ၽၵ်းတူလႅၼ်လိၼ်ၶႄႇ တီႈၼမ်ႉၶမ်းၵေႃႈပိၵ်ႉဝႆႉယဝ်ႉ ယွၼ်ႉၶူဝ်ႊဝိတ်ႉ – 19

ၽၵ်းတူၶဝ်ႈဢွၵ်ႇ ၸွမ်းလႅၼ်လိၼ် တႆး – ၶႄႇ ၼႂ်းၸႄႈဝဵင်းၼမ်ႉၶမ်း ပိၵ်ႉမူတ်း ယွၼ်ႉတၢင်း ပဵၼ် ၶူဝ်ႊဝိတ်ႉ 19 လၢမ်းၽႄႈႁၢဝ်ႈႁႅင်း ႁဵတ်းႁႂ်ႈၵူၼ်းၵႃႉၵူၼ်းၶၢႆ ၸွမ်းလႅၼ်လိၼ် ႁူပ်ႉထူပ်းလွင်ႈယၢပ်ႇ ။

ၽၵ်းတူ မၢၼ်ႈႁွင်း – ၼွင်တဝ်းတၢင်းၸႄႈဝဵင်းၼမ်ႉၶမ်း ၽၵ်းတူ ပဵၼ်တၢင်းၵၢၼ်လႄႈသင် ၽၵ်းတူဢမ်ႇပဵၼ်တၢင်းၵၢၼ်လႄႈသင် ပႃးၸဵမ်တႃႈႁိူဝ်းၸိူဝ်းၼႆႉ တင်ႈဢဝ်မိူဝ်ႈၼႆႉ ဝၼ်းတီႈ 1/4/2020  ဢိုတ်း ပိၵ်ႉမူတ်းဢမ်ႇပၼ်ၵူၼ်းၶဝ်ႈဢွၵ်ႇၵႂႃႇမႃး ယဝ်ႉဝႃႈၼႆ။

ၸၢႆးမၢဝ်း ၵူၼ်းၼမ်ႉၶမ်း လၢတ်ႈတီႈၽူႈတွႆႇႁွၵ်ႈဝႃႈ “ ၸဝ်ႈၼႃႈတီႈတင်းသွင်ၾင်ႇ ၸီႉသင်ႇႁႂ်ႈဢိုတ်းၽၵ်းတူမိူင်းသေ တီႈၼမ်ႉၶမ်းႁဝ်းၶႃႈ မၢၼ်ႈႁွင်း- ၼွင်တဝ်းၼႆႉတႄႉ လႆႈပိၵ်ႉမိူၼ်ပိူၼ်ႈယဝ်ႉ။ ၵူၼ်းတေႃႉၵုၼ်ႇတေႃႉၶူဝ်း ၵႃးလူင် ၸိူဝ်းၼႆႉ ၶမ်ဝႆႉတၢင်းသွင်ၾၢႆႇတင်းၼမ်ၶႃႈယဝ်ႉ။ လိူဝ်ၼၼ်ႉ ၸွမ်းတႃႈႁိူဝ်း ၵူႈတီႈတီႈၵေႃႈ ဢိုတ်းမူတ်း မိူၼ်ၵၼ်ၶႃႈ ယဝ်ႉ” ဝႃႈၼႆ။

ဢိင်ၼိူဝ်ၸဝ်ႈၼႃႈတီႈ တၢင်းသွင်ၾင်ႇၸီႉသင်ႇႁႂ်ႈဢိုတ်းသေ ၽၵ်းတူ ဢၼ်ၵူၼ်းမိူင်းၶဝ်ႈဢွၵ်ႇၵႂႃႇမႃး ဢၼ်ဢမ်ႇၸႂ်ႈ တၢင်း ၵၢၼ် ၸိူဝ်းၼၼ်ႉၵေႃႈ  ဢိုတ်းမူတ်းယဝ်ႉ ပႃးၸဵမ်တႃႈႁိူဝ်း။

ၸၢႆးႁိၼ်လဵၵ်း ၵူၼ်းမူႇၸေႊ လၢတ်ႈတီႈၽူႈတွႆႇႁွၵ်ႈဝႃႈ “ တႃႈႁိူဝ်းၸွမ်းသၢပ်ႇၼမ်ႉမၢဝ်းတင်းမူတ်းၼၼ်ႉ ႁႂ်ႈၵိုတ်းယၢင်ႉ မူတ်းမူတ်းၶႃႈယဝ်ႉ။ မိူၼ်ၼင်ႇ တူဝ်ႇယွတ်ႈ၊ ၽူၺ်းႁူင်း၊ ႁူဝ်သွင်၊ ပၢင်ႇၶမ်း၊ တိုင်းလူင်၊ ၼွင်မူဝ်ႇ၊ ၼွင်ယၢင်း ၸိူဝ်းၼႆႉ” ဝႃႈ ၼႆ။

ယွၼ်ႉတၢင်းပဵၼ်ၶူဝ်ႊဝိတ်ႉ 19 ဢၼ်လၢမ်းၽႄႈႁၢဝ်ႈႁႅင်းၼႆႉသေ  ၸွမ်းလႅၼ်လိၼ် တႆး – ၶႄႇ  တုမ်ႉတိူဝ်ႉၵၢၼ်ပၢႆးမၢၵ်ႈမီးတင်းၼမ် ႁဵတ်းႁႂ်ႈၵူၼ်းမိူင်း ၼႂ်းပိုၼ်ႉတီႈ ႁူပ်ႉထူပ်းလွင်ႈယၢပ်ႇၽိုတ်ႇ။

ၸၢႆးဢၢႆႈ ၵူၼ်းၵႃႉၶၢႆ ပွတ်းလႅၼ်လိၼ်တႆး – ၶႄႇ လၢတ်ႈတီႈၽူႈတွႆႇႁွၵ်ႈဝႃႈ “ ယွၼ်ႉတၢင်းပဵၼ်ၼႆႉသေ ၵၢၼ်ပၢႆးမၢၵ်ႈမီး ၸွမ်း လႅၼ်လိၼ်ၼႆႉ တုမ်ႉတိူဝ်ႉ တႄႉတႄႉၶႃႈယဝ်ႉ။ တေလႆႈဝႃႈ တုမ်ႉတိူဝ်ႉတင်းမူတ်းၶႃႈယဝ်ႉ။ လိူဝ်ၼၼ်ႉ မိူဝ်ႈၼႆႉၵေႃႈ သမ်ႉမႃးဢိုတ်းၽၵ်းတူမိူင်း ထႅင်ႈ ။ ၵၢတ်ႇၵၢင်ၶမ်ႈၵေႃႈဢမ်ႇလႆႈၶၢႆ ။ ၵၢတ်ႇႁႃႈဝၼ်းၼိုင်ႈပွၵ်ႈၵေႃႈ ဢမ်ႇလႆႈၶၢႆ ။ ယွၼ်ႉဝႃႈ ၵၢတ်ႇၸိူဝ်းၼႆႉ တေတေႃႉဢဝ် ၶူဝ်းတၢင်းၾင်ႇမိူင်းၶႄႇသေ မႃးၶၢႆ။ တေႃႈၼင်ႇ ၵၢတ်ႇၼႂ်းမူႇၸေႊ ဢၼ်ပိုတ်ႇယူႇၵူႈဝၼ်းၼႆႉ ၵူၼ်းယွမ်းလူင်း ဢေႇႁႅင်းလိူဝ်ၵူႈပွၵ်ႈ တၢင်းၼမ်ၶႃႈယဝ်ႉ ” ဝႃႈၼႆ။

ယဝ်ႉၵေႃႈ မိူၼ်ၼင်ႇ ၵူၼ်းႁဵတ်းၵိၼ်ၵၢၼ် ၸွမ်းလၢႆးဝၼ်း ၸိူဝ်းၼႆႉၵေႃႈ ထူပ်းလွင်ႈယၢပ်ႇၽိုတ်ႇ  တင်းၼမ် ၸၢႆးႁိၼ်လဵၵ်း ၵူၼ်းမူႇၸေႊ လၢတ်ႈၼႄၼင်ႇၼႆ။

ၽၵ်းတူလႅၼ်လိၼ်တီႈမူႇၸေႊၵေႃႈ တင်ႈဢဝ်ဝၼ်းတီႈ 1/4/2020 ဝၼ်းမိူဝ်ႈၼႆႉၵႂႃႇ ၵႃႈပဵၼ်ႁူးၽၵ်းတူမိူင်း ပိၵ်ႉပႅတ်ႈမူတ်း။ ပိုတ်ႇဝႆႉပၼ်တႃႇရူတ်ႉၵႃးၵုၼ်ႇၶဝ်ႈဢွၵ်ႇတီႈၽၵ်းတူၵျိၼ်ႊသၢၼ်ႊၵျေႃႉ ၵူၺ်း- ဝႃႈၼႆ။