ၼႂ်းပီ 2018 ၼႆႉႁူဝ်ပဝ်ႈပႃႇတီႇသိူဝ်ၽိူၵ်ႇ တူၵ်းပုၼ်ႈၽွၼ်းႁပ်ႉတၼ်းႁဵင်း ၽူႈၼင်ႈၸိုင်ႈ ၵေႃပွင်ၵၢၼ်ၽွမ်ႉႁူမ်ႈၸိုင်ႈတႆး CSSUလႄႈ လုင်းၸၢႆးဢၢႆႈပဝ်းလၢတ်ႈဝႃႈ တူဝ်ႈတၼ်းတႃႇ ႁပ်ႉတၼ်းႁဵင်းယဝ်ႉ ဝႃႈၼႆ။

CSSU ၼႆႉၼိုင်ႈပီ ၼိုင်ႈပွၵ်ႈပိၼ်ႇလႅၵ်ႈတၼ်းႁဵင်းၽူႈၼင်ႈၸိုင်ႈ မိူဝ်ႈပီ 2016 တူၵ်းပုၼ်ႈ ၽွၼ်းသေတႃႉဢမ်ႇႁပ်ႉလႆႈ။ ႁူဝ်ပဝ်ႈၵေႃႁူမ်ႈသၢင်ႈၸိုင်ႈတႆး SSJAC ၸဝ်ႈၶုၼ်ထုၼ်းဢူး လႆႈႁပ်ႉတႅၼ်း။ ႁွပ်ႈၼႆႉတႄႉလုင်းၸၢႆးဢၢႆႈပဝ်းမွၵ်ႇလၢတ်ႈဝႃႈ တူဝ်ႈတၼ်းယဝ်ႉ ဝႃႈၼႆ။

“ ပေႃးပၢင်ၵုမ်ၼႆႉႁဝ်းတေလႆႈႁပ်ႉပဵၼ်ႁူဝ်ပဝ်ႈ CSSU ယဝ်ႉ ၵမ်းၼႆႉပဵၼ်ၵမ်းႁဝ်းယဝ်ႉလူး ။ ပေႃးႁဝ်းပဵၼ်ႁူဝ်ပဝ်ႈတႄႉ ၼင်ႇႁိုဝ်တေဢမ်ႇမီးပၼ်ႁႃ တေႁဵတ်းၵၢၼ်ႁႂ်ႈငၢႆႈလူမ်ၼၼ်ႉ ႁဝ်းတေၶဝ်ႈႁႃတီႈလူင်ပွင်ၸိုင်ႈ၊ တီႈတပ်ႉသိုၵ်းမၢၼ်ႈသေ ႁဵတ်းၵႂႃႇႁႂ်ႈပေႃးၶႅမ်ႉလႅပ်ႈ” လုင်းၸၢႆးဢၢႆႈပဝ်း လၢတ်ႈၼင်ႇၼႆ။

မိူဝ်ႈပီၵၢႆ ၽွင်းသိုၵ်းလူင်ပွင်ၸိုင်ႈမၢၼ်ႈ တႄႇႁၢမ်ႈဢမ်ႇပၼ်တႆးႁဵတ်းပၢင်ၵုမ် ၵၢၼ်မိူင်း ၸၼ်ႉၸိူဝ်ႉၸၢတ်ႈတႆး တီႈဝဵင်းလူင်တူၼ်ႈတီးၼၼ်ႉ လုင်းၸၢႆးဢၢႆႈပဝ်းယၢမ်ႈလၢတ်ႈဝႃႈ သင်ပဵၼ်ႁူဝ်ပဝ်ႈ တေဢွၼ်ၸတ်းႁဵတ်းတီႈတူၼ်ႈတီးႁႂ်ႈလႆႈ – ဝႃႈၼႆ။

တႃႇပႃႇတီႇတႆးတေႁူမ်ႈၵၼ်လႆႈၼႆသေ မိူဝ်ႈဝၼ်းတီႈ 16/01/2018 ၼၼ်ႉ ဢွၵ်ႇလိၵ်ႈပိုၼ် ၽၢဝ်ႇ လွင်ႈဝႃႈၶွတ်ႇၽွတ်ႈဝႆႉ “ ၵေႃငူပ်ႉငီႉပွင်ၵၢၼ်တွၼ်ႈတႃႇပႃႇတီႇႁူမ်ႈႁွမ်းၵၼ် ” ။

ၸၢႆးဢၢႆႈပဝ်း ႁူဝ်ပဝ်ႈပႃႇတီႇသိူဝ်ႇၽိူၵ်ႇ SNDP လၢတ်ႈဝႃႈ – “ၵၢၼ်ၽွမ်ႉႁူမ်ႈၼႆႉ ပဵၼ်ဢၼ် ၵူၼ်းမိူင်းႁဝ်းၶႂ်ႈလႆႈၶႂ်ႈပဵၼ် ပေႃးထိုင် 2020 မႃးၼႆႉပႃႇတီႇတႆးထုၵ်ႇလီပေႉၼမ် ပေႃးႁဝ်း ပေႉၼမ်ယဝ်ႉၸင်ႇတေမီးသုၼ်ႇလႆႈ ၸတ်းပွင်တႃႇယုၵ်ႉမုၼ်းလွင်ႈယူႇလွင်ႈၵိၼ်ၵူၼ်းမိူင်း တႃႇႁႂ်ႈၵူၼ်းမိူင်းတေယူႇလီ၊ ၵိၼ်လီ၊ ၸၢင်ႈႁဵတ်းၵၢၼ်လႆႈလီလီလႄႈ တႃႇႁႂ်ႈဝၢၼ်ႈမိူင်းၶိုၼ်ႈ ယႂ်ႇၼၼ်ႉ ႁဝ်းလူဝ်ႇပဵၼ်လူင်ပွင်ၸိုင်ႈၵူၺ်း ” ဝႃႈၼႆ။

ဝၼ်းတီႈ 01-02/02/2018 တေမႃးၼႆႉ ၵေႃပွင်ၵၢၼ်ၽွမ်ႉႁူမ်ႈၸိုင်ႈတႆး Committee for Shan State Unity (CSSU) တေၸတ်းႁဵတ်းပၢင်ၵုမ် တီႈငဝ်ႈၸိုင်ႈလွႆတႆးလႅင်း တေထတ်းသၢင်ၶိုၼ်း လွင်ႈၼႃႈၵၢၼ်တႃငၢၼ်း ဢၼ်လႆႈ ႁဵတ်းသၢင်ႈတူင်ႉၼိုင်မႃးလႄႈ တေမွပ်ႈဢၢပ်ႈတၼ်းႁဵင်းႁူဝ် ပဝ်ႈၵေႃႉမႂ်ႇ ။

CSSU ၼႆႉ ၵေႃႇတင်ႈမႃးမိူဝ်ႈပီ 2013 မီးလုၵ်ႈၸုမ်း ၸိူဝ်းပဵၼ်တပ်ႉသိုၵ်းၸိုင်ႈတႆး ပွတ်းႁွင်ႇ၊ ပွတ်းၸၢၼ်း ၊ သိုၵ်းၵူၼ်းမိူင်း( သႅင်ၵႅဝ်ႉ ) ပႃႇတီႇၵၢၼ်မိူင်းႁူဝ်သိူဝ်/ သိူဝ်ၽိူၵ်ႇ၊ ၵွင်ၸႆး၊ ၸုမ်းတူင်ႇ ဝူင်းတႆး ၶဝ်ႈႁူမ်ႈဝႆႉဢမ်ႇယွမ်း 10 ၸုမ်း။