ၾၢႆႇပၢႆးယူႇလီ ၵူတ်ႇထတ်း တၢင်းပဵၼ်သတ်း ၼႂ်းတူဝ်ဝဵင်းလၢႆးၶႃႈ

ၵူဝ်ၸိူဝ်ႉမႅင်းတၢင်းပဵၼ်သတ်းၽႄႈၸပ်းၵၼ်ၼႆသေ ၾၢႆႇပၢႆးယူႇလီ/လဵင်ႉလူသတ်း/ၾၢႆႇလိူမ်ႈလႆႇ သၢၼ်မိုဝ်းၵၼ် လူင်းပိုၼ်ႉတီႈ ၵူတ်ႇထတ်း ၼိူဝ်ႉမူ ၼိူဝ်ႉၵႆ ၼႂ်းတူဝ်ဝဵင်းလၢႆးၶႃႈ။

ဝၼ်းတီႈ 27/3/2020 တေႃႇဝၼ်းမိူဝ်ႈၼႆႉၶၢဝ်းတၢင်း 2-3 ဝၼ်းၼႆႉ ၽူႈမီးၼႃႈတီႈပုၼ်ႉၽွၼ်း ၾၢႆႇပၢႆးယူႇလီ၊ ၾၢႆႇလိူမ်ႈလႆႈ လူင်းၸွမ်းၵၢတ်ႇ တီႈၶၢႆၼိူဝ်ႉ ၶၢႆမူ ၶၢႆၵႆႇ သေ ၵူတ်ႇထတ်း တၢင်းပဵၼ် ၵႃႇလမူ ယွၼ်ႉၵူဝ် ဢဝ်ၸိူဝ်ႉမႅင်း ၸပ်းၽႄႈ တေႃႇ ၵၢၼ်လဵင်ႉလူသတ်း ၼႂ်းၸႄႈဝဵင်းလၢႆးၶႃႈ။

ၸၢႆးၵွင်ၶမ်း ၽူႈတႅၼ်းသၽႃး ၵူၼ်းမိူင်း ၸႄႈဝဵင်းလၢႆးၶႃႈ လၢတ်ႈတီႈၽူႈတွႆႇႁွၵ်ႈဝႃႈ “ ၵမ်ႈၼမ် မူဢၼ်တၢႆၼႆႉ မၼ်းပဵၼ် ၶၢဝ်းၵတ်း လႅၵ်ႈၶဝ်ႈၶၢဝ်းမႆႈၸိူင်ႉၼႆ ၵႆႉပဵၼ်ၼႃႇ မူႇဝႃႇ၊ ၵႆႇဝႃႇ ၸိူဝ်းၼႆႉ လွင်ႈၼႆႉတႄႉ ပဵၼ်ၵူႈပီၶႃႈယဝ်ႉ။ တေလႆႈဝႃႈ တၢင်းပဵၼ်ၵႃႇလ ၾိင်ႈၾႃႉရႃႇသီႇ(ရာသီကာလ) ဢေႇလႄႈၼမ် ပဵၼ်ၵူႈ ပီၶႃႈယဝ်ႉ။ ပီၼႆႉတႄႉလႆႈဝႃႈၼမ်လိူဝ်ၵူႈပီ။ ယၢမ်းလဵဝ် မူဢၼ်တၢႆတႄႉ ဢမ်ႇမီးယဝ်ႉၶႃႈ” ဝႃႈၼႆ။

မူဢၼ်တၢႆၸိူဝ်းၼၼ်ႉပဵၼ်မူ ပီႈၼွင်ႉဝၢၼ်ႈၼွင်ပၢင်ႇ၊ ၼွင်မိူင်း၊ ႁူဝ်ၼွင်လူင် တင်းမူတ်းမီး 8 ဝၢၼ်ႈ။ၶႂ်ႈဝႃႈပဵၼ်ၵူႈဝၢၼ်ႈ ၊ ၽွင်းမူတၢႆၼၼ်ႉ ၵမ်ႈၽွင်ႈ သမ်ႉ ဢဝ်ပႅတ်ႈၸွမ်းလႅၼ်ႁႆႈလႅၼ်ၼႃး၊ ပႅတ်ႈတူၵ်းၼမ်ႉၵေႃႈမီး လႄႈ ၽူႈႁူႉပုၼ်ႈၽွၼ်း ၵမ်ႈၽွင်ႈ လႆႈၶုတ်းၾင်ပၼ် တင်းၼမ် -ဝႃႈၼႆ။

ၸၢႆးဢွၼ်ႇ လၢႆးၶႃႈ လၢတ်ႈတီႈၽူႈတွႆႇႁွၵ်ႈဝႃႈ – “ ပဵၼ်ၸွမ်းၼႂ်းဝဵင်းၸိူဝ်းၼႆႉဢေႃႈ။ ဝၢၼ်ႈၼွၵ်ႈတႄႉ ဢမ်ႇပေႃး လႆႈငိၼ်း။ မီးတႄႉ တေမီးယူႇၵူၺ်း လွင်ႈမူႇတၢႆၼႆႉ။ မူၸိူဝ်းၼၼ်ႉ တၢႆယဝ်ႉၵေႃႈ ဢဝ်ၵႂႃႇပႅတ်ႈမိူဝ်ၸွမ်း ၵွင်ယုၵ်းယၵ်းၸိူဝ်း ၼၼ်ႉ ၾင်ၵေႃႈဢမ်ႇၾင် ၵူၼ်းဢဝ်ၵႂႃႇပႅတ်ႈမၼ်းၼၼ်ႉၵေႃႈ၊ ယဝ်ႉၵေႃႈ ၸွမ်းၼႂ်းၼမ်ႉတဵင်းၵေႃႈ ပႅတ်ႈတူၵ်းၶႃႈယဝ်ႈ။ မၢင်တီႈ ထိုင်ၼၢင်းတႃႉလူင်းမႃးၵိၼ်ၵေႃႈမီး” ဝႃႈၼႆ။

ႁူဝ်ပီ 2020 ၼႆႉမႃး ၵႃႇလမူ၊ ၵႃႇလၵႆႇ ပဵၼ်ၵၼ်လၢႆတီႈလၢႆဝဵင်း၊ တၢင်းပဵၼ်ဝူဝ်းၵႂၢႆး သမ်ႉ ၵိပ်ႇၸဵပ်းလိၼ်ႉၸဵပ်း ၸပ်း ၽႄႈ တၢင်းပွတ်း သိူဝ်လိုဝ်း မိူင်းယၢင်း ထုင်ႉတၢင်းဢွင်ႇ တၢင်းႁွင်ႇ ၵဵင်းတုင်ၸိူဝ်းၼႆႉ ႁဵတ်းႁႂ်ႈဝူဝ်းတၢႆ ၼမ်။ တၢင်းပွတ်း မိူင်းထႆးသမ်ႉယမ်းလဵဝ် ပဵၼ်ၵႃႇလမႃႉ ၶွၵ်ႈလဵင်ႉမႃႉ ၼႂ်းမိူင်းထႆးတီႈလဵဝ် မႃႉတၢႆ ၼမ်ႉ ႁူဝ်သိပ်းတူဝ်လႄႈ ယၢမ်းလဵဝ် ႁၢမ်ႈ ဢဝ်မႃႉဢွၵ်ႇတၢင်းၼွၵ်ႈ၊ ၶီႇလဵၼ်ႈ၊ ၶီႇၶႅင်ႇ၊ ဢဝ်မႃႉၵႃႈၸွမ်းပွႆး ၸိူဝ်းၼႆႉႁၢမ်ႈဝႆႉသဵင်ႈသဵင်ႈ။