TYN သႅၼ်ဝီ ပၼ်ပိုၼ်ႉႁူႉ လွင်ႈလွၵ်းလၢႆးႁႄႉၵင်ႈတၢင်းပဵၼ်ၶူဝ်ႊဝိတ်ႉ 19 ပၼ်ၵူၼ်းမိူင်း/ ၵူၼ်းပိုၼ်ႉတီႈ သႅၼ် ဝီ။
မိူဝ်ႈၼႆႉ ဝၼ်းတီႈ 31/3/2020 ယူႇတီႈ ၵေႃႁူမ်ႈသၢင်ႈၵူၼ်းၼုမ်ႇတႆး TYN သႅၼ်ဝီ လူင်း ၼႂ်းဝၢၼ်ႈ/ဢိူင်ႇ တိတ်းပႃႉ ပူဝ်ႊသတႃႇ ဢၼ်ပၼ်ပိုၼ်ႉႁူႉၵဵဝ်ႇၵပ်းတၢင်းပဵၼ် ၶူဝ်ႊဝိတ်ႉ-19 ၊ ယိုၼ်ႈသူင်ႇထိုင်မိုဝ်း ၵူၼ်းမိူင်းၸိူဝ်းၶဝ်ႈဢွၵ်ႇၵႂႃႇမႃး ၸွမ်းၵၢတ်ႇ၊ ၸွမ်းၵၢင်ဝဵင်း ၊ တိတ်း ၸွမ်းႁၢၼ်ႉၶၢႆၶူဝ်း ၸွမ်းၽၵ်းတူၶဝ်ႈဢွၵ်ႇ ၸွမ်းဝတ်ႉဝႃးလႄႈ ထၢတ်ႈ တီႈၵူၼ်းၵိုၼ်း ၼႂ်းၸႄႈဝဵင်းသႅၼ်ဝီ ၸိုင်ႈတႆး ပွတ်း ႁွင်ႇ ၸဵမ်ၸိူဝ်းၼႆႉ။
ပူဝ်ႊသတႃႇဢၼ်ႁဵတ်းဢွၵ်ႇပိုၼ်ၽႄႈပၼ်ၼၼ်ႉ တႅမ်ႈဝႆႉ လိၵ်ႈ လိၵ်ႈတႆးတင်းလိၵ်ႈမၢၼ်ႈသွင်ၽႃႇသႃႇ ၼင်ႇႁိုဝ် ၵူၼ်း မိူင်းပေႃး တေလႆႈႁပ်ႉႁူႉလွၵ်းလၢႆးႁႄႉၵင်ႈတၢင်းပဵၼ် ဝႃႈၼႆ။
ထႅင်ႈၾၢႆႇၼိုင်ႈၵေႃႈ တွၼ်ႈတႃႇ သင်ၶၸဝ်ႈလႄႈ ၸဝ်ႈသၢင်ႇ ပေႃးတေလႆႈႁပ်ႉႁူႉပႃးၼၼ်ႉ လႆႈၵႂႃႇတိတ်းပႃႉ ပၼ်ၸွမ်းဝတ်ႉဝႃးလႄႈ ၸွမ်းထၢတ်ႈ မိူၼ်ၼင်ႇ ဝတ်ႉၵျွင်းသႅင်၊ ဝတ်ႉၵၢင်ဝဵင်း၊ ဝတ်ႉမုင်ႈသႃႇ၊ ဝတ်ႉဝဵင်းၼၢင်း၊ ဝတ်ႉ မၢၼ်ႈၼွင် ၸိူဝ်းၼႆႉထႅင်ႈ။
ၼွၵ်ႈလိူဝ်ၼၼ်ႉ ယူႇတီႈ TYN သေ လႆႈၵမ်ႉၸွႆႈငိုၼ်း တီႈ Save the Hsenwi ဢွင်ႈသဝ်း တႃႇၵဵပ်းတူဝ်ၵူၼ်း ၸိူဝ်းၵႂႃႇႁဵတ်းၵၢၼ်ၼွၵ်ႈမိူင်း ၼႂ်းမိူင်းသေ ပွၵ်ႈၶိုၼ်းႁိူၼ်း တီႈ သႅၼ်ဝီ ၼၼ်ႉ တႃႇငိုၼ်း 5 မိုၼ်ႇပျႃး၊ ၸႅၵ်ႇပၼ်ပႃး ၼမ်ႉယႃလၢင်ႉမိုဝ်း တႃႇ 20 တဝ်ႈလႄႈ ပူဝ်ႊသတႃႇၾၢႆႇတႆး ၾၢႆႇမၢၼ်ႈထႅင်ႈ ဝႃႈၼႆ။
သင်ဝႃႈ ၵေႃႉလႂ် ၸုမ်းလႂ် ၶႂ်ႈလႆႈပူဝ်ႊသတႃႇ ပၼ်ပိုၼ်ႉႁူႉၵဵဝ်ႇၵပ်းလွင်ႈႁႄႉၵင်ႈတၢင်းပဵၼ်ၶူဝ်ႊဝိတ်ႉ – 19 ဢၼ်ႁဵတ်းဢွၵ်ႇပိုၼ်ၽႄ ဝႆႉလိၵ်ႈသွင်ၽႃႇသႃႇ ၼႆၸိုင် ၵပ်းသိုဝ်ႇယွၼ်းဢဝ်တီႈ မၢႆၾူၼ်း 09789143219 ဝႃႈၼႆ။
တေႃႈလဵဝ် ၼႂ်းမိူင်းႁူမ်ႈတုမ် ၼႆႉၵူၼ်းၸပ်းတၢင်းပဵၼ်ၶူဝ်ႊဝိတ်ႉ 19 တင်းမူတ်းမီး 15 ၵေႃႉ၊ ထၢင်ႇထိူမ်ပႂ်ႉတူၺ်း မီး 517 ၵေႃႉ၊ ပႂ်ႉၵႂၢမ်းတွပ်ႇ 77 ၵေႃႉလႄႈ တၢႆ 1 ၵေႃႉ။
ၼႂ်းၼၼ်ႉ ၼႂ်းမိူင်းတႆးသမ်ႉ ၵူၼ်းၸပ်းတၢင်းပဵၼ်ၶူဝ်ႊဝိတ်ႉ 19 မီး 1 ၵေႃႉ။ ထၢင်ႇထိူမ်ပႂ်ႉတူၺ်း 80 ၵေႃႉ။ ပႂ်ႉၵႂၢမ်းတွပ်ႇ 7 ၵေႃႉလႄႈ လူႉတၢႆ ဢမ်ႇမီး ။
