ၶူဝ်ႊရူဝ်ႊၼႃ ဝၢႆႊရႅတ်ႉ COVID 19 ၽႄႈၸပ်းၵၼ် တင်းလုမ်ႈၾႃႉလႄႈ တႃႇၸိူဝ်ႉမႅင်းတေဢမ်ႇၽႄႈၸပ်း ၵူၼ်းမိူင်း ၼၼ်ႉ ၾၢႆႇလိူမ်ႈလႆႇ ၶွမ်ႊမတီႊဝဵင်းလူင်တူၼ်ႈတီး လူင်းသိတ်ႇလၢင်ႉၶႃႈၸိူဝ်ႉမႅင်း ၸွမ်းၵၢတ်ႇလူင် ဢွင်ႈတီႈၵူၼ်း ၵိုၼ်းၶွၼ်ႇ။

မိူဝ်ႈၼႆႉ ဝၼ်းတီႈ 30/3/2020 ယၢမ်းဝၢႆးဝၼ်း ႁွင်ႈၵၢၼ်ၾၢႆႇလိူမ်ႈလႆႇ လူင်းသိတ်ႇလၢင်ႉယႃႈၶႃႈၸိူဝ်ႉမႅင်း ၶူဝ်ႊဝိတ်ႉ 19 ၸွမ်းၼႂ်းၵၢတ်ႇလူင်၊ ၸွမ်းၼႃႈၵၢတ်ႇ၊ ႁိမ်းႁွမ်းၵၢတ်ႇလႄႈ ဢွင်ႈတီႈၵူၼ်းၵိုၼ်းၶွၼ်ႈ လၢႆလၢႆတီႈ ၼႂ်းၸႄႈဝဵင်းတူၼ်ႈတီး ၸိုင်ႈတႆးပွတ်းၸၢၼ်း ဝႃႈၼႆ။

ၼၢင်းမွၵ်ႇမူဝ်ႁဵဝ်းၶမ်း ၽူႈသိုဝ်ႇၶၢဝ်ႇ ၽူႈတွႆႇႁွၵ်ႈ ယူႇဝဵင်းတူၼ်ႈတီးသေ ႁၢႆးငၢၼ်းလၢတ်ႈၼႄဝႃႈ “ မိူဝ်ႈၼႆႉ ယူႇတီႈႁွင်ႈ ၵၢၼ်ၾၢႆႇလိူမ်ႈလႆႇ လူင်း သိတ်ႇယႃႈၶႃႈၸိူဝ်ႉမႅင်း ၸွမ်းၼႃႈၵၢတ်ႇလူင်၊ ၼႂ်းၵၢတ်ႇလႄႈ ဢွင်ႈတီႈၵူၼ်းၵိုၼ်းၶွၼ်ႈ၊ မိူဝ်ႈပူၼ်ႉမႃး ဝၼ်း သဝ်ၼၼ်ႉ ၵေႃႈ တီႈၸၼ်ႉၸွမ်တူၼ်ႈတီးၵေႃႈၵႂႃႇသိတ်ႇ။ မိူဝ်ႈၼႆႉ ၸွမ်ၽွင်းလူင်မိူင်းတႆးၵေႃႈ လူင်းပိုၼ်ႉတီႈ ၵူတ်ႇထတ်းတူၺ်း” ဝႃႈၼႆ။

ဢိင်ၼိူဝ် လွင်ႈတၢင်းပဵၼ် ၶူဝ်ႊဝိတ်ႉ 19 ၽႄႈၸပ်းႁၢဝ်ႈႁႅင်းမႃးသေ ယူႇတီႈႁွင်ႈၵၢၼ်ၾၢႆႇလိူမ်ႈလႆႇ ၼႂ်းမိူင်းတႆး လၢႆလၢႆၸႄႈဝဵင်း လူင်းသိတ်ႇလၢင်ႉၶႃႈၸိူဝ်ႉမႅင်း တီႈၵူၼ်းၵိုၼ်းၶွၼ်ႈလႄႈ ႁိမ်းႁွမ်းၵၢတ်ႇ၊ ၼႂ်းၵၢတ်ႇလူင် ၸိူဝ်းၼႆႉ လၢႆလၢႆတီႈ လၢႆလၢႆဝဵင်း။

တီႈဝဵင်းလူင် တူၼ်ႈတီး ယၢမ်းလဵဝ် ၵူၼ်းၵႂႃႇမႃး သိုဝ်ႉၶၢႆ ၸွမ်းႁၢၼ်ႉၶၢႆၶူဝ်း ၸွမ်းၼႂ်းၵၢတ်ႇ၊ ၸွမ်းတၢင်းလူင် ၸိူဝ်းၼႆႉဢမ်ပေႃးမီး၊ ဢၼ်ဢိုတ်းဝႆႉၵေႃႈၼမ်။ ၵၢတ်ႇၵၢင်ၶမ်ႈ တီႈၵူၼ်းဢႅဝ်ႇၶွၼ်ႈၵိုၼ်းၵေႃႈ ပိၵ်ႉဝႆႉ တင်း သွင်တီႈ။

မိူဝ်ႈဝၼ်းတီႈ 29/3/2020 ပူၼ်ႉမႃးၼႆႉ ယူႇတီႈႁွင်ႈၵၢၼ်ၾၢႆႇလိူမ်ႈလႆႇ လၢႆလၢႆၸႄႈဝဵင်း ၼႂ်းမိူင်းတႆး ပိုၼ်ၽၢဝ်ႇ ၸီႉသင်ႇ ႁႂ်ႈဢိုတ်းၵၢတ်ႇၵၢင်ၶမ်ႈလႄႈ ၵၢတ်ႇၵူၼ်းမိူင်း ႁႃႈဝၼ်းလႂ် ၼိုင်ႈပွၵ်ႈ ၸိူဝ်းၼၼ်ႉ ႁႂ်ႈပိၵ်ႇတေႃႇထိုင် ဝၼ်းတီႈ 30/4/ 2020 ဝႃႈၼႆ။

ယၢမ်းလဵဝ်ၵူၼ်းမိူင်းႁူမ်ႈတုမ်ပတ်းပိုၼ်ႉ ဢၼ်လူင်ပွင်ၸိုင်ႈပိုၼ်ၽၢဝ်ႇ ၸိုဝ်ႈသဵင်ၵူၼ်းၸပ်းတၢင်းပဵၼ် ၶူဝ်ႊဝိတ်ႉ 19 တင်းမူတ်း မီး 14 ၵေႃႉ၊ ၵူၼ်းထုၵ်ႇထၢင်ႇထိူမ် မီး 400 ပၢႆ။ ၼႂ်းလုမ်ႈၾႃႉတင်းမူတ်း ၵူၼ်းတိတ်းၸပ်းတၢင်းပဵၼ်ၶူဝ်ႊဝိတ်ႉ 19 မီး 741,774 ၵူၼ်းတၢႆယွၼ်ႉၸိူဝ်ႉမႅင်းၼႆႉမီး 35,334 ၵေႃႉယဝ်ႉ။