ႁွင်ႈၵၢၼ်ပၢႆးယူႇလီလႄႈ ၾၢႆႇလဵၼ်ႈႁႅင်း ပိုၼ်ၽၢဝ်ႇဝႃႈ ၼႂ်းမိူင်းႁူမ်ႈတုမ် ထူပ်းႁၼ် ၵူၼ်းၸပ်းတၢင်းပဵၼ်ၶူဝ်ႊဝိတ်ႉ 19 ထႅင်ႈ 2 ၵေႃႉႁူမ်ႈၵၼ်မီး5 ၵေႃႉယဝ်ႉဝႃႈၼႆ။
ဝၼ်းတီႈ 27/3/2020 ယၢမ်းၵၢင်ၼႂ်ၸဝ်ႉ 1:45 မူင်းၼၼ်ႉ ယူႇတီႈႁွင်ႈၵၢၼ် ပၢႆးယူႇလီလႄႈ ၾၢႆႇလဵၼ်ႈႁႅင်း ၼႂ်းမိူင်းႁူမ်ႈ တုမ် ပိုၼ်ၽၢဝ်ႇပဵၼ်တၢင်းၵၢၼ်ဝႃႈ ၵူတ်ႇထတ်းထူပ်းႁၼ် ၵူၼ်းၸပ်းတၢင်းပဵၼ်ၶူဝ်ႊဝိတ်ႉ 19 ထႅင်ႈ 2 ၵေႃႉ။ တေႃႈလဵဝ် ၵူၼ်းၸပ်းတၢင်းပဵၼ်ၶူဝ်ႊဝိတ်ႉ 19 ၼႆႉ မီးၵႂႃႇ 5 ၵေႃႉယဝ်ႉ ဝႃႈၼႆ။
ၵူၼ်းၸပ်းတၢင်းပဵၼ်ၶူဝ်ႊဝိတ်ႉ 19 ထႅင်ႈ 2 ၵေႃႉၼႆႉ ၵေႃႉၼိုင်ႈ မီးဢႃယု 33 ပီ လုၵ်ႉမိူင်းဢမေႊရိၵၼ်ႊ မႃး ယၢမ်းလဵဝ်မီးတီႈႁူင်းယႃ ၵၢၼ်ႇတေႃႇၼတီႇ (ကန်တော်နဒီ) ဝဵင်းလိူဝ်ႇ ၊ ထႅင်ႈၵေႃႉၼိုင်ႈ ဢႃယု 69 ပီ လုၵ်ႉမိူင်းဢေႃးသတေးလျႃး လႄႈ မိူင်းသိင်ႊၵပူဝ်ႊမႃး ယၢမ်းလဵဝ်မီးတီႈႁူင်းယႃလူင်တႃႈၵုင်ႈ ။ တင်းသွင်ၵေႃႉၼႆႉ ၶဝ်ႈႁူင်းယႃ မိူဝ်ႈဝၼ်းတီႈ 25/3/2020 ၼၼ်ႉမိူၼ်ၵၼ်။
တီႈမိူင်းႁူမ်ႈတုမ်ၼႆႉ မိူဝ်ႈဝၼ်းတီႈ 23/3/2020 ၼၼ်ႉၵေႃႈ ၵူတ်ႇထတ်းၺႃးၵူၼ်းၸပ်းမႅင်း 2 ၵေႃႉ ယၢမ်းလဵဝ်ႈ မီးတီႈႁူင်းယႃ တီးတဵင်ႇ ၸႄႈမိူင်းၶျၢင်း ၵေႃႉၼိုင်ႈလႄႈ မီးတီႈႁူင်းယႃ ဝေႇပႃႇၵီႇ တႃႈၵုင်ႈ ၵေႃႉၼိုင်ႈ ပၼ်ၵူၼ်းလုၵ်ႉမိူင်းဢမေႊရိၵၼ်ႊလႄႈ မိူင်းဢိၼ်ႇၵလၼ်ႇ ပွၵ်ႈမႃးၶိုၼ်းဝႃႈၼႆ။
ထိုင်မႃး ဝၼ်းတီႈ 24/3/2020 သမ်ႉ ထူပ်းႁၼ်ထႅင်ႈတီႈႁူင်းယႃ ၸႄႈဝဵင်းဢိၼ်းၸဵင်ႇ တိူင်ႈတႃႈၵုင်ႈ ထႅင်ႈၵေႃႉၼိုင်ႈ ပဵၼ်ၽူႈၸၢႆး ဢႃယု 26 ပီ လုၵ်ႉမိူင်းဢိၼ်ႇၵလၼ်ႇမႃးၼင်ႇၵဝ်ႇ ဝႃႈၼႆ။
တေႃႈလဵဝ် ၼႂ်းမိူင်းႁူမ်ႈတုမ် ဢၼ်ၵူတ်ႇထတ်းထူပ်းႁၼ် ၵူၼ်းၸပ်းတၢင်းပဵၼ် တင်းမူတ်းမီး 5 ၵေႃႉ၊ ပႂ်ႉတူၺ်း 322 ၵေႃႉ လႄႈ ၵူၼ်းဢၼ်သူင်ႇလိူတ်ႇၵႂႃႇၵူတ်းထတ်းဝႆႉသေ ပႂ်ႉၵႂၢမ်းတွပ်ႇသမ်ႉမီး 20 ၵေႃႉ ဝႃႈၼႆ။
ၸွမ်းၼင်ႇ ၸုမ်းပၵ်းတႃပႂ်ႉတူၺ်းႁူဝ်ၵူၼ်းၼႂ်းလုမ်ႈၾႃႉ worldometer ပိုၼ်ၽၢဝ်ႇဝႆႉဝႃႈ မီးၵူၼ်းၸပ်းၸိူဝ်ႉမႅင်း 532,263 ၵေႃႉ။ တၢႆ 24,090 ၵေႃႉ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ