆႉၶႃႈ။ ၵူၺ်းၵႃႈ တေယဝ်ႉဝၼ်းလႂ် ဢၼ် ဝႃႈ ၼၼ်ႉ ႁဝ်းၶႃႈ ပႆႇၸၢင်ႈဝႃႈ” ဝႃႈၼႆ။
မိူဝ်ႈဝႃး ဝၼ်းတီႈ 1/4/2020 ၼၼ်ႉ ၸုမ်းၵူၼ်းၼုမ်ႇတႆး လူင်းပိုၼ်ႉတီႈ ပၼ်ပိုၼ်ႉႁူႉၵႂႃႇ ၵႂႃႇတၢင်း ဝၢၼ်ႈၵုင်းၸူင်၊ မၢၵ်ႇၶီႈၼူ၊ ဝၢၼ်ႈမွၼ်း၊ ၼႃးၽၢတ်ႇ(ၼႃးပဵင်း)၊ ဝၢၼ်ႈၵွင်း/ တႃႈပုင်ႇ၊ ၼႃႈၾႃႉ၊ ၵုၼ်ႁီႈ၊ ၵွင်းၵၢင်၊ ပဵင်းလွင်း၊ ပဵင်းထၢၼ်ႈ၊ ၼွင်မူဝ်၊ ၵွင်းၶၢမ်၊ ပၢင်ႁႆး၊ ၼမ်ႉၽွႆႈ၊ ပၢင်ၼႃး၊ ဝူဝ်းလူင်၊ မၢၼ်ႈၵၢတ်ႇ၊ ၵုင်းသႃႇ၊ ႁူဝ်ၼႃး၊ ပၢင်ႇၸူင်၊ ဝၢၼ်ႈၼႃး၊ ႁူးမူၼ်ႈလႄႈ ဝၢၼ်ႈသူႈ ၸဵမ်ၸိူဝ်းၼႆႉ။
ၵူၼ်းၼုမ်ႇတႆး လႃႈသဵဝ်ႈ ဢွၵ်ႇၽိုၼ်လိၵ်ႈပႃႉၽႃ ပၢႆႉပူဝ်ႊသတိူဝ်ႇ တႅမ်ႈတင်း လိၵ်ႈတႆး၊ လိၵ်ႈမၢၼ်ႈ ပၼ်ပိုၼ်းႁူႉ ၵၢၼ်ႁႄႉၵင်ႈတၢင်းပဵၼ် ၶူဝ်ႊဝိတ်ႉ 19 (တၢင်း ပဵၼ်ဝူႊႁၢၼ်ႉ ႁိုဝ် ၸိူဝ်ႉမႅင်းၶူဝ်ႊရူဝ်ႊၼႃ) ၊ ၽိုၼ်လိၵ်ႈပႃႉၽႃ ၼၼ်ႉၸႅၵ်ႇပၼ် ၵူၼ်းၼႂ်းပိုၼ်ႉတီႈ၊ တိတ်းပၼ်တီႈတေႃႇတႃ ၸွမ်းသဵၼ်ႈ တႃႈသၢႆတၢင်း၊ ၸွမ်းႁိူၼ်းယေး၊ ၸွမ်းႁူဝ်ႉ၊ ၸွမ်းႁၢၼ်ႉၶၢႆၶူဝ်း ၸိူဝ်းၼႆႉ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ