ၵူၼ်းဝၢၼ်ႈၼွင်လႅင် ဝဵင်းပၢင်လူင် ဢွၼ်ၵၼ်ႁဵတ်းႁူဝ်ႉဝၢၼ်ႈ ၊ ႁၢမ်ႈၵူၼ်းတၢင်းၼွၵ်ႈၶဝ်ႉဝၢၼ်ႈ ပိူဝ်ႈတႃႇ ၵႅတ်ႇၶႄတၢင်းပဵၼ် ၶူဝ်ႊဝိတ်ႉ 19 ဝႃႈၼႆ။
မိူဝ်ႈၼႆႉ ဝၼ်းတီႈ 27/3/2020 ယၢမ်းၵၢင်ၼႂ် ၵူၼ်းဝၢၼ်ႈၼွင်လႅင် ဢိူင်ႇၼွင်လႅင် ဝဵင်းပၢင်လူင် ၸႄႈဝဵင်းလွႆလႅမ် ၸိုင်းတႆး ပွတ်းၸၢၼ်း ႁူမ်ႈၵၼ် ႁဵတ်းႁူဝ်ႉ ဢိုတ်း/ ပိၵ်ႉသဵၼ်ႈတၢင်းၶဝ်ႈဢွၵ်ႇ ႁၢမ်ႈၵူၼ်းဢၼ်လုၵ်ႉတၢင်းမိူင်းထႆး၊ မိူင်းၶႄႇ ၶဝ်ႈ ဝၢၼ်ႈ ႁႂ်ႈယူႇပႂ်ႉၼွၵ်ႈဝၢၼ်ႈ တႃႇၶၢဝ်းတၢင်း 14 ဝၼ်းယဝ်ႉ ၸင်ႇပၼ်ၶႂၢင်ႉၶဝ်ႈဝၢၼ်ႈ ဝႃႈၼႆ။
ၸၢႆးဢွင်ႇၶမ်း ၽူႈၵွၼ်းဢိူင်ႇၼွင်လႅင် လၢတ်ႈတီႈၽူႈတွႆႇႁွၵ်ႈဝႃႈ “ ၸႂ်ႈၶႃႈဢေႃႈ ၵူၼ်းဝၢၼ်ႈ ၼွင်လႅင် ႁူမ်ႈၵၼ်ႁဵတ်းႁူဝ်ႉ ပိၵ်ႉသဵၼ်ႈတၢင်း ဢမ်ႇပၼ်ၶဝ်ႈဝၢၼ်ႈယဝ်ႉ။ ဢၼ်ပိၵ်ႉၼၼ်ႉ ပိၵ်ႉတႃႇၵူၼ်းဢၼ်လုၵ်ႉတၢင်း မိူင်းထႆး၊ မိူင်းၶႄႇ မႃးၼၼ်ႉ ၶႃႈ။ မၢင်ၵေႃႉ ၶဝ်ဢမ်ႇထွမ်ႇ ပိူၼ်ႈႁႂ်ႈယူႇၼွၵ်ႈဝၢၼ်ႈ 14 ဝၼ်း ၸင်ႇၶဝ်ႈဝၢၼ်ႈ။ ၶဝ်တိုၵ်ႉလၵ်ႉၶဝ်ႈမႃးယူႇလႄႈ ၵူၼ်းဝၢၼ်ႈ ၶိင်ႉၵၢင်ႉ ၸင်ႇႁဵတ်းႁူဝ်ႉ ပိၵ်ႉဝႆႉ ႁၢမ်ႈၶဝ်ႈၼၼ်ႉယဝ်ႉ” ဝႃႈၼႆ။
ၵူၼ်းမိူင်း ဢၼ်ၸိူဝ်းပွၵ်ႉမိူင်းထႆး၊ မိူင်းၶႄႇမႃး တေလႆႈယူႇဝႆႉ ၼွၵ်ႈဝၢၼ်ႈ တႃႇၶၢဝ်းတၢင်းႁိုင် 14 ဝၼ်း ၸင်ႇတေ လႆႈၶဝ်ႈဝၢၼ်ႈ ဝႃႈၼႆ။
ၸၢႆးဢွင်ႇၶမ်း လၢတ်ႈဝႃႈ “ မၢင်ၵေႃႉ ၵူၼ်းဢၼ်ပွၵ်ႈမိူင်းထႆးမႃး ၸိူဝ်းမီးတၢင်းႁူႉၵေႃႈ ဢွၼ်ၵၼ်ယူႇတၢင်းၼွၵ်ႈဝၢၼ်ႈ ၸွမ်းထဵင်ဝႆႉသေ ပႆႇၵိုင်ႉၵၢင်ႉၶဝ်ႈဝၢၼ်ႈၵမ်းလဵဝ်။ ယူႇတီႈပီႈၼွင်ႉၽႂ်မၼ်းၵေႃႈဢဝ်ၶဝ်ႈၵႂႃႇသူင်ႇပၼ် ႁဵတ်းၼၼ်ႉ။ သင် ဝႃႈ တဵမ် 14 ဝၼ်း ၵူၼ်းၸိူဝ်းပွၵ်ႈမႃးၼၼ်ႉ ဢမ်ႇပဵၼ်သင်ၼႆ ၸင်ႇတေပၼ်ၶႂၢင်ႉၶဝ်ႈဝၢၼ်ႈၶႃႈဢေႃႈ။ သင်ဝႃႈ တဵမ် 14 ဝၼ်း မိူၼ်ပဵၼ် တၢင်းပဵၼ် ဢွၵ်ႇၾၢင်ႁၢင်ႈမႃး ႁဝ်းၶႃႈႁၢင်ႈႁႅၼ်းဝႆႉ ၸုမ်းမေႃယႃသေ တေၵႂႃႇဢဝ်တူဝ်သူင်ႇပၼ်ႁူင်း ယႃၵမ်းလဵဝ်” ဝႃႈၼႆ။
ၼွၵ်ႈလိူဝ်ၼၼ်ႉ ၵူၼ်းၼႂ်းဝၢၼ်ႈၵေႃႈ ႁိူၼ်းၼိုင်ႈလႄႈ ႁိူၼ်းၼိုင်ႈ ဢမ်ႇပၼ်ဢႅဝ်ႇလႄႇၵၼ် ႁႂ်ႈယူႇႁိူၼ်းၽႂ်ႁိူၼ်းမၼ်းၵူၺ်းဝႃႈၼႆ။
“ လွင်ႈၵႅတ်ႇၶႄႁႄႉၵင်ႈၼႆႉ တႃႇႁႄႉၵင်ႈတၢင်းပဵၼ် ၼင်ႇႁိုဝ် တေဢမ်ႇမႃးၽႄႈပၼ်ၵူၼ်းၼႂ်းမူႇဝၢၼ်ႈႁဝ်းၵူၺ်းၶႃႈ။ ထႅင်ႈ ၾၢႆႇၼိုင်ႈၵေႃႈ ၵူၼ်းၼႂ်းဢိူင်ႇၼွင်လႅင်ႁဝ်းၶႃႈၼႆႉ ၵူၼ်းၵႂႃႇႁဵတ်းၵၢၼ်မိူင်းထႆးၵေႃႈၼမ်။ ဢၼ်ပွၵ်ႈမႃးၵေႃႈၼမ်” ၸၢႆး ဢွင်ႇၶမ်း လၢတ်ႈၼႄၼင်ႇၼႆ။
ၼႂ်းဢိူင်ႇၼွင်လႅင်ၼႆႉ တင်းမူတ်းမီး ဝၢၼ်ႈၵူၼ်း 31 ဝၢၼ်ႈ။ လွင်ႈဢိုတ်း/ ပိၵ်ႉတၢင်းၶဝ်ႈဢွၵ်ႇ ဝၢၼ်ႈၼွင်လႅင်ၼႆႉ တိုၵ်ႉ တႄႇႁဵတ်းမိူဝ်ႈၼႆႉၵႂႃႇ။ တၢင်းဝၢၼ်ႈၵေႃႈ တေသိုပ်ႇႁဵတ်းၵႂႃႇထႅင်ႈယူႇ ဝႃႈၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ