ၵူၼ်းမူႇၸေႊသွင်ၵေႃႉ လုၵ်ႉတႃႈၵုင်ႈ မႃးဝဵင်းလိူဝ်ႇ ၼႂ်းၵႃးၼၼ်ႉ ပႃးၵူၼ်းၸပ်း ၸိူဝ်းမႅင်ႉၶူဝ်ႊဝိတ်ႉ 19 ၶီႇၸွမ်းမႃးလႄႈ ပေႃးၶဝ်သွင်ၵေႃႉ ထိုင်ႁိူၼ်းၵေႃႈ လႆႈထုၵ်ႇသူင်ႇဝႆႉတီႈႁူင်းယႃ ပႂ်ႉတူၺ်းငဝ်းလၢႆးတၢင်းပဵၼ် ဝႆႉယူႇ ဝႃႈၼႆ။

ဝၼ်းတီႈ 27/3/2020 ယၢမ်းၵၢင်ၼႂ်ၸဝ်ႉ 1:45 မူင်းၼၼ်ႉ ယူႇတီႈႁွင်ၵၢၼ်ၾၢႆႇပၢႆးယူႇလီလႄႈ ၾၢႆႇလဵၼ်ႈႁႅင်း ပိုၼ်ၽၢဝ် ထူပ်းႁၼ်ၵူၼ်းၸပ်းတၢင်းပဵၼ်ၶူဝ်ႊဝိတ်ႉ19 ထႅင်ႈ သွင်ၵေႃႉ ၼႂ်းမိူင်းႁူမ်ႈတုမ် ဝႃႈၼႆ။

ၼႂ်းၵူၼ်းၸပ်းတၢင်းပဵၼ်သွင်ၵေႃႉၼၼ်ႉ တႃႇၵေႃႉၼိုင်ႈ ဢႃယု 69 ပီ ပဵၼ်ၽူႈၸၢႆး လုၵ်ႉမိူင်းဢေႃႊသတရေးလျႃႉလႄႈ သိင်ႇၵပူဝ်ႇမႃး ယၢမ်းလဵဝ်မီး တီႈႁူင်းယႃလူင်တႃႈၵုင်ႈ။

ထႅင်ႈၵေႃႉၼိုင်ႈသမ်ႉ ပဵၼ်ၵူၼ်းၸၢႆး ဢႃႇယု 33 ပီ လုၵ်ႉမိူင်းဢမေႊရီႊၵၼ်ပွၵ်ႈၶိုၼ်းမႃးမိူင်း မိူဝ်ႈဝၼ်းတီႈ 19 ။ ထိုင်မႃး ဝၼ်း တီႈ 20 ၼၼ်ႉ မၼ်းၸၢႆးၶိုၼ်ႈၶီႇၵႃးတၢင်ႇၵူၼ်း “ၶၢႆႇမၼ်းတလေး” လုၵ်ႉတႃႈၵုင်ႈ မႃးဝဵင်းလိူဝ်ႇ။ ၼႂ်းၵႃးၼၼ်ႉ ပႃးၵူၼ်း မူႇၸေႊသွင်ၵေႃႉ ၶီႇမႃးၸွမ်း ဝႃႈၼႆ။

တေႃႈလဵဝ် ၵူၼ်းမူႇၸေႊ သွင်ၵေႃႉၼႆႉ ႁွတ်ႈထိုင်ႁိူၼ်း တီႈမူႇၸေႊ သေ ထုၵ်ႇၵုမ်းတူဝ်ဝႆႉတီႈႁူင်းယႃသေ ၾၢႆႇပၢႆးယူႇလီ ပႂ်ႉတူၺ်းငဝ်းလၢႆး တၢင်းပဵၼ်ဝႆႉယူႇဝႃႈၼႆ။

ၸၢႆးႁိၼ်လဵၵ်း ၵူၼ်းမူႇၸေႊ လၢတ်ႈတီႈၽူႈတွႆႇႁွၵ်ႈဝႃႈ “ ၶဝ်ဢၢၼ်းၶိုၼ်ႈမႃးၸွမ်းၵၼ် 3 ၵေႃႉ။ ၵူၺ်း ပီႈလူင်ၶဝ်သမ်ႉ ဢမ်ႇၶီႇမႃးၸွမ်း။ မိူဝ်ႈဝႃး ဝၼ်းတီႈ 27 ယၢမ်းဝၢႆးဝၼ်းၼၼ်ႉ ၸွမ်းႁိမ်းႁွမ်းၼၼ်ႉ ပိူၼ်ႈမႃးသိတ်ႇ ယႃႈယႃဝႆႉယဝ်ႉ။ တေႃႈလဵဝ် တၢင်းၶဝ်ႈဢွၵ်ႇတီႈႁိူၼ်းၶဝ်ၼၼ်ႉၵေႃႈ လႆႈဢိုတ်းဝႆႉယဝ်ႉ။ ၵူၼ်းၸိူဝ်း တိတ်းတေႃႇ မႅၼ်ႈၶဝ်သွင်ၵေႃႉ ဢၼ်ၶဝ်ႈသွင်ၵေႃႉ ၶဝ်ႈဢွၵ်ႇတိတ်းတေႃႇမႅၼ်ႈၸိူဝ်းၼၼ်ႉၵေႃႈ ပႂ်ႉတူၺ်းငဝ်းလၢႆးဝႆႉယူႇ ” ဝႃႈၼႆ။

ယၢမ်းလဵဝ် ၶဝ်ႈသွင်ၵေႃႉ ၸပ်းၸိူဝ်ႉမႅင်း ဢမ်ႇၸပ်းၸိူဝ်ႉမႅင်းပႆႇႁူႉ၊ တိုၵ်ႉယူႇတီႈငဝ်းလၢႆး ပႂ်ႉတူၺ်း၊ ၵူတ်ႇထတ်း ပၢႆးယူႇလီ ဝႆႉ ၵူၼ်းမူႇၸေႊ တၢင်းလၢႆ ၵေႃႈ ပႆႇထုၵ်ႇလီတူၵ်းၸႂ်ၵူဝ်ႁႄ ၸွမ်းၼင်ႇၵဝ်ႇ ၊ ၾၢင်ႉယူႇၾၢင်ႉၵိၼ် ၵၼ်တႄႉ လီသေ ပိူၼ်ႈ မၼ်းၸၢႆး သိုပ်ႇလၢတ်ႈထႅင်ႈၼင်ႇၼႆ။

ယၢမ်းလဵဝ် တင်းလုမ်ႈၾႃႉ ႁိမ်းသွင်ပၢၵ်ႇၸိုင်ႈမိူင်း၊ ၵူၼ်းၸပ်းတၢင်းပဵၼ်မီး 5.7 သႅၼ်ပၢႆ ၊ လူႉတၢႆၵႂႃႇ 2.6 မိုၼ်ႇၵေႃႉပၢႆ ၊ ယႃလႆႈၶိုၼ်း ႁိမ်း 3 မိုၼ်ၵေႃႉ။ ၵူၼ်းမိူင်းႁူမ်ႈတုမ် မၢၼ်ႈ တိတ်းၸပ်း ဝႆႉ ဢၼ်လႆႈႁူႉပဵၼ်တၢင်းၵၢၼ် မီး 8 ၵေႃႉ၊ ထုၵ်ႇထၢင်ႇထိူမ်သေ ပႂ်ႉတူၺ်းငဝ်းလၢႆး ၸိူဝ်ႉမႅင်း 371 ၵေႃႉ။ ၼႂ်းမိူင်းတႆး ၵေႃႈ ဢၼ်ထုၵ်ႇထၢင်ႇထိူမ် တိတ်းၸပ်း ၸိူဝ်ႉမႅင်းသေ ပႂ်ႉတူၺ်းငဝ်းလၢႆးၵေႃႈ မီးယူႇ ၼပ်ႉႁူဝ်သိပ်းၵေႃႉ။