ၾၢႆႇလိူမ်ႈလႆႇမူႇၸေႊ ႁၢမ်ႈၶၢႆၵၢတ်ႇၵၢင်ၶမ်ႈလႄႈ ဝၼ်းၵၢတ်ႇၵူၼ်းၵိုၼ်း

ႁွင်ႈၵၢၼ်ၾၢႆႇလိူမ်ႈလႆႇ မူႇၸေႊ သင်ႇဢိုတ်း/ ပိၵ်ႉၵၢတ်ႇၵၢင်ၶမ်ႈ ၼႂ်းၸႄႈဝဵင်းမူႇၸေႊ တႃႇတေၵုမ်းလႆႈ ၸိူဝ်ႉမႅင်း ၶူဝ်ႊဝိတ်ႉ 19 ယႃႇႁႂ်ႈလၢမ်းၽႄႈႁၢဝ်ႈႁႅင်း ဝႃႈၼႆ။

တႄႇဢဝ် ဝၼ်းတီႈ 29/3/2020 ၼႆႉၵႂႃႇ ၵၢတ်ႇလူင် မၢႆ (1)၊ မၢႆ (2) တေလႆႈပိုတ်ႇတေႃႇထိုင်ႁူဝ်ၶမ်ႈ 5 မူင်းၵူၺ်း၊ ၵၢတ်ႇႁူဝ် ၶမ်ႈတႄႉ ၸီႉသင်ႇ ႁႂ်ႈဢွၼ်ၵၼ်ဢိုတ်း/ ပိၵ်ႉ ၵူဝ်ပဵၼ်တီႈၵူၼ်းၶွၼ်ႈတုမ်ၵၼ် ၵူဝ်မီးၸိူဝ်ႉမႅင်း တၢင်းပဵၼ်ၶူဝ်ႊဝိတ်ႉ 19 မႃးလၢမ်းၽႄႈ ၸူးၵူၼ်းမိူင်း ဝႃႈၼႆ။

လုင်းသႅင်ၶမ်းႁိူင်း ၵူၼ်းမူႇၸေႊ လၢတ်ႈတီႈၽူႈတွႆႇႁွၵ်ႈဝႃႈ “ ၸႂ်ႈၶႃႈယဝ်ႉ ၾၢႆႇလိူမ်ႈလႆႇ လၢတ်ႈဝႃႈ ပေႃးပဵၼ်ဝၼ်း ၵၢတ်ႇၼႆ ၵူၼ်းတေမႃးၶွၼ်ႈတုမ်ၵၼ်။ ၵူဝ်ပဵၼ်ၵၢၼ်ၶွၼ်ႈတုမ်ၵၼ်လႄႈ ၸင်ႇသင်ႇဢိုတ်းပိၵ်ႉဝၼ်းၵၢတ်ႇၵူၺ်း ။ ဢၼ်ပဵၼ်ၵၢတ်ၵၢင်ၶမ်ႈတႄႉတိုၼ်းဢမ်ႇပၼ်ပိုတ်ႇယဝ်ႉ” ဝႃႈၼႆ။

ၼႂ်းလိၵ်ႈပိုၼ်ၽၢဝ်ႇၼၼ်ႉ တႅမ်ႈဝႆႉဝႃႈ “ ၼင်ႇႁိုဝ် ပေႃးတေၵုမ်းၵမ်လႆႈ တၢင်းပဵၼ် ၶူဝ်ႊဝိတ်ႉ 19 ဢၼ်လၢမ်းၽႄႈၵၼ် ႁၢဝ်ႈႁႅင်းၼၼ်ႉ ၸင်ႇလႆႈသင်ႇဢိုတ်းၵၢတ်ႇ တႄႇဢဝ် ဝၼ်းပိုၼ်ၽၢဝ်ႇ ဝၼ်းတီႈ 29/3/2020 တေႃႇထိုင် 30/4/2020” ဝႃႈၼႆ။

မိူဝ်ႈဝၼ်းတီႈ 27/3/2020 ၼၼ်ႉၵေႃႈ ၵူၼ်းမူႇၸေႊ သွင်ၵေႃႉ ၶီႇရူတ်ႉသၢႆ ၵႃး (လႅင်းၵႃး) ၶၢႆႇမၼ်းတလေး လုၵ်ႉ တႃႈၵုင်ႈ မႃးဝဵင်းလိူဝ်ႇၼၼ်ႉ ပႃးၵူၼ်းၸပ်းတၢင်းပဵၼ်မႃးၸွမ်းၵေႃႉၼိုင်ႈၸွမ်းၼႂ်းရူတ်ႉၵႃးလႄႈ ၵူၼ်းမူႇၸေႊ သွင်ၵေႃႉၼၼ်ႉ ယူႇတီႈၾၢႆႇမေႃယႃ ဝဵင်းမူႇၸေႊ လႆႈႁွင်ႉတူဝ်ဝႆႉ တႃႇပႂ်ႉတူၺ်းငဝ်းလၢႆးတၢင်းပဵၼ်ဝႆႉ တီႈႁူင်းယႃ ၸႄႈ ဝဵင်းမူၸေႊ ဝႃႈၼႆ။

တေႃႈလဵဝ် ၵူၼ်းၸပ်းတၢင်းပဵၼ်ၶူဝ်ႊဝိတ်ႉ 19 တၢင်းလုမ်ႈၾႃႉၼႆႉမီး 664,621 ၵေႃႉ၊ တၢႆ 30,891 ၵေႃႉ ယူႇတီႈႁွင်ႈၵၢၼ် လုမ်ႈၾႃႉ worldometers ဢွၵ်ႇဝႆႉ။