ၾႆးသႅင်လႅတ်ႇ (Solar Plate) သျွတ်ႉ မႆႈဝတ်ႉဝိႁၢရ်ၽၵ်းႁီႉ ဝဵင်းသီႇပေႃႉ တင်းလင် ၶူဝ်းၶွင်ၼႂ်းဝတ်ႉဝႃး ဢမ်ႇတၼ်းလႆႈသင် ၽူႈၵွၼ်းဢိူင်ႇ ၼွင်ၵေႃႈလၢတ်ႈ။
ဝၼ်းတီႈ 31/3/2020 ယၢမ်းဝၢႆးဝၼ်း မွၵ်ႈ 2:40 မူင်း ၾႆးသႅင်လႅတ်ႇသျွတ်ႉသေ မႆႈဝတ်ႉဝိႁၢရ် ၽၵ်းႁီႉ ဢိူင်ႇၵုင်း သေႃႉ ၸႄႈဝဵင်းသီႇပေႃႉ ၸိုင်ႈတႆးပွတ်းႁွင်ႇ။ ၾႆးမႆႈဝတ်ႉဝိႁၢရ်တၢင်းလင် ၶူဝ်းၶွင်ၼႂ်းဝတ်ႉ ဢမ်ႇတၼ်းလႆႈ လွင်ႈၵူၼ်း မၢတ်ႇၸဵပ်း လူႉတၢႆ ဢမ်ႇမီး ဝႃႈၼႆ။
ၸၢႆးဢွင်ႇတဵင်း ၽူႈၵွၼ်းဢိူင်ႇၼွင်ၵေႃႈ လၢတ်ႈတီႈၽူႈတွႆႇႁွၵ်ႈဝႃႈ “ ပဵၼ်ၾႆးသႅင်လႅတ်ႇ(သူဝ်ႇလႃႇ ပျုး) ထႅမ်ႁႅင်းပႅတ်ႇထရီႇ သေလႄႈ သျွတ်ႉမႆႈၶႃႈဢေႃႈ။ တီႈၵျွင်းၽၵ်းႁီႉႁဝ်းၶႃႈၼၼ်ႉ မီးၸဝ်ႈသြႃႇႁဝ်း ပႃးလဵဝ်ၵူၺ်း ယူႇဝႆႉ။ မိူဝ်ႈၽွင်းၾႆးသျွတ်ႉမႆႈၼၼ်ႉ ၸဝ်ႈသြႃႇႁဝ်းသမ်ႉ ၵႂႃႇလွတ်ႈႁေႃးပထၢၼ်းတီႈၵုင်းသေႃႉ ၶႃႈ” ဝႃႈၼႆ။
ဝတ်ႉဝိႁၢရ်ၽၵ်းႁီႉ ဢိူင်ႇၵုင်းသေႃႉၼႆႉ ပဵၼ်ဝတ်ႉ မႆႉပႅၼ်ႈ ဢႃယုၵဝ်ႇၵႄႇလင်ၼိုင်ႈ။ ၵွပ်ႈၼႆ ၾႆးလၢမ်းမႆႈဝႆး- ဝႃႈၼႆ။
ပဵဝ်ၾႆးသမ်ႉ တူၵ်းသႂ်ႇထႅင်ႈ ႁိူၼ်းဢွၼ်ႇ 2 လင်လႄႈ သိုင်ႇ 2 လင် ဢၼ်မီး ႁိမ်းၸမ်ဝတ်ႉဝိႁၢရ် ၼၼ်ႉလႄႈ လၢမ်းမႆႈပႃးထႅင်ႈ ဝႃႈၼႆ။
ဢိင်ၼိူင်လွင်ႈၾႆးမႆႈၼႆႉသေ လွင်ႈလူႉသုမ်းတင်းမူတ်းမႅၼ်ႈၵႃႈႁိုဝ် ဢၼ်ဝႃႈၼၼ်ႉတႄႉ ပႆႇလႆႈႁူႉႁူဝ်ယွႆႈမၼ်း။ မိူဝ်ႈၽွင်း ၾႆးမႆႈၼၼ်ႉ ယူႇတီႈၵူၼ်းဝၢၼ်ႈ၊ ၵႃးၶႄၾႆး မိူၼ်ၼင်ႇ တၢင်းဢိူင်ႇၼွင်ၵေႃႈ၊ ၸုမ်းပၢင်ၼိဝ်ႉလႄႈ သီႇပေႃႉ ၸဵမ်ၸိူဝ်းၼႆႉ မႃးၸွႆႈႁူတ်း ဝႃႈၼႆ။
“တႄႇဢဝ်ယၢမ်းၼႆႉၵႂႃႇ လွင်ႈၾႆးဢၼ်ဝႃႈၼၼ်ႉ ယႃႇပေဝႆႉမဝ်မၢင် ။ၾႆးၼႆႉ မႆႈတီႈလႂ်ၵေႃႈ သုမ်းလၢႆလၢႆယဝ်ႉ မၼ်းဢမ်ႇဢဝ်ၶိုၼ်းလႆႈသင် ။ ရူတ်ႉၵႃး ဢၼ်ၶႄၾႆးႁဝ်းၶႃႈသမ်ႉ မီးၵႆ။ မႆႈဢၼ်လႂ်ၵေႃႈႁႂ်ႈမၼ်း မႃး ၶိုတ်း ႁူတ်းၸွမ်းလႆႈၼၼ်ႉ မၼ်းဢမ်ႇမီးသေပွၵ်ႈ။ ယွၼ်ႉၼၼ် ႁႂ်ႈၵူၼ်းဝၢၼ်ႈႁဝ်းၶႃႈ ၵူႈၵေႃႉ ၾၢင်ႉသတိ လွင်ႈၾႆး ၵၼ်ၽွင်ႈ” ၸၢႆးဢွင်ႇတဵင်း ၽူႈၵွၼ်းဢိူင်ႇၼွင်ၵေႃႈ တိုၵ်းသူၼ်းလၢတ်ႈၼႄၼင်ႇၼႆ။
ဝၼ်းတီႈ 30/3/2020 ယၢမ်းၵၢင်ၶမ်ႈမွၵ်ႈ 9 မူင်းၼၼ်ႉ ၾႆးမႆႈ ႁိူၼ်းၸၢႆးမွင်ႇၺူဝ်ႇ မၢၼ်ႈဢွႆႈ ဢိူင်ႇဝၢၼ်ႈၵုၼ်လူင် ၸႄႈ ဝဵင်းၼမ်ႉၶမ်း ၸႄႈတွၼ်ႈမူႇၸေႊ ၸိုင်ႈတႆးပွတ်းႁွင်ႇ ။ ပဵၼ်ယွၼ်ႉၾႆးၾႃႉသျွတ်ႉ ဝႃႈၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ