ၸဝ်ႈၼႃႈတီႈၶႄႇ တေပိၵ်ႉဢိုတ်းၽၵ်းတူမိူင်း တီႈမူႇၸေႊ လႅၼ်လိၼ်တႆး – ၶႄႇ တင်ႈဢဝ်မိူဝ်ႈၽုၵ်ႈၵႂႃႇ ယွၼ်ႉပိူဝ်ႈၵူၼ်းမိူင်းႁူမ်ႈတုမ် တိတ်းၸပ်းၸိူဝ်ႉမႅင်း ၶူဝ်ႊဝိတ်ႉ-19 ၼမ်မႃးၵူႈမိုဝ်ႉၵူႈဝၼ်း ။
တႄႇဢဝ် ဝၼ်းတီႈ 1/4/2020 ၵႂႃႇ တီႈၽၵ်းတူၶဝ်ႈဢွၵ်ႇမိူင်း လႅၼ်လိၼ်တႆး – ၶႄႇ တီႈၸႄႈဝဵင်းမူႇၸေႊ ၸိုင်းတႆးပွတ်း ႁွင်ႇ မိူၼ်ၼင်ႇ ၽၵ်းတူဝ်ၸၢင်ႉၽိူၵ်ႇ၊ ၽၵ်းတူလူင်၊ ၽၵ်းတူမၢၼ်ႈဝဵင်း၊ ၽူႈတူ ပၢင်ႇသၢႆး – ဝၼ်းတဵင်ႈလႄႈ ၽၵ်းတူ တီႈ ဢိူင်ႇ 19 မၢၼ်ႈ ၸဵမ်ၸိူဝ်းၼႆႉ တေတႄႇဢိုတ်းၵႂႃႇယဝ်ႉ။ ယွၼ်ႉတၢင်းပဵၼ်ၶူဝ်ႊဝိတ်ႉ 19 လၢမ်းၽႄႈႁၢဝ်ႈႁႅင်း ဝႃႈၼႆ။
လုင်းသႅင်ၶမ်းႁိူင်း ၽူႈတူင်ႉၼိုင်ၼႂ်းတူင်ႇဝူင်းမူႇၸေႊ လၢတ်ႈတီႈၽူႈတွႆႇႁွၵ်ႈဝႃႈ “ ၸႂ်ႈၶႃႈဢေႃႈ၊ တႄႇမိူဝ်ႈ ၽုၵ်ႈၵႂႃႇတႄႉ ၽၵ်းတူမိူင်း တၢင်းသွင်ၾင်ႇ တႄႇပိၵ်ႉၵႂႃႇယဝ်ႉ။ ၸွမ်းလႅၼ်လိၼ်တႆး-ၶႄႇ။ မိူဝ်ႈၼႆႉ တီႈၽၵ်းတူလူင် တင်း ၽၵ်းတူင်မၢၼ်ႈဝဵင်းတႄႉ လႆႈဢိုတ်းၵႂႃႇ မွၵ်ႈ 8 မူင်းၵၢင်ၶမ်ႈၼႆႉ။ တီႈၽၵ်းၸၢင်ႉၽိူၵ်ႇတႄႉ တေဢိုတ်း 10 မူင်းၶိုင်ႈၵၢင် ၶိုၼ်းၼႆႉ” ဝႃႈၼႆ။
ၵူၼ်းတေၶၢမ်ႈၶဝ်ႈၵႂႃႇႁဵတ်းၵၢၼ်ၼႂ်းမိူင်းၶႄႇတႄႉဢမ်ႇပၼ်ၶၢမ်ႈယဝ်ႉဝႃႈၼႆသေတႃႉ ၵူၼ်းမိူင်းႁူမ်ႈတုမ်ဢၼ်လုၵ်ႉမိူင်းၶႄႇသေ တေပွၵ်ႈမႃးႁိူၼ်းၶိုၼ်းတႄႉလႆႈယူႇဝႃႈၼႆ။ လိူဝ်ၼၼ်ႉ ၵႃးတၢင်ႇၶူဝ်းၵုၼ်ႇ ၵေႃႈတေပၼ်တေႃႉသူင်ႇၶဝ်ႈဢွၵ်ႇတီႈ ၽၵ်းတူ မၢၼ်ႈဝဵင်းလႄႈ ၽၵ်းတူ ၵျိၼ်ႊသၢၼ်ႊၵျေႃႉ ဝႃႈၼႆ။
တၢင်းပဵၼ်ၶူဝ်ႊဝိတ်ႉ 19 ၼႆႉ လၢမ်းၽႄႈႁၢဝ်ႈႁႅင်းသေ ယူႇတီႈလူင်ပွင်ၸိုင်ႈတင်းသွင်မိူင်း ငူပ်ႉငီႉၵၼ်သေ သင်ႇ ႁႂ်ႈဢိုတ်းၽၵ်းတူ ၶဝ်ႈမိူင်း ဢွၵ်ႇမိူင်းဝႆႉ ၵမ်းၼိုင်ႈ။ လွင်ႈတေပိုတ်ႇၶိုၼ်းမိူဝ်ႈလႂ် ဢၼ်ဝႃႈၼၼ်ႉ ပႆႇမီးၶေႃႈတႅပ်းတတ်းသင် ဝႃႈၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ