ၵႃးၵူၼ်းမိူင်း ၺႃးယိုဝ်း တီႈၵူတ်ႉၶၢႆ လမ်းၼိုင်ႈ ၵူၼ်းမႃးၸွမ်းၼႂ်းၵႃး မၢတ်ႇၸဵပ်း ႞ ၵေႃႉ တၢႆထင်တီႈ ၵေႃႉ ႞။
ဝၼ်းတီႈ 25/3/2020 ယၢမ်းဝၢႆးဝၼ်း 4 မူင်းၼၼ်ႉ ရူတ်ႉၵႃးႁပ်ႉၸၢင်ႈတၢင်ႇၵူၼ်းလမ်းၼိုင်ႈ လုၵ်ႉၵူတ်ႉၶၢႆ မႃးမိူင်းၸီး။ ၽွင်းပူၼ်ႉ ဝၢၼ်ႈၼမ်ႉသႃႇ သေႁွတ်ႈထိုင် ၼႂ်းၵႄႈ ၵူတ်ႉၶၢႆ – မိူင်းၸီး ၼၼ်ႉ ၺႃးၸုမ်းယိပ်းၵွင်ႈၵၢင်ႇၸုမ်းၼိုင်ႈ ႁႄႉရူတ်ႉၵႃးၵိုတ်းသေ ၸင်ႇမီးလွင်ႈပိုတ်းယိုဝ်းၵၼ်။
ဢၢႆႈၼုမ်ႇၵူၼ်း မိူင်းၸီး လၢတ်ႈတီႈၽူႈတွႆႇႁွၵ်ႈဝႃႈ “ ၼႂ်းၵႃးၼၼ်ႉ မီးၵူၼ်း 5 ၵေႃႉ ပႃးၵူၼ်းႁေႃႈၵႃး။ ၽိူဝ်ႇထိုင် လၢၼ်ႇ သိုၵ်းမၢၼ်ႈ ဝၢၼ်ႈၼမ်ႉသႃႇယဝ်ႉ သိုၵ်းမၢၼ်ႈ သႂ်ႇၶူဝ်းၵူၼ်းႁိူၼ်း ၵေႃႉ႞ သမ်ႉႁႄႉ ၶီႇမႃးၸွမ်း ။ ပူၼ်ႉ ဝၢၼ်ႈၼမ်ႉသႃႇ မႃး ဢမ်ႇပေႃးႁိုင်ၵႃႈႁိုဝ် မီးသိုၵ်းလွႆ 3 ၵေႃႉႁႄႉၵႃးသေ ၸႂ်ႉၵူၼ်းၶီႇ လူင်းၵႃး။ ပိူၼ်ႈလူင်းရူတ်ႉယဝ်ႉ သိုၵ်းဢၼ်ၼုင်ႈၶူဝ်း ၵူၼ်းႁိူၼ်းသေၶီႇမႃးၸွမ်းၼၼ်ႉသမ်ႉဢမ်ႇလူင်းသေလၢၵ်ႈၵွင်ႈမၼ်းဢွၵ်ႇယိုဝ်းဢွၼ်တၢင်းလႄႈ သိုၵ်းလွႆ 3 ၵေႃႉဢဝ်ၵွင်ႈႁၢတ်ႇပၼ်မၼ်းၶိုၼ်း လႄႈလႆႈတၢႆၵႂႃႇ”- ဝႃႈၼႆ။
သိုၵ်းလူင်ပွင်ၸိုင်ႈၵေႃႉၼၼ်ႉ မၢတ်ႇၸဵပ်းမၢၵ်ႇၵွင်ႈသေၵၢၼ်းလူင်းရူတ်ႉမႃး ၊ ၺႃးသိုၵ်း 3 ၵေႃႉၼၼ်ႉယိုဝ်းသႂ်ႇထႅင်ႈလႄႈ တၢႆထင်တီႈ တီႈႁိမ်းလၢင်ႈရူတ်ႉၼၼ်ႉ။ ၵူၼ်းမိူင်းဢၼ်ၶီႇၵႃးမႃးၸွမ်းၵေႃႉၼိုင်ႈ ဢမ်ႇတၼ်းလူင်းရူတ်ႉပူၼ်ႉ မၢၵ်ႇၵွင်ႈတိူဝ်ႉသႂ်ႇတီႈပုမ်မၼ်း။ တၢင်ႇၵေႃႉတႄႉတၼ်းပၢႆႈလွတ်ႈ ဝႃႈၼႆ။
“ၵူၼ်းမၢတ်ႇၸဵပ်းၼၼ်ႉ ဢဝ်ၵႂႃႇသူင်ႇႁူင်းယႃမိူင်းၸီး၊ တီႈမိူင်းၸီးသမ်ႉဢမ်ႇ မီးမေႃယႃလူင်ၼႆသေ လႆႈသူင်ႇလူင်း ၵူတ်ႇၶၢႆယဝ်ႉ”- ဢၢႆႈၼုမ်ႇ လၢတ်ႈၼင်ႇၼႆ။
ၶၢဝ်းယၢမ်းပိူင်ပဵၼ် ႁိုင်မွၵ်ႈၶိုင်ႈၸူဝ်ႈမူင်း၊ဝၢႆးသဵင်ၵွင်ႈယဵၼ် ရူတ်ႉၵႃးၵေႃႈပဵၼ်ႁွႆးမၢၵ်ႇၵွင်ႈၵႂႃႇမူတ်း။ ၶူဝ်းၶွင်မီးၵႃႈၶၼ် ပႃးၸဵမ်ၾူၼ်းမိုဝ်းထိုဝ်ၵူၼ်းႁေႃႈၵႃး ၵေႃႈ ႁၢႆမူတ်းဝႃႈၼႆ။
ၵဵဝ်ႇၵပ်းလွင်ႈၼႆႉယူႇတီႈၸုမ်းၶၢဝ်ႇၽူႈတွႆႇႁွၵ်ႈၶတ်းၸႂ်ၵပ်းသိုပ်ႇတိတ်းတေႃႇၸူး TNLA ၵေႃႈဢမ်ႇလႆႈလႄႈ ဢမ်ႇၸၢင်ႈယိုၼ်ယၼ်ဝႃႈ သိုၵ်း 3 ၵေႃႉဢၼ်မႃးႁႄႉရူတ်ႉၵႃးၼၼ်ႉပဵၼ်ၽႂ် ၸုမ်းလႂ်။
