ၸဝ်ႈသၢင်ႇလႄႈ မႄႈၶၢဝ် ၵူၼ်းၵေးသီး ဢၼ်ၵႂႃႇႁဵၼ်းလိၵ်ႈတီႈမိူင်းမၢၼ်ႈ ပွတ်းတႃႈၵုင်ႈၼၼ်ႉ ပွၵ်ႈႁိူၼ်းၶိုၼ်းမွၵ်ႈ 40 တူၼ် ယၢမ်းလဵဝ် လႆႈၵိုတ်းဝႆႉ ၼွၵ်ႈဝၢၼ်ႈသေ ပႂ်ႉတူၺ်းငဝ်းလၢႆးတၢင်းပဵၼ်ဝႆႉ တႃႇ14 ဝၼ်း ။
တႄႇဢဝ် ဝၼ်းတီႈ 27/3/2020 မႃးသေ ၸဝ်ႈသၢင်ႇ လႄႈ မႄႈၶၢဝ် ၵူၼ်းဢိူင်ႇဝၢၼ်ႈၸၢတ်ႈ ဢၼ်ၵႂႃႇႁဵၼ်းလိၵ်ႈ ပွတ်း တႃႈၵုင်ႈ ပွၵ်ႈၶိုၼ်းႁိူၼ်း ယၢမ်းလဵဝ်ၵူၼ်းဝၢၼ်ႈလႄႈၵၢင်ႉၵႄႇ ၸတ်းပၼ်တီႈယူႇတႃႇၶဝ်ၸဝ်ႈ တီႈၾၢႆႇတူၵ်းဝၢၼ်ႈ ၸၢတ်ႈ ဢိူင်ႇဝၢၼ်ႈၸၢတ်ႈ ၸႄႈဝဵင်းၵေးသီး ၸႄႈတွၼ်ႈလွႆလႅမ် ၸိုင်ႈတႆးပွတ်း ၸၢၼ်း။
ၼၢင်းငူၺ်ႇၵျႃႇ ၵူၼ်းဝၢၼ်ႈၸၢတ်ႈ လၢတ်ႈတီႈၽူႈတွႆႇႁွၵ်ႈဝႃႈ “ ယူႇတီႈပေႃႈမႄႈၸဝ်ႈသၢင်ႇ၊ မႄႈၶၢဝ်ၶဝ် မႆႈၸႂ် ၵူဝ်ၸပ်း တၢင်းပဵၼ် ပိူၼ်ႈၼႆသေ ၶိုၼ်းႁွင်ႉၶဝ်ၸဝ်ႈ ပွၵ်ႈႁိူၼ်းတႃႇငိူင်ႉဝႄႈတၢင်းပဵၼ် ။ ယဝ်ႉၵေႃႈ ဢၼ်ပဵၼ်ၸဝ်ႈၶၢဝ် ဢၼ်ၵုမ်း ၶဝ်ၸဝ်ႈၼၼ်ႉ ဝႃႈတေႃႈလဵဝ်ၼႆႉ ပိူၼ်ႈၵေႃႈဢမ်ႇႁတ်းၵႂႃႇတၢင်းၼွၵ်ႈ တၢင်းလႂ်ၵၼ်သေ ယွၼ်ႉၼၼ်ႉပၼ်သူပွၵ်ႈမိူဝ်း ႁိူၼ်းယေးၽႂ် မၼ်းၵွၼ်ႇ ပေႃးဝႃႈ မၼ်းၵတ်း မၼ်းယဵၼ်ယဝ်ႉ ၸင်ႇတေၶိုၼ်းပွၵ်ႈမႃးၼႆလႄႈ ၸင်ႇဢွၼ်ၵၼ် ပွၵ်ႈမႃး ၶႃႈယဝ်ႉ” ဝႃႈၼႆ။
ၸဝ်ႈသၢင်ႇလႄႈ မႄႈၶၢဝ် ဢၼ်ပွၵ်ႈမႃးၸွမ်းၵၼ် 43 တူၼ် ၼၼ်ႉ တႃႇၸဝ်ႈၼိုင်ႈ လူင်းတီႈၼွင်လႅင်၊ တႃႈ သၢမ် ၸဝ်ႈ လူင်းတီႈမိူင်းၼွင်။ လိူဝ်ၼၼ်ႉ ပဵၼ်ၵူၼ်းၼႂ်းဢိူင်ႇဝၢၼ်ႈၸၢတ်ႈ ၵေးသီးမူတ်း ဝႃႈၼႆ။
ၼၢင်းငူၺ်ႇၵျႃႇ သိုပ်ႇလၢတ်ႈဝႃႈ “ တီႈဢိူင်ႇဝၢၼ်ႈၸၢတ်ႈႁဝ်းၶႃႈတႄႉ မႄႈၶၢဝ် တင်းမူတ်းမီး 14 ၸဝ်ႈ ။ လိူဝ်ၼၼ်ႉ ပဵၼ် ၸဝ်ႈသၢင်ႇ။ မၢင်ၵေႃႉၵေႃႈ လိင်ႇၼုင်ႈသိူဝ်ႈၶူဝ်းၵူၼ်းႁိူၼ်းဝႆႉၵေႃႈမီးယဝ်ႉ။ ၵမ်ႈၼမ် ပဵၼ်ၵူၼ်းဝၢၼ်ႈၸၢတ်ႈၼႆႉၶႃႈ။ တေႃႈလဵဝ် ယူႇတီႈၽူႈမီးပုၼ်ႈၽွၼ်းၶဝ် တိုၵ်ႉဢုပ်ႇၵၼ်ယူႇဝႃႈ ၸဝ်ႈသၢင်ႇတင်းမူတ်းၼႆႉ ႁႂ်ႈၼုင်ႈၶိုၼ်းသၢင်ႇၵၼ်းမူတ်း သေ တေၶၢႆႉ ဢဝ်ၵႂႃႇယူႇဝႆႉၸွမ်းၵၼ်မူတ်းမူတ်း တီႈၸလွပ်ႈ ဢမ်ႇၼၼ် တီႈၵျွင်းႁူင်းႁဵၼ်းဝႆႉ” ဝႃႈၼႆ။
ဢိင်ၼိူဝ်လွင်ႈတၢင်း တၢင်းပဵၼ်ၶူဝ်ႉဝိတ်ႉ 19 ၼႆႉ လၢမ်းၽႄႈၸွတ်ႇတူဝ်ႈလုမ်ႈၾႃႉႁၢဝ်ႈႁႅင်းသေ ၵူၼ်းမိူင်း တၢင်းလုမ်ႈ ၾႃႉ တိတ်းၸပ်း ၼပ်ႉႁူဝ်သႅၼ်ၵေႃႉ၊ လူႉတၢႆ ၼပ်ႉႁူဝ်မိုၼ်ႇ။ ၵွပ်ႈၼႆလႄႈ ၼႂ်းၸႄႈမိူင်းတႆး လၢႆလၢႆၸႄႈဝဵင်းၵေႃႈ ႁူမ်ႈ ၵၼ် ၵႅတ်ႇၶႄႁႄႉၵင်ႈ ၼင်ႇႁိုဝ် တၢင်းပဵၼ်ၼႆႉ ပေႃးတေဢမ်ႇၸပ်းၵူၼ်းဝၢၼ်ႈ၊ ၵူၼ်းမိူင်း ဝႃႈၼႆ။
လိူဝ်ၼၼ်ႉ ၼႂ်းမိူင်းတႆး လၢႆလၢႆတီႈ သင်ဝႃႈ ပဵၼ်ၵူၼ်းပွၵ်ႈမိူင်းထႆး၊ မိူင်းၶႄႇ တေဢမ်ႇလႆႈၶဝ်ႈၼႂ်းမူႇဝၢၼ်ႈၵမ်းလဵဝ် တေ လႆႈယူႇဝႆႉၼွၵ်ႈဝၢၼ်ႈ တႃႇၶၢဝ်းတၢင်း 14 ဝၼ်းသေ ၸင်ႇတေလႆႈၶဝ်ႈမူႇဝၢၼ်ႈ ဝႃႈၼႆ။
ၸၢႆးၸၢမ်ႇမိူင်း ၽူႈတႅၼ်းသၽႃးၸႄႈမိူင်း ၶဵတ်ႇလိူၵ်ႈတင်ႈမၢႆ 1 ၸႄႈဝဵင်းၵေးသီး လၢတ်ႈတီႈၽူႈတွႆႇႁွၵ်ႈဝႃႈ “ ၼႂ်းတူင်ႇ ဝဵင်းၵေးသီးႁဝ်းၶႃႈတႄႉ တမ်းဝႆႉပိူင်မၼ်းၵူႈဢိူင်ႇ ၵူႈဝၢၼ်ႈမူတ်းယဝ်ႉ သင်ဝႃႈ လုၵ်ႉတီႈၼွၵ်ႈမိူင်းမႃးၵေႃႈလီ၊ လုၵ်ႉတီႈ ၼႂ်းမိူင်း မိူၼ်ၼင်ႇ တၢင်းပွတ်းမိူင်းမၢၼ်ႈ တႃႈၵုင်ႈ၊ ဝဵင်းလိူဝ်ႇ၊ ပႃႇၵိူဝ် ၸိူဝ်းၼၼ်ႉၵေႃႈလီ။ ပေႃးပဵၼ် ၵူၼ်းလုၵ်ႉ တၢင်း မိူင်းထႆး၊ မိူင်းၶႄႇမႃးၼၼ်ႉ တေလႆႈၵႂႃႇယူႇဝႆႉဢွင်ႈတီႈ ဢၼ်ႁဝ်းၶႃႈႁဵတ်းဝႆႉ တႃႇၶၢဝ်းတၢင်း 14 ဝၼ်း။ သင်ဝႃႈ ပေႃး ပဵၼ် ၵူၼ်းလုၵ်ႉ တၢင်းမိူင်းမၢၼ်ႈ၊ ၼႂ်းမိူင်း မႃးၸိုင် တေလႆႈယူႇဝႆႉၼႂ်းႁိူၼ်းၽႂ်မၼ်း၊ တေဢမ်ႇလႆႈၵႂႃႇထုၵ်းထုၺ်ၸွမ်းၽႂ် တႃႇၶၢဝ်းတၢင်း 14 ဝၼ်း” ဝႃႈၼႆ။
မိူဝ်ႈၼႆႉ ဝၼ်းတီႈ 31/3/2020 ယၢမ်းၵၢင်ၼႂ် ယူႇတီႈႁွင်ႈၵၢၼ်ပၢႆးယူႇလီလႄႈ ၾၢႆႇလဵၼ်ႈႁႅင်း ပိုၼ်ၽၢဝ်ႇဝႃႈ ၼႂ်းမိူင်းႁူမ်ႈ တုမ် မီးၵူၼ်းလူႉတၢႆ ယွၼ်ႉတၢင်းပဵၼ်ၶူဝ်ႊဝိတ်ႉ 19 ၼႆႉ ၵေႃႉၼိုင်ႈယဝ်ႉ။ ယၢမ်းလဵဝ် ၼႂ်းမိူင်းႁူမ်ႈတုမ် မီးၵူၼ်းၸပ်းတၢင်း ပဵၼ် ၶူဝ်ႊဝိတ်ႉ 19 ယူႇ 14 ၵေႃႉယဝ်ႉ။
ႁွင်ႈၵၢၼ်ပၢႆးယူႇလီ လုမ်ႈၾႃႉ worldometers ဢွၵ်ႇဝႆႉဝႃႈ ယၢမ်းလဵဝ်ၵူၼ်းၸပ်းတၢင်းပဵၼ် ၼႂ်းလုမ်ႈၾႃႉတင်းမူတ်း မီး 789,104 ၵေႃႉ၊ တၢႆ 38,076 ၵေႃႉ။
