မၢဝ်ႇထႅဝ်ႇဢွၼ်ႇ ပၢင်လူင် ၵေႃႉၼိုင်ႈ ပွၵ်ႈမိူင်းထႆးမႃး ဢမ်ႇပေႃးယူႇလီ မီးလူမ်းမႆႈၶႆႈ ၼၢဝ်၊ ၶေႃးၸဵပ်း ဢႆ လႄႈထုၵ်ႇ ၸဝ်ႈၼႃႈတီႈၾၢႆႇ ပၢႆးယူႇလီ ၵုမ်းတူဝ်ဝႆႉတီႈ ႁူင်းယႃႇလူင် ၵူၼ်းမိူင်း ဝဵင်းပၢင်လူင် ။

မိူဝ်ႈၼႆႉ ဝၼ်းတီႈ 29/3/2020 ယၢမ်းၵၢင်ၼႂ် ယူႇတီႈၾၢႆႇမေႃယႃ လႆႈၵူတ်ႇထတ်း လူမ်းမႆႈ မၼ်းၸၢႆး သေ မီးလူမ်းမႆႈ ၶေႃးၸဵပ်း လႄႈ ၸဝ်ႈၼႃႈတီႈလႆႈၵုမ်းတူဝ်မၼ်းၸၢႆးဝႆႉတီႈ ႁူင်းႁဵၼ်း ၸၼ်ႉသုင်မၢႆ -2 ဝဵင်းလွႆလႅမ်။ ပႂ်ႉတူၺ်းငဝ်းလၢႆးတၢင်းပဵၼ် ၶူဝ်ႊရူဝ်ႊၼႃႊ ၶူဝ်ႊဝိတ်ႉ 19 ဝႆႉ ဝႃႈၼႆ။

ၸၢႆးဢွင်ႇၶမ်း ၽူႈၵွၼ်းဢိူင်ႇ ၼွင်လႅင် လၢတ်ႈတီႈၽူႈတွႆႇႁွၵ်ႈဝႃႈ- “ ယၢမ်းလဵဝ် လႆႈဢဝ်တူဝ်မၼ်းၸၢႆး မႃးထတ်း တူၺ်းတီႈ ႁူင်းယႃ ပၢင်လူင်ၶႃႈဢေႃႈ။ လႆႈငိၼ်းဝႃႈ မိူဝ်ႈမႃးၸွမ်းတၢင်းၵေႃႈ ၺႃးပလိၵ်ႈထႆး တီႉယဵတ်ႈၶွၵ်ႈ သွင်ၶိုၼ်း။ ၶၢဝ်းတၢင်းၵေႃႈသမ်ႉၵႆလႄႈ တေၸပ်းၵတ်းႁိုဝ်ၵေႃႈဢမ်ႇႁူႉ။ သၢႆငၢႆ မၼ်းတႄႉ ၶႅမ်ႉယူႇ ပႂ်ႉတူၺ်းဝႆႉ ၵူၺ်းၼင်ႇၵဝ်ႇၶႃႈ” – ဝႃႈၼႆ။

ၸၢႆးဢွၼ်ႇၼႆႉ လုၵ်ႉမိူင်းထႆး ပွၵ်ႈထိုင်ပၢင်လူင်ၶိုၼ်း မိူဝ်ႈဝၼ်းတီႈ 28/3/2020 ၊ ယူႇတီႈၽူႈမီး ပုၼ်ႈ ၽွၼ်းၶဝ် ပႂ်ႉၵူတ်ႇထတ်းတၢင်းပဵၼ် ၶူဝ်ႊဝိတ်ႉ 19 တီႈတၢင်းၶဝ်ႈ ဝဵင်းလွႆလႅမ်ၼၼ်ႉသေ ယင်းလႆႈႁွင်ႉၵုမ်းတူဝ်မၼ်းၸၢႆးဝႆႉ တီႈႁူင်းႁဵၼ်းၸၼ်ႉသုင် မၢႆ 2 ၸႄႈဝဵင်းလွႆလႅမ် ၼၼ်ႉၵမ်းၼိုင်ႈၵွၼ်ႇဝႃႈၼႆ။

ၸၢႆးဢွင်ႇၶမ်း သိုပ်ႇလၢတ်ႈဝႃႈ “ မေႃယႃၶဝ်တႄႉ လၢမ်းဝႆႉဝႃႈ မၼ်းၸၢႆး ၸပ်းၵတ်းၼႆၵူၺ်း။ ၵူၺ်းၼႃႇ ဢၼ်ၽူႈၵွၼ်း ၸႄႈဝဵင်းဢွၼ်ႁဵတ်းယူႇတေႃႈလဵဝ်ၼႆႉတႄႉ ပေႃးၽႂ်မီးလူမ်းၼၢဝ်၊ ၶေႃးၸဵပ်းလႄႈ ဢႆ ၼႆၸိုင် တေလႆႈပႂ်ႉတူၺ်း တိၵ်း တိၵ်းၼၼ်ႉယဝ်ႉ ၵူၼ်းၸိူဝ်းပွၵ်ႇမိူင်းထႆး၊ မိူင်းၶႄႇမႃး” ဝႃႈၼႆ။

ယၢမ်းလဵဝ် တၢင်းပဵၼ်ၶူဝ်ႊဝိတ်ႉ 19 ဢၼ်တင်းၼမ်ယၢမ်ႈႁူႉမႃးဝႃႈ ၵႃႇလ ၶႄႇ တၢင်းပဵၼ် ဝူႊႁၢၼ်ႉ ၼႆႉ ၽႄႈၸပ်းတၢင်းၵမ်ႇၽႃႇ။ မိူင်းထႆး ၵေႃႈ ပိၵ်ႉဝၢၼ်ႈပိၵ်ႉမိူင်း ဢမ်ႇပၼ်ၵူၼ်းၶႅၵ်ႇၼွၵ်ႈမိူင်းၶဝ်ႈ၊ ႁူင်းၵၢၼ် ႁူင်းငၢၼ်း ႁၢၼ်ႉတၢင်းၵိၼ်ၸိူဝ်းၼႆႉ ၵေႃႈ လႆႈပိၵ်ႉလႄႈ ၵူၼ်းမိူင်းမၢၼ်ႈ မိူင်းတႆး ၼပ်ႉသႅၼ် ဢၼ်ၶဝ်ႈၵႂႃႇ ႁဵတ်းၵၢၼ် မိူင်းထႆး ႁၢမ်းၵၢၼ် ႁၢမ်းငၢၼ်းသေ လႆႈပွၵ်ႈမိူင်းၶိုၼ်း။ ပွၵ်ႈဝၢၼ်ႈၵဝ်ႇ မိူင်းလင်ၵေႃႈ ၺႃးၵူၼ်းဝၢၼ်ႈဢမ်ႇပၼ်ၶဝ်ႈ ဝၢၼ်ႈလႆႈယူႇ ၼွၵ်ႈဝၢၼ်ႈ ၼႂ်းထဵင်ႁႆႈ ထဵင်ၼႃး 14 ဝၼ်း ယွၼ်ႉၵူဝ်ပႃး တၢင်းပဵၼ်မႃးၽႄႈၸပ်းၵၼ်။