သိတ်ႇလၢင်ႉၶႃႈၸိူဝ်ႉမႅင်း ႁိမ်းႁွမ်း ၵၢတ်ႇလူင် ဝဵင်းပၢင်လူင် ႁႄႉႁၢမ်ႈ ၶူဝ်ႊဝိတ်ႉ 19

တၢင်းပဵၼ် ၶူဝ်ႊဝိတ်ႉ 19 ဢၼ်တႄႇၽႄႈၸပ်း တၢင်းဝဵင်းဝူႊႁၢၼ်ႉ မိူင်းၶႄႇ မႃးၼၼ်ႉ ယၢမ်းလဵဝ် ၽႄႈၸွတ်ႈလုမ်ႈၾႃႉ လႄႈ ၵူဝ်တၢင်းပဵၼ် ၸပ်းၽႄႈၼႆသေ ၽူႈမီးပုၼ်ႈၽွၼ်း ၼႂ်းၸႄႈဝဵင်းလွႆလႅမ် ႁူမ်ႈၵၼ် သိတ်ႇၼမ်ႉယႃ ႁႄႉၵင်ႈတၢင်းပဵၼ် ၶူဝ်ႊဝိတ်ႉ 19 တီႈၵၢတ်ႇဝဵင်းပၢင်လူင်။

ၾၢႆႇပၢႆးယူႇလီ၊ ၾၢႆႇလိူမ်ႈလႆႇ တင်း ၽူႈမီးပုၼ်ႈၽွၼ်း ၼႂ်းၸႄႈဝဵင်းလွႆလႅမ် ႁူမ်ႈၵၼ် ၵႂႃႇ သိတ်ႇၼမ်ႉယႃ ၶႃႈၸိူဝ်ႉမႅင်း တႃႇႁႄႉၵင်ႈတၢင်းပဵၼ်ၶူဝ်ႊဝိတ်ႉ 19 တီႈၵၢတ်ႇဝဵင်းပၢင်လူင် မိူဝ်ႈဝၼ်းတီႈ 25/3/2020 ယၢမ်းႁူဝ်ၶမ်ႈ ဝႃႈၼႆ။

ၸၢႆးၵွၼ်တႆး ၵူၼ်းပၢင်လူင် လၢတ်ႈတီႈၽူႈတွႆႇႁွၵ်ႈဝႃႈ “ ၸွမ်းၽၵ်းတူၵၢတ်ႇၼၼ်ႉ ၶဝ်ဝႆႉတီႈလၢင်ႉမိုဝ်းၸိူဝ်းၼႆႉ တင်းသီႇ ၽၵ်းတူၵမ်ႈလဵဝ်ၶႃႈဢေႃႈၼၼ်ႉ။ ၸွမ်းၼႂ်းၵၢတ်ႇၼႆႉၵေႃႈ ဢမ်ႇၸႂ်ႈဝႃႈ ၶဝ်ၸွမ်းသိတ်ႇၵူႈတီႈၼင်ႇၵဝ်ႇ၊ ၶဝ်သိတ်ႇမိူၼ် ၸိူင်ႉၸွမ်းဢၼ်ၶၢႆၼိူဝ်ႉၶၢႆပႃလႄႈ ၾၢႆႇၼွၵ်ႈၵၢတ်ႇ ဢွင်ႈတီႈဢၼ်တေၵႆႉၵႆႉမီးမႅင်းမူၼ်းၸိူင်ႉၼၼ်ႉ” ဝႃႈၼႆ။

ဝဵင်းပၢင်လူင် ဢမ်ႇပိၵ်ႉၵၢတ်ႇသေ တႃႉ ဢမ်ႇႁဵတ်းပွႆးယႂ်ႇလၢမ်းလူင် မီးပၢင်မႃႇသႃ ၵေႃႈ ၵူၼ်းယင်း ဢမ်ႇပေႃးၵႂႃႇ၊ ယွၼ်ႉတၢင်းပဵၼ်သေ ၵမ်ႈၽွင်ႈတူၵ်းၸႂ် တူင်ႉတိုၼ်ႇ သိုဝ်ႉၶွင်ၵိၼ်ၶွင်ယမ်ႉ ယဵတ်ႈယွင် ယဵတ်ႈယေး ဝႆႉၵေႃႈမီး။

ၸၢႆးၵွၼ်တႆး လၢတ်ႈဝႃႈ “ တီႈပၢင်လူင်တႄႉ ၵမ်ႈၽွင်ႈတေႁူႉၸိုဝ်ႈၸႂ်ႈ ဢၼ်တႄႉ၊ မၢင်ၵေႃႉသမ်ႉ ထွမ်ႇၶၢဝ်ႇၽၢင်း ၶၢဝ်ႇၵၢင်လၢႆၵၼ်ၼၼ်ႉၶႃႈၼႃႇ။ ဢွၼ်ၵၼ်ၵူဝ်ႁႅင်းၵေႃႈပိူင်ၼိုင်ႈ ။ ပွႆး လၢမ်းတႄႉ လၢႆၾၢႆႇၵေႃႈ ႁၢမ်ႈဝႆႉ လႄႈ ဢမ်ႇမီးၶႃႈယဝ်ႉ။ ပေႃးမီး ပၢင်မႃႇသႃႇပၢင်သွမ်းၵေႃႈ ဢမ်ႇပေႃးမီးၵူၼ်းၵႂႃႇၼမ်” ဝႃႈၼႆ။

တၢင်းပဵၼ်ၶူဝ်ႊဝိတ်ႉ 19 ၽႄႈၸွတ်ႇဝႆးႁႅင်းတင်းလူမ်ႈၾႃႉ၊ ၼႂ်းၸိုင်ႈတႆးၵေႃႈ ဢွၼ်ၵၼ်တူင်ႉတိုၼ်ႇ ပၼ်တၢင်းႁူႉၵူၼ်းမိူင်း၊ ၸဝ်ႈၼႃႈတီႈၾၢႆႇယူႇလီၶဝ် ႁေႃႈၵႃးသေ ပိုၼ်ၽၢဝ်ႇ ပၢႆးႁူႉ ပၢႆးႁၼ် တၢင်းပဵၼ်ၶူဝ်ႊဝိတ်ႉ ပၼ်ၵူၼ်းမိူင်း ႁႂ်ႈမေႃယူႇမေႃၵိၼ်ၵေႃႈမီး။

တေႃႈလဵဝ် ၼႂ်းမိူင်းတႆး ငဝ်းလၢႆးတၢင်းပဵၼ် ၶူဝ်ႊဝိတ်ႉ 19 ၼႆႉ ၵူၼ်းၸိူဝ်းထုၵ်ႇပႂ်ႉတူၺ်း တင်းမူတ်းမီး 55 ၵေႃႉ။ ပတ်းပိုၼ်ႉမိူင်းႁူမ်ႈတုမ်တႄႉ ဢၼ်ႁူႉတႅတ်ႈတေႃး သဵၼ်ႈမၢႆ ၵူၼ်းၸပ်းတၢင်းပဵၼ် မီး 8 ၵေႃႉ၊ ထုၵ်ႇပႂ်ႉတူၺ်း မီး 371 ၵေႃႉ၊ ၵူၼ်းဢၼ်လူႉတၢႆယွၼ်ႉမၼ်းတႄႉပႆႇမီး။