ၵူၼ်း ဢၼ်ပႂ်ႉတူၺ်းငဝ်းလၢႆးတၢင်းပဵၼ် ၶူဝ်ႊဝိတ်ႉ 19 တႃႇၶၢဝ်း 14 ဝၼ်း တီႈၵျွၵ်ႉမႄးၵေႃႉၼိုင်ႈ လၵ်ႉပၢႆႈ။
လူင်ပွင်ၸိုင်ႈမိူင်းတႆး ၊ ၽူႈတႅၼ်းသၽႃးလႄႈ ၸုမ်းၸွႆႈထႅမ် ပရႁိတ တူင်ႉ ၼိုင်တူင်ႇဝူင်းၵူၼ်း ၼႂ်းၸႄႈဝဵင်း ၵျွၵ်ႉမႄး ႁူမ်ႈၵၼ်သေ ပႂ်ႉၵူတ်ႇထတ်းၵူၼ်းၸိူဝ်းလုၵ်ႉ မိူင်းထႆး၊ မိူင်းၶႄႇမႃးသေ ၵုမ်းတူဝ် 14 ဝၼ်း တမ်းဝၢင်းတီႈယူႇပၼ်တီႈ ႁူင်းႁဵၼ်း ၸၼ်ႉသုင် မၢႆ 1 တင်း မၢႆ 3 လႄႈ ဢွင်ႈတီႈလဵၼ်ႈႁႅင်း(မိုးလုံလေလုံ) ၸိူဝ်းၼႆႉ ႁၢၼ်ႉတေႃႇထိုင် ဝၼ်းတီႈ 31/3/2020 မီးၵူၼ်း 169 ၵေႃႉ။
လုင်းၸၢႆးၵူး ၸုမ်းၼမ်ႉၶူင်း ၶႅၵ်ႇလီပၢင်ၸႃႉ ၵျွၵ်ႉမႄး လၢတ်ႈတီႈၽူႈတွႆႇႁွၵ်ႈဝႃႈ “ ပဵၼ်တီႈ ဢွင်ႈတီႈလဵၼ်ႈႁႅင်း ၼၼ်ႉၶႃႈဢေႃႈ။ ဢွင်ႈတီႈၼၼ်ႈ ဝႆႉပၼ် လွတ်ႈလွတ်ႈလႅဝ်းလႅဝ်းၵူၺ်းၶႃႈ ။ ၽူႈၸၢႆးၵေႃႉလၵ်ႉပၢႆႈၼၼ်ႉ ဢမ်ႇၸႂ်ႈ ၵူၼ်းဢၼ်ထၢင်ႇထိူမ်မီးမႅင်း ၶူဝ်ႊဝိတ်ႉ 19 ၶႃႈ။ ပဵၼ်ၵူၼ်းထုၵ်ႇၵုမ်းတူဝ်ပႂ်ႉတူၺ်းငဝ်းလၢႆးဝႆႉ 14 ဝၼ်းၼၼ်ႉၵူၺ်း။ မၼ်းၸၢႆးမီးလွင်ႈၶွင်ႉၶမ် ယၢပ်ႇၽိုတ်ႇသင်ၸိူင်ႉႁိုဝ်တႄႉ ၵေႃႈဢမ်ႇႁူႉ မၼ်းဢွၵ်ႇပၢႆႈၵႂႃႇၼၼ်ႉ။ ” ဝႃႈၼႆ။
ၽူႈၸၢႆးဢၼ်ပၢႆႈဢွၵ်ႇ ဢွင်ႈသဝ်းၵုမ်းတူဝ် 14 ဝၼ်းၼၼ်ႉ ၸိုဝ်ႈႁွင်ႉ ၸၢႆးထုၼ်း ဢႃယု 28 ပီ ပဵၼ် ၵူၼ်း ဝၢၼ်ႈမႂ်ႇ ၸႄႈဝဵင်းမိူင်းၵိုင်ၼႆ ယူႇတီႈသိုဝ်ၶၢဝ်ႇၵၢမ်ႇပေႃးၸတၢႆး ဢွၵ်ႇဝႆႉ။
လုင်းၸၢႆးၵူး သိုပ်ႇလၢတ်ႈဝႃႈ “ ႁႂ်ႈပေႃးၸွမ်းၶႆႈႁႃတူဝ်မၼ်းၸၢႆးတႄႉ ဢမ်ႇႁဵတ်းၶႃႈ။ တေႃႈလဵဝ် ၼႂ်းဝဵင်းၵျွၵ်ႉမႄး ႁဝ်းၶႃႈၼႆႉ ဝၢၼ်ႈၽႂ် ဝၢၼ်ႈမၼ်း၊ ဢိူင်ႇၽႂ် ဢိူင်ႇမၼ်း ပိူၼ်ႈပေႃးဢွၼ်ၵၼ်ၵုမ်းထိင်းၵၼ်ဝႆႉမူတ်းယဝ်ႉ။ သင်ဝႃႈ မီးၵူၼ်း တၢင်ႇတီႈၶႅၵ်ႇမႃးၸိုင် ပေႃးၶဝ်ႈမႃးၼႆ ယႃႇပေႁႂ်ႈလႆႈႁပ်ႉ ႁဝ်းၶႃႈလႆႈတူၵ်းလူင်းၵၼ်ဝႆႉၸိူင်ႉၼၼ်သေ ယွၼ်းတၢင်းၸွႆႈ ထႅမ်ၵၼ်ဝႆႉမူတ်းယဝ်ႈၶႃႈဢေႃႈ” ဝႃႈၼႆ။
မိူဝ်ႈၼႆႉ ဝၼ်းတီႈ 1/4/2020 တေႃႇထိုင်ဝၢႆးဝၼ်း 4 မူင်းပၢႆ ၵူၼ်းဢၼ်လုၵ်ႉတီႈၵႆ ပွၵ်ႈမႃး ထိုင်ၵျွၵ်ႉမႄး ၼႆႉ မီး 32 ၵေႃႉယဝ်ႉ။ ၸိူဝ်းၶဝ် ပွၵ်ႈမိူဝ်းတီႈဝၢၼ်ႈသေ တီႈဝၢၼ်ႈဢမ်ႇႁပ်ႉၶဝ်လႄႈ ၶိုၼ်းလႆႈ မႃးယူႇဝႆႉတီႈဢွင်ႈတီႈတႃႇပႂ်ႉတူၺ်း ငဝ်းလၢႆး ၶၢဝ်းတၢင်း 14 ဝၼ်း ၼႂ်းၸႄႈဝဵင်းၵျွၵ်ႉမႄး ဝႃႈၼႆ။
သဵၼ်ႈမၢႆ ၵူၼ်းမိူင်းဢၼ်မႃးလိုဝ်ႈသဝ်းပႂ်ႉတူၺ်းငဝ်းလၢႆးတၢင်းပဵၼ် တီႈၵျွၵ်ႉမႄးၼႆႉ တေႃႇထိုင် ဝၼ်းတီႈ 31/3/2020 တင်းမူတ်းမီးၵႂႃႇ 169 ၵေႃႉ။ ၼႂ်းၼၼ်ႉ ဢၼ်ယူႇဝႆႉတီႈႁူင်းႁဵၼ်းၸၼ်ႉသုင်မၢႆ 3 မီး 99 ၵေႃႉ၊ မၢႆ 1 မီး 60 ၵေႃႉလႄႈ ဢွင်ႈတီႈ လဵၼ်ႈႁႅင်း မီး 10 ၵေႃႉ ဝႃႈၼႆ။
ၼႂ်းၸႄႈဝဵင်းၵျွၵ်ႉမႄးၼႆႉ ဢၼ်ထၢင်ႇထိူမ်သေ ပႂ်ႉတူၺ်းမိူၼ်ၵူၼ်းၸပ်းတၢင်းၶူဝ်ႊဝိတ်ႉ 19 တင်းမူတ်းမီးဝႆႉ ယူႇ 3 ၵေႃႉ။ ဢၼ်တိတ်းၸပ်းတၢင်းပဵၼ်ဝႆႉ မီးၼိုင်ႈၵေႃႉ ။
