ႁၢၼ်ႉၶၢႆတၢင်းၵိၼ်တၢင်းယမ်ႉ၊ ႁၢၼ်ႉၶၢႆၶဝ်ႈၽၵ်းလႄႈ ဢွင်ႈတီႈၵူၼ်းၸၢင်ႈၸူႉတုမ်ၵၼ်ၼမ်ၼၼ်ႉ ပႃႇတီႇမႂ်ႇသုင် ၸိုင်ႈတႆးတပ်ႉသိုၵ်းၸိုင်ႈတႆး သင်ႇႁႂ်ႈဢိုတ်း/ ပိၵ်ႉ ၵူဝ်တၢင်းပဵၼ်ဝူႊႁၢၼ်ႉ ဢမ်ႇၼၼ် ၶူဝ်ႊဝိတ်ႉ 19 ၽႄႈ ၸပ်း ၵူၼ်းမိူင်းၼမ် ဝႃႈၼႆ။
ဝၼ်းတီႈ 24/3/2020 ယူႇတီႇ ပႃႇတီႇမႂ်ႇသုင်ၸိုင်ႈတႆး/ တပ်ႉသိုၵ်းၸိုင်ႈတႆး SSPP/SSA ၸီႉသင်ႇ ႁႂ်ႈဢိုတ်း/ ပိၵ်ႉႁၢၼ်ႉၶၢႆ ၶဝ်ႈၽၵ်း၊ ၶဝ်ႈသွႆး ၼႂ်းဝၢၼ်ႈႁႆး ငဝ်ႈငုၼ်း SSPP/SSA ။
ၵူၼ်းၼုမ်ႇ ဝၢၼ်ႈႁႆး ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ “ တႄႇဢဝ်မိူဝ်ႈၼႆႉၵႂႃႇ ႁႂ်ႈဢိုတ်း/ ပိၵ်ႉပၼ်မူတ်းမူတ်း ပႃးၸဵမ် ႁၢၼ်ႉၼိူဝ်ႉယၢင်ႈ ႁၢၼ်ႉတၢင်းၵိၼ်ယွႆႈၸိူဝ်းၼႆႉ။ လွင်ႈပိၵ်ႉႁၢၼ်ႉၼႆႉ တေဝႆႉၶၢဝ်းတၢင်း တႃႇ ႞ လိူၼ်။ သင်ဝႃႈ ႞ လိူၼ် တဵမ်ယဝ်ႉလႄႈ ငဝ်းလၢႆးပၢႆႇလီၼႆၵေႃႈ တေၸၢင်ႈသိုပ်ႇတိူဝ်းၵႂႃႇထႅင်ႈယူႇ” ဝႃႈၼႆ။
ၼွၵ်ႈလိူဝ်ၼၼ်ႉ တီႈဢႅဝ်ႇယဵမ်ႈမိူၼ်ၼင်ႇ ၼမ်ႉတူၵ်းတၢတ်ႇႁၢႆးပႃၵေႃႈ သင်ႇႁႂ်ႈဢိုတ်း/ ပိၵ်ႉဝႆႉ ၸူဝ်ႈၶၢဝ်း ဝႃႈၼႆ။
မိူဝ်ႈဝၼ်းတီႈ 14/3/2020 ၼၼ်ႉၵေႃႈ ယူႇတီႈ SSPP/SSA ဢွၵ်ႇလိၵ်ႈပိုၼ်ၽၢဝ်ႇ ၾၢင်ႉထိုင် ပေႃႈမႄႈၵူၼ်းမိူင်း ၽူႈၵွၼ်း တပ်ႉ/ လုၵ်ႈတပ်ႉ ဝႃႈ ၼင်ႇႁိုဝ် တၢင်းပဵၼ်ၶူဝ်ႊဝိတ်ႉ-19 ၼႆႉ တေဢမ်ႇၽႄႈတိူၼ်းၽႅဝ်ထိုင် တေဢမ်ႇၸပ်းမႅၼ်ႈ ၼႂ်း ၼႃႈႁေႃတေႃႁိူၼ်း ပေႃႈမႄႈၵူၼ်းမိူင်း ၼႂ်းတပ်ႉ/ ၼႂ်းႁွင်ႈၵၢၼ်ၼၼ်ႉ ထုၵ်ႇလီၾၢင်ႉယူႇၾၢင်ႉၵိၼ် ၸဵမ်ၸိူဝ်းၼႆႉ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ