ၽၵ်းတူမိူင်းတႆး-ၶႄႇ တႄႇပိၵ်ႉမိူဝ်ႈၼႆႉ ၸဝ်ႈမၢၵ်ႇမႆႉယၢပ်ႇၽိုတ်ႇလိူဝ်ႁႅင်း

ၽၵ်းတူမိူင်းၶဝ်ႈဢွၵ်ႈ ပဵၼ်တၢင်းၵၢၼ် လႅၼ်လိၼ်တႆး – ၶႄႇ တီႈမူႇၸေႊၼၼ်ႉ လႆႈသင်ႇဢိုတ်းဝႆႉ ၸူဝ်ႈၶၢဝ်းယဝ်ႉ ယွၼ်ႉတၢင်းပဵၼ်ၶူဝ်ႊဝိတ်ႉ – 19 လၢမ်းၽႄႈႁၢဝ်ႈႁႅင်း ဝႃႈၼႆ။

မိူဝ်ႈၼႆႉ ဝၼ်းတီႈ 1/4/2020 ယူႇတီႈၸဝ်ႈၼႃႈတီႈတၢင်းသွင်ၾင်ႇမိူင်း မိူင်းၶႄႇ တင်း မိူင်းတႆး ႁၢမ်ႈၵူၼ်းမိူင်းၶဝ်ႈဢွၵ်ႇၵႂႃႇ မႃး တင်းသွင်ၾၢႆႇ တီႈၽၵ်းတူလူင်၊ ၽူႈတူၸၢင်ႉၽိူၵ်ႇလႄႈ ၽၵ်းတူမၢၼ်ႈဝဵင်း ၼႂ်းၸႄႈဝဵင်းမူႇၸေႊ ၸိုင်ႈတႆးပွတ်းႁွင်ႇ။ ၽၵ်းတူၸိူဝ်းၼႆႉ သင်ႇဢိုတ်းဝႆႉ ၸူဝ်ႈၶၢဝ်း ဝႃႈၼႆ။

ၸၢႆးႁိၼ်လဵၵ်း ၽူႈတူင်ႉၼိုင်ၼႂ်းတူင်ႇဝူင်းတႆး မူႇၸေႊ လၢတ်ႈတီႈၽူႈတွႆႇႁွၵ်ႈဝႃႈ “ တႄႇဢဝ် မိူဝ်ႈၼႆႉၵႂႃႇ ၸဝ်ႈၼႃႈတီႈ တၢင်းသွင်မိူင်း သင်ႇပိၵ်ႉၽၵ်းတူမိူင်းယဝ်ႉၶႃႈ။ ဢမ်ႇပၼ်ၵူၼ်းၶဝ်ႈဢွၵ်ႇၵႂႃးမႃး တင်း 3 ၽၵ်းတူၼႆႉယဝ်ႉ။ လွင်ႈတေပိုတ်ႇ ၶိုၼ်းၼၼ်ႉတႄႉ ဢိင်ၼိူဝ်ငဝ်းလၢႆး တၢင်းပဵၼ်ၶူဝ်ႊဝိတ်ႉ – 19 ၼၼ်ႉၵူၺ်း” ဝႃႈၼႆ။

ၵဵဝ်ႇလူၺ်ႈ ၵၢၼ်ဢိုတ်းၽၵ်းတူၶဝ်ႈမိူင်းၼႆႉ ၸိူဝ်းၵူၼ်းမိူင်း သွင်ၾၢၵ်ႇမိူင်း ဢၼ်ၶမ်ဝႆႉၸိူဝ်းၼၼ်ႉတႄႉ ပၼ်ၶဝ်ႈပွၵ်ႈ ၶိုၼ်းမိူင်းၽႂ်မၼ်းၶိုၼ်းယူႇ ဝႃႈၼႆ။

လုင်းသႅင်ၶမ်းႁိူင်း ၵူၼ်းမူႇၸေႊ လၢတ်ႈတီႈၽူႈတွႆႇႁွၵ်ႈဝႃႈ “ ၽၵ်းတူမိူင်းတႄႉ တႄႇပိၵ်ႉမိူဝ်ႈၼႆႉယဝ်ႉ ၵူၼ်းမိူင်းဢၼ်ၶမ် ဝႆႉသေပွၵ်ႈၶိုၼ်းမႃးၼၼ်ႉပၼ်ပွၵ်ႈၶဝ်ႈၶိုၼ်းမႃးယူႇ မိူၼ်ၼင်ႇ ၵူၼ်းမိူင်းမၢၼ်ႈဢၼ်ၶမ်ဝႆႉတၢင်းမိူင်းၶႄႇၼၼ်ႉ ပၼ်ပွၵ်ႈ ၶဝ်ႈမႃးၶိုၼ်းတၢင်းတႆးႁဝ်းၼႆႉၶိုၼ်းယူႇ။ ၵူၼ်းမိူင်းၶႄႇ ဢၼ်မႃးၶမ်ဝႆႉတၢင်းမူႇၸေႊႁဝ်းၼႆႉၵေႃႈ ပၼ်ၶဝ်ႈၵႂႃႇၶိုၼ်းတၢင်း မိူင်းၶႄႇ၊ ၵူၺ်းၵႃႈ ၵူၼ်းမိူင်းတႆးၶႂ်ႈၶဝ်ႈၵႂႃႇမိူင်းၶႄႇ၊ ၵူၼ်းမိူင်းၶႄႇၶဝ်ႈမႃးမိူင်းတႆးထႅင်ႈမႂ်ႇမႂ်ႇ ၸိူဝ်းၼႆႉတႄႉ ဢမ်ႇလႆႈယဝ်ႉ” ဝႃႈၼႆ။

လိူဝ်သေ ၽၵ်းတူမိူင်း 3 တီႈ ဢၼ်လႆႈဢိုတ်းၵႂႃႇယဝ်ႉၼၼ်ႉ ၽၵ်းတူ တီႈဢိူင်ႇ 19 မၢၼ်ႈတင်း ၽၵ်းတူ ပၢင်ႇသၢႆး – ဝၼ်း တဵင်ႈ ၸိူဝ်းၼၼ်ႉၵေႃႈ ဢိုတ်းမိူၼ်ၵၼ်မူတ်း။ ၵူၺ်းၵႃႈ ၽၵ်းတူ ၵျိၼ်ႊသၢၼ်းၵျေႃႉ တႄႇ ဢမ်ႇဢိုတ်း ဝႃႈၼႆ။

ၸၢႆးၶိၼ်ႇမွင်ႇ ၵႅမ်ႁူဝ်ပဝ်ႈ ပၢင်ၵၢတ်ႇမၢၵ်ႇမႆႉ 105 လၵ်း မူႇၸေႊ လၢတ်ႈတီႈၽူႈတွႆႇႁွၵ်ႈဝႃႈ “ ၽၵ်းတူ တီႈ ၵျိၼ်ႊသၢၼ်းၵျေႃႉ တႄႉ ပိုတ်ႇယူႇ။ ၵူၺ်းၵႃႈ ပိုတ်ႇပၼ်ၵႃးတၢင်ႇၵုၼ်ႇၶဝ်ႈဢွၵ်ႇၵူၺ်း ဢမ်ႇပၼ်ၵူၼ်းၶဝ်ႈၵႂႃႇမႃးၶႃႈ။ ၵႃးတၢင်ႇ ၵုၼ်ႇ ၵေႃႈ ၶဝ်တေပၼ်ၶဝ်ႈၵႂႃႇ ၵူၼ်းႁေႃႈၵႃးၵေႃႉၼိုင်ႈလႄႈ ၵူၼ်းၸွမ်းၵႃးၵေႃႉၼိုင်ႈၵူၺ်း” ဝႃႈၼႆ။

သိုပ်ႇလၢတ်ႈဝႃႈ “ ၸူဝ်ႈၵႃႈတၢင်းမိူင်းၶႄႇ ဢမ်ႇပၼ်ၵူၼ်းမိူင်းၶႄႇ ဢွၵ်ႇမႃးသိုဝ်ႉမၢၵ်ႇမႆႉယဝ်ႉၼႆႉ ယူႇတီႈတၢင်းႁဝ်းၶႃႈသေ လႆႈဢဝ်မၢၵ်ႇမႆႉၶဝ်ႈၵႂႃႇၶၢႆမိူင်းၶႄႇၼၼ်ႉ မၼ်းသုၵ်ႉသၵ်ႉယုင်ႈယၢင်ႈယၢပ်ႇၽိုတ်ႇၼႃႇၶႃႈ။ ယွၼ်ႉပိူဝ်ႈမၼ်းဢမ်ႇၶဝ်ႈတီႈ ၶဝ်ႈ တၢင်း ဢမ်ႇၶဝ်ႈပိူင် မၼ်းၼၼ်ႉၶႃႈယဝ်ႉ” ဝႃႈၼႆ။

ဢိင်ၼိူဝ်လွင်ႈဢိုတ်းၽၵ်းတူ မိူဝ်ႈၼႆႉသေ ႁႅင်းၵၢၼ်မိူင်းႁူမ်ႈတုမ် ဢၼ်ထုၵ်ႇပလိၵ်ႈၶႄႇတီႉၺွပ်းဝႆႉၼၼ်ႉ ယူႇတီႈ ပလိၵ်ႈၶႄႇ သူင်ႇတူဝ်မွပ်ႈပၼ်တၢင်းပလိၵ်ႈမူႇၸေႊ မိူဝ်ႈၼႆႉ တင်းမူတ်း 49 ၵေႃႉ။

ၸၢႆးႁိၼ်လဵၵ်း လၢတ်ႈၼႄဝႃႈ “ ၵူၼ်းမိူင်းႁူမ်ႈတုမ် 49 ၵေႃႉၼၼ်ႉၵေႃႈ ၸဝ်ႈၼႃႈတီႈၶႄႇ တီႉၺွပ်းသႂ်ႇၶွၵ်ႈသေ သူင်ႇပွၵ်ႈမႃး။ လိူဝ်ၼၼ်ႉ ပီႈၼွင်ႉတႆး ၵူၼ်းမိူင်းယေႃ ၵႂႃႇႁဵတ်းၵၢၼ်တၢင်းမိူင်းၶႄႇသေ ဢမ်ႇလႆႈငိုၼ်းလိူၼ်တဵမ် ။ 3 ပုၼ်ႈလႆႈ 1 ပုၼ်ႈၵူၺ်း တင်းမူတ်းမီး 8 ၵေႃႉ။ ယွၼ်ႉၶဝ် ၵႂႃႇႁဵတ်းၵၢၼ် ပူၼ်ႉဝၼ်းမၵ်းတတ်းဝႆႉၼၼ်ႉသေ ပလိၵ်ႈမၢၼ်ႈ တီႈၽၵ်းတူ ပၼ်တၢမ်ႇၶဝ် လႆႈပၼ်ငိုၼ်းၶႄႇယူႇ ၼိုင်ႈၵေႃႉ 47 ယႂၼ် ပၼ်ႁႃၸိူဝ်းၼႆႉၵေႃႈမီး” ဝႃႈၼႆ။

ၽၵ်းတူၶၢမ်ႈလႅၼ်လိၼ်တီႈမူႇၸေႊၼႆႉ ၸဵမ်မိူဝ်ႈမိူင်းၶႄႇ တႄႇပဵၼ်တၢင်းပဵၼ်ဝူႊႁၢၼ်ႉ ဢမ်ႇၼၼ် ၶူဝ်ႊရူဝ်ႊၼႃႊ ဢမ်ႇၼၼ် ၶူဝ်ႊဝိတ်ႉ -19 မႃး လူင်ပွင်ၸိုင်ႈၶႄႇ ဢမ်ႇသင်ႇပိၵ်ႉတႄႉတႄႉသေၵမ်းသေတႃႉ ဢမ်ႇပၼ်ၵူၼ်းၵႂႃႇမႃးလီလီ ႁဵတ်းႁႂ်ႈၵူၼ်းမိူင်းပိုၼ်ႉတီႈသွင်ၾင်ႇႁႃၵိၼ်လဵင်ႉတွင်ႉယၢပ်ႇ။ ၽိူဝ်ႇမိူင်းႁူမ်ႈတုမ်မီးၵူၼ်းတိတ်းၸပ်းၸိူဝ်ႉမႅင်းၼမ်မႃးၵေႃႈ သင်ႇပိၵ်ႉၽၵ်းတူမိူင်းၵမ်းလဵဝ်။

ၽၵ်းတူမိူင်း လႅၼ်လိၼ်တႆး-ထႆးတႄႉ သင်ႇပိၵ်ႉၸဵမ်မိူဝ်ႈဝၼ်းတီႈ 23/3/2020 ပုၼ်ႉယဝ်ႉ ။ တေႃႇထိုင်ယၢမ်းလဵဝ် ၵူၼ်းမိူင်းတႆးၶႂ်ႈၶဝ်ႈသိုဝ်ႉၶူဝ်းမိူင်းထႆးၵေႃႈဢမ်ႇလႆႈ။ ၵူၼ်းမိူင်းထႆး ဢၼ်ၶမ်ဝႆႉၾင်ႇတႃႈၶီႈလဵၵ်း ၵေႃႈ ဢမ်ႇပၼ်ၶဝ်ႈၶိုၼ်းမိူင်းထႆးယဝ်ႉ။