ၾႆးမႆႈႁိူၼ်းၵူၼ်းဝၢၼ်ႈ လင်ၼိုင်ႈ ၼႂ်းၸႄႈဝဵင်းၼမ်ႉၶမ်း ၶူဝ်းၶွင်ၼႂ်းႁိူၼ်းယေး ဢမ်ႇတၼ်းလႆႈသင်။
ဝၼ်းတီႈ 30/3/2020 ယၢမ်းၵၢင်ၶမ်ႈမွၵ်ႈ 9 မူင်းၼၼ်ႉ ၾႆးမႆႈ ႁိူၼ်းၸၢႆးမွင်ႇၺူဝ်ႇ မၢၼ်ႈဢွႆႈ ဢိူင်ႇဝၢၼ်ႈၵုၼ်လူင် ၸႄႈ ဝဵင်းၼမ်ႉၶမ်း ၸႄႈတွၼ်ႈမူႇၸေႊ ၸိုင်ႈတႆးပွတ်းႁွင်ႇ ။ ပဵၼ်ယွၼ်ႉၾႆးၾႃႉသျွတ်ႉ ဝႃႈၼႆ။
ၸၢႆးပႃႉဢူး ၵူၼ်းမၢၼ်ႈဢွႆႈ လၢတ်ႈတီႈၽူႈတွႆႇႁွၵ်ႈဝႃႈ “ ၸႂ်ႈၶႃႈဢေႃႈ ၾႆးမႆႈႁိူၼ်းၸၢႆးမွင်ႇၺူဝ်ႇ လင်ၼိုင်ႈလႄႈ သိုပ်ႇမႆႈပႃးသိုင်ႇထႅင်ႈ လင်ၼိုင်ႈ ဢၼ်မီးႁိမ်းႁိူၼ်းမၼ်းၼၼ်ႉ။ ၶူဝ်းႁိူၼ်းယေးတႄႉ ဢမ်ႇတၼ်း လႆႈသင်ၶႃႈ။ တူဝ်ၸၢႆးမွင်ႇၺူဝ်ႇၵူၺ်းၶႃႈ တၼ်းပၢႆႈလွတ်ႈ လွင်ႈၵူၼ်းမၢတ်ႇၸဵပ်း လူႉတၢႆ တႄႉ ဢမ်ႇမီးၶႃႈ” ဝႃႈၼႆ။
ႁိူၼ်းၸၢႆးမွင်ႇၺူဝ်ႇၼႆႉ ပဵၼ်ႁိူၼ်းသွင်ၸၼ်ႉ ၵင်ႈၽႃလၢႆး ၾႆးတႄႇမႆႈတီႈၸၼ်ႉၼိူဝ်လူင်းမႃး ဢွၼ်တၢင်း ။ တူဝ်မၼ်းၸၢႆးသမ်ႉ ၼွၼ်းဝႆႉၸၼ်ႉလၢင်ႈလႄႈတၼ်းပၢႆႈလွတ်ႈ။ ယွၼ်ႉပဵၼ်ႁိူၼ်းၽႃလၢႆးလႄႈ ၾႆးလၢမ်းမႆႈဝႆး ။ ၵူၼ်းဝၢၼ်ႈ ၸုမ်းၾၢႆႇၶႄၾႆးလႄႈ ဢိၵ်ႇထႅင်ႈလၢႆလၢႆၸုမ်း ၼႂ်းၸႄႈဝဵင်းၼမ်ႉၶမ်း တင်းရူတ်ႉၵႃးၶႄၾႆး မွၵ်ႈ 10 လမ်းပၢႆ ႁူမ်ႈၵၼ် ၸွႆႈၶႄၾႆး မွၵ်ႈ 10 မူင်းၶိုင်ႈၵၢင်ၶိုၼ်း ၾႆးၸင်ႇတေမွတ်ႇယဵၼ် လူင်း ဝႃႈၼႆ။
မၢၼ်ႈဢွႆႈၼႆႉ မီးၼႂ်းဢိူင်ႇဝၢၼ်ႈၵုၼ်လူင် ယၢၼ်ၵႆဝဵင်းၼမ်ႉၶမ်း မွၵ်ႈ 1 လၵ်းပၢႆ ဝႃႈၼႆ။
မိူဝ်ႈဝၼ်းတီႈ 29/3/2020 ယၢမ်းႁူဝ်ၶမ်ႈမွၵ်ႈ 5 မူင်းပၢႆၼၼ်ႉ ၾႆးမႆႈႁိူၼ်းၵူၼ်းဝၢၼ်ႈပွၵ်ႉ 2 ဝဵင်းပၢင်လူင် 2 လင် ၼၼ်ႉ ၵေႃႈ ၶူဝ်းၶွင်ႁိူၼ်းယေး ဢမ်ႇတၼ်းလႆႈသင် မႆႈပႃးၵႂႃႇၸွမ်းၾႆးမူတ်း လွင်ႈၵူၼ်းမၢတ်ႇၸဵပ်း လူႉတၢႆတႄႉ ဢမ်ႇမီး ဝႃႈၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ