SSPP သိတ်းယႃႈယႃလၢင်ႉၶႃႈၸိူဝ်ႉမႅင်း တီႈၵူၼ်းၶွၼ်ႈၵိုၼ်းၼမ် ၸွမ်းႁၢၼ်ႉၶၢႆၶူဝ်း၊ သဵၼ်ႈတႃႈသၢႆတၢင်း၊ ႁူင်းႁဵၼ်း ၸဵမ်ၸိူဝ်းၼႆႉ။
တႄႇဢဝ် ဝၼ်းတီႈ 28/3/2020 မႃး ပႃႇတီႇမႂ်ႇသုင်ၸိုင်ႈတႆး/ တပ်ႉသိုၵ်းၸိုင်ႈတႆး SSPP/SSA သိတ်းလၢင်ႉၶႃႈၸိူဝ်ႉ မႅင်း ၶူဝ်ႊဝိတ်ႉ 19 ၊ ႁႄႈၵင်ႇၼင်ႇႁိုဝ်ၵူၼ်းမိူင်းၵူၼ်းသိုၵ်းၼႂ်းပိုၼ်ႉတီႈတေဢမ်ႇ တိတ်းၸပ်း ဝႃႈၼႆ။
ၵူၼ်းၼုမ်ႇ ဝၢၼ်ႈႁႆး လၢတ်ႈတီႈၽူႈတွႆႇႁွၵ်ႈဝႃႈ “ မိူဝ်ႈဝႃး ဝၼ်းတီႈ 28 ၼၼ်ႉ ၸၢမ်းတူၺ်းၵူၺ်းၶႃႈ။ မိူဝ်ႈၼႆႉ ဝၼ်းတီႈ 29 တႄႉ တႄႇလူင်းပိုၼ်ႉတီႈသေ သိတ်းလၢင်ႉယဝ်ႉၶႃႈ။ ထႅင်ႈၾၢႆႇၼိုင်ႈၵေႃႈ ၵွပ်ႈပိူဝ်ႈၶိူင်ႈၶူဝ်းဢၼ်ၵဵဝ်ႇၵပ်းလူၺ်ႈလွင်ႈ သိတ်းယႃႈ(ပိုးသတ်ဆေး) တိုၵ်ႉႁႃၽႅဝ်ၵူၺ်း”ဝႃႈၼႆ။
ၼင်ႇႁိုဝ်ၵူၼ်းၼႂ်းပိုၼ်ႉတီႈ ပေႃးတေဢမ်ႇတိတ်းၸပ်းၸိူဝ်ႉမႅင်း ၶူဝ်ႊဝိတ်ႉ-19 ၼႆႉၼႆသေ ၾၢႆႇပၢႆးယူႇလီ ငဝ်ႈငုၼ်း SSPP ႁူမ်ႈမိုဝ်းၵၼ်တၢင်းၵူၼ်းဝၢၼ်ႈၵူၼ်းမိူင်း လူင်းၼႂ်းဝၢၼ်ႈဢိူင်ႇ သေ ၵႂႃႇၵူတ်ႇထတ်းလူမ်းမႆႈပၼ်ၵူၼ်းဝၢၼ်ႈ။ ၾၢႆႇၼိုင်ႈၵေႃႈ ပႂ်ႉၵူတ်ႇထတ်းၵူၼ်းၶဝ်ႈဢွၵ်ႇ။ ပိူင်လူင် ၵူတ်ႇထတ်းၵူၼ်းလုၵ်ႉတီႈၵႆ ပႆတီႈယၢဝ်းမႃး ဝႃႈၼႆ။
“မိူဝ်ႈဝႃး ႁဝ်းၶႃႈၸုမ်းၵူၼ်းၼုမ်ႇ လႆႈႁဵတ်းပၢင်ၵုမ်ၵၼ်သေ တႅပ်းဝႃႈ တႄႇဢဝ် မိူဝ်ႈၼႆႉ ဝၼ်းတီႈ 29 တေလူင်း သိတ်းယႃႈၶႃႈၸိူဝ်ႉမႅင်းၵႂႃႇ ၼႆၶႃႈဢေႃႈ ”ၵူၼ်းၼုမ်ႇဝၢၼ်ႈႁႆး လၢတ်ႈၼႄၼင်ႇၼႆ။
မိူဝ်ႈဝႃး ဝၼ်းတီႈ 28/3/2020 လႆႈသိတ်းလၢင်ႉၸွမ်းလၢၼ်ႇၵဵတ်ႉတၢင်းၶဝ်ႈတၢင်းဢွၵ်ႇ၊ ၸွမ်းသဵၼ်ႈတႃႈသၢႆတၢင်း၊ တီႈဢွင်ႈတီႈၵူၼ်းၼုမ်ႇ၊ ႁူင်းႁဵၼ်းသိုၵ်း တီႈၵူၼ်းသိုၵ်းယူႇ ၶွၼ်ႈၸူႉတုမ်ၵၼ်၊ တီႈႁူင်းႁဵၼ်း ၽူႈမီးၸၼ်ႉ၊ ပၢင်သွၼ်၊ ႁူင်းယႃ၊ ႁူင်းႁဵၼ်းၼေႃႇတႅၼ်းၶိူဝ် ၸဵမ်ၸိူဝ်းၼႆႉ- ဝႃႈၼႆ။
ဝၼ်းမိူဝ်ႈၼႆႉ ၵူၼ်းတိတ်းၸပ်းတၢင်းပဵၼ် ၼႂ်းမိူင်းႁူမ်ႈတုမ်မၢၼ်ႈမီး 8 ၵေႃႉ။ ဢၼ်ပႂ်ႉတူၺ်းၶေႃႈတွပ်ႇမီး 430 ၵေႃႉ- ႁွင်ႈၵၢၼ်ၽွင်းလူင်ၾၢႆႇပၢႆးယူႇလီ ပိုၼ်ၽၢဝ်ႇဝႆႉ။
ၼႂ်းမိူင်းတႆးတႄႉမီးၵူၼ်းပဵၼ်ဢၼ်လီထၢင်ႇထိူမ် 64 ၵေႃႉ တိုၵ်ႉပႂ်ႉတူၺ်းငဝ်းလၢႆးသေ ပႂ်ႉထွမ်ႇၶေႃႈၵူတ်ႇထတ်းဝႆႉယူႇ- ဝႃႈၼႆ။
