ယူႇတီႈၽူႈတႅၼ်းသၽႃး၊ ၽူႈမီးပုၼ်ႈၽွၼ်း၊ သိုၵ်းလူင်ပွင်ၸိုင်ႈမၢၼ်ႈ ပႂ်ႉၵူတ်ႇထတ်းၵူၼ်းမိူင်း ၶဝ်ႈဢွၵ်ႇၵႂႃႇမႃး ၸွမ်း သဵၼ်ႈတၢင်း တႃႇႁႄႉၵင်ႈၵူဝ်ၸိူဝ်ႉမႅင်း Covid 19 ၸပ်းၼႂ်းၸႄႈ ဝဵင်းလၢႆးၶႃႈ ၸိုင်ႈတႆးပွတ်းၸၢၼ်း။

တင်ႈတႄႇဝၼ်းတီႈ 28/3/2020 မိူဝ်ႈဝႃးမႃး ၽူႈတႅၼ်းသၽႃး တင်း ၽူႈမီးပုၼ်ႈၽွၼ်း ၾၢႆႇပၢႆးယူႇလီ၊ ၼႂ်းႁွင်ႈၵၢၼ် လူင် ပွင်ၸိုင်ႈ ႁူမ်ႈၵၼ်ပႂ်ႉၵူတ်ႇထတ်း တၢင်းၶဝ်ႈတၢင်းဢွၵ်ႇဝဵင်း၊ ဢၼ်လုၵ်ႉတၢင်း ပၢင်လူင်ၶဝ်ႈ၊ ဢၼ်လုၵ်ႉတၢင်း မိူင်းၵိုင် ၶဝ်ႈ၊ ၾၢႆႇသိုၵ်းမၢၼ်ႈ တႄႉ ပႂ်ႉတီႈႁူဝ်ၶူဝ်ၼမ်ႉတဵင်း ဢၼ်လုၵ်ႉတၢင်းမိူင်းၼွင်မႃး။

ၸၢႆးၵွင်ၶမ်း ၽူႈတႅၼ်းသၽႃးၵူၼ်းမိူင်း ၸႄႈဝဵင်းလၢႆးၶႃႈ လၢတ်ႈတီႈၽူႈတွႆႇႁွၵ်ႈဝႃႈ – “ တေႃႈလဵဝ်တႄႉ မီးဝႆႉၵေႃႉ လဵဝ် ၵူၺ်းၶႃႈ၊ လူမ်းမႆႈၵေႃႈဢမ်ႇမီး၊ ပၢႆးယူႇ လီမၼ်းၸၢႆးၵေႃႈ တဵမ်ထူၼ်ႈယူႇ။ ၸူဝ်ႈႁဝ်းၶႃႈ ၵူတ်ႇထတ်း လူမ်းမႆႈ မၼ်းၸၢႆးၼၼ်ႉ ပႆႇမီး။ ပေႃးမၼ်း မိူဝ်းထိုင်တီႈဝၢၼ်ႈၼႆ ၵူဝ်မၼ်းမီးမႃးၼႆလႄႈ ႁဝ်းၶႃႈ ထိင်းၵုမ်းဝႆႉ မၼ်းၸၢႆးၵမ်ႉၼိုင်ႈၵူၺ်း။ လွင်ႈၵိၼ်လွင်ႈယမ်ႉ တီႈယူႇ တၼ်းသဝ်းတႄႉ ဢမ်ႇမီးလွင်ႈမႆႈၸႂ်ၶႃႈ ႁဵတ်းဝႆႉပၼ် မူတ်းယဝ်ႉၶႃႈ” – ဝႃႈၼႆ။

တၢင်းပဵၼ်ၶူဝ်ႊဝိတ်ႉ 19 ၼႆႉ ၽႄႈၸပ်းၵၼ်ငၢႆႈ ၵူၼ်းၸိူဝ်းၵႂႃႇႁဵတ်းၵၢၼ် တၢင်းမိူင်းထႆး၊ မိူင်းၶႄႇ ပွၵ်ႈမႃးၸိူဝ်းၼၼ်ႉ ၼႂ်းၸႄႈ ဝဵင်းလၢႆးၶႃႈ မၢင်ဝၢၼ်ႈ ဢမ်ႇပၼ်ၶဝ်ႈဝၢၼ်ႈၵမ်းလဵဝ် ႁႂ်ႈယူႇဝႆႉၼွၵ်ႈဝၢၼ်ႈသေ ပႂ်ႉတူၺ်းတၢင်းပဵၼ် 14 ဝၼ်း ယဝ်ႉ ၸင်ႇပၼ်ၶဝ်ႈဝၢၼ်ႈ ၼႆဝႆႉလႄႈ ၵူၼ်းၸိူဝ်းၵႂႃႇၼွၵ်ႈမိူင်းပွၵ်ႈမႃး လႄႈ ႁူပ်ႉတၢင်းယၢပ်ႇယူႇ ၼႂ်းထဵင်ႁႆႈ ထဵင်ၼႃးၵေႃႈမီးၽွင်ႈ – ဝႃႈၼႆ။

ၸဝ်ႈၶူး ၽူႈတူင်ႉၼိုင် ၼႂ်းသင်ၶၸဝ်ႈ လၢႆးၶႃႈ လၢတ်ႈတီႈၽူႈတွႆႇႁွၵ်ႈဝႃႈ -“ တပ်ႉသိုၵ်းမၢၼ်ႈၶဝ် လူင်းၵူတ်ႇထတ်းပၼ် ပၢႆးယူႇလီ သင်ၶၸဝ်ႈ တႄႇဢဝ်မိူဝ်ႈဝႃးမႃး ၵူတ်ႇထတ်းၸွမ်းၼႂ်းဝဵင်းယူႇ။ ၵူၺ်းၵႃႈ တီႈၸဝ်ႈၶဝ်ယူႇတႄႉ ပႆႇမႃး” – ဝႃႈၼႆ။

တီႈဝၢၼ်ႈၼမ်ႉသၢႆး ဝဵင်းလၢင်းၶိူဝ်း ၸိုင်ႈတႆးပွတ်းၸၢၼ်းၵေႃႈ သင်ၶၸဝ်ႈတူၼ်ၼိုင်ႈ ဢၼ်လုၵ်ႉမိူင်းထႆးမႃး ၼၼ်ႉပဵၼ်ဝတ်းပဵၼ်ဢႆ ဢမ်ႇယူႇလီၼႆလႄႈ ဝၼ်းတီႈ 29 /3/2020 ၵၢင်ၼႂ် ၾၢႆႇပၢႆးယူႇလီဝဵင်းလၢင်းၶိူဝ်း လႆႈၵႂႃႇပၢင်းၸဝ်ႈမႃးယူႇတီႈႁူင်းယႃလၢင်းၶိူဝ်းသေပႂ်ႉတူၺ်းဝႆႉယူႇ။

ယၢမ်းလဵဝ် ၵၢတ်ႇၵၢင်ၶမ်ႈ ဝဵင်းမူႇၸေႊ ဢၼ်ပဵၼ်ဝဵင်းပၢႆးမၢၵ်ႈမီး ယူႇၸပ်းလႅၼ်လိၼ်ၶႄႇ၊ ၵၢတ်ႇၵၢင်ၶမ်ႈ ဝဵင်းတႃႈလဵၵ်း ဢၼ်ပဵၼ်ဝဵင်းပၢႆးမၢၵ်ႈမီး ယူႇဢိူမ်ႈလႅၼ်လိၼ်ထႆး ၸိူဝ်းၼႆႉ ၸဝ်ႈၼႃႈတီႈၾၢႆႇၽွင်းငမ်း ႁၢမ်ႈဝႆႉ ဢမ်ႇပၼ်ပိူတ်ႇ။

ၸိူဝ်ႉမႅင်းဢၼ်ၸပ်းၽႄႈယူႇယၢမ်းလဵဝ် လႆႈဝႃႈ ၽႄႈၸပ်းၵၼ်ၵူႈမိူင်းမိူင်း တင်းလုမ်ႈၾႃႉ၊ လုၵ်ႈၸုမ်းၸၢတ်ႈၸိုင်ႈ လုမ်ႈၾႃႉ 193 မိူင်း ၸပ်းၵူႈမိူင်း၊ ၸိူဝ်းပႆႇပဵၼ် လုၵ်ႈၸုမ်း ထႅင်ႈ 3-4 မိူင်း ၵေႃႈ ယင်းၽႄႈၸပ်း ထိုင်ပႃးလူးၵွၼ်ႇဝႃႈၼႆ။ ႁူဝ်ၵူၼ်းဢၼ်ၽႄႈၸပ်းတၢင်းပဵၼ်ဝႆႉတေႃႇ ဝၼ်းမိူင်းၼႆႉ မိူင်းဢမေႊရီႊၵၼ် ပဵၼ်ၼမ်လိူဝ်ပိူၼ်ႈ ၸပ်းတၢင်း သႅၼ်သွင်မိုၼ်ႇပၢႆ ။ တၢႆ သွင်ႁဵင်ပၢႆ ။ မိူင်းဢီႊတလီႊ ၸပ်း 9 မိုၼ်ႇပၢႆ ၊ တၢႆ မိုၼ်ႇပၢႆ လႄႈ ၶၢမ်ႈပူၼ်ႉမိူင်းၶႄႇ ၵႂႃႇတင်းသွင်မိူင်း။