ဢိင်ၼိူဝ်ငဝ်းလၢႆး တၢင်းၾင်ႇမိူင်းထႆး ၶိုၵ်ႉၶၵ်ႉသေ ၽၵ်းတူ လၢၼ်ႇ/ ၵဵတ်ႇၸွမ်းလႅၼ်လိၼ်ထႆး လူင်ပွင်ၸိုင်ႈမိူင်းထႆးသင်ႇႁႂ်ႈဢိုတ်းပႅတ်ႈမူတ်းမူတ်း။
တီႈၶူဝ်မိုတ်ႈၵိုဝ်းမၢႆ 1 လႅၼ်လိၼ်တႆး – ထႆး (တႃႈၶီႈလဵၵ်း – မႄႈသၢႆ) ၼၼ်ႉၵေႃႈ ပၼ်ၵူၼ်းမိူင်းၸိူဝ်းယိပ်းပတ်ႉသပွတ်ႇ ဝီႊသႃႊပဵၼ်တၢင်းၵၢၼ်ၶၢမ်ႈမိူဝ်းတႃႈၶီႈလဵၵ်းတေႃႇထိုင်မိူဝ်ႉၼႆႉ ဝၼ်းတီႈ 24/3/2020 ယၢမ်းႁူဝ်ၶမ်ႈ 5 မူင်းၵူၺ်းယဝ်ႉ – ဝႃႈၼႆ။
ဢူးထုၼ်း (မႄႈသၢႆ) ၽူႈၼင်ႈလုမ်းၵပ်းသၢၼ် မိူင်းမၢၼ်ႈ – ထႆး ၸႄႈတွၼ်ႈတႃႈၶီႈလဵၵ်း လၢတ်ႈတီႈၽူႈတွႆႇႁွၵ်ႈဝႃႈ “ ယွၼ်ႉငဝ်းလၢႆးၶိုၵ်ႉၶၵ်ႉသေ တၢင်းၾင်ႇမိူင်းထႆးတႄႉ မိူဝ်ႈၽုၵ်ႈတေဢမ်ႇပၼ်ၵူၼ်းမိူင်းႁူမ်ႈတုမ်/ ႁႅင်းၵၢၼ် ၶၢမ်ႈၶူဝ်မိူဝ်းတၢင်းတႃႈၶီႈလဵၵ်းယဝ်ႉ ။ ၶၢမ်ႈလႆႈတေႃႇထိုင်မိူဝ်ႈၼႆႉ ယၢမ်းႁူဝ်ၶမ်ႈ 5 မူင်း ၵူၺ်း ။ ယၢမ်းလဵဝ် ဝၢႆးလင် 5 မူင်းၼႆႉ တၢင်းၾင်ႇထႆးဢိုတ်းၽၵ်းတူတႄႉယဝ်ႉ” ဝႃႈၼႆ။
ၶူဝ်လႅၼ်လိၼ် တႃႈၶီႈလဵၵ်း – မႄႈသၢႆၼႆႉ ၾၢႆႇထႆးသင်ႇပိၵ်ႉဢိုတ်းၸဵမ်မိူဝ်ႈဝၼ်းတီႈ 23/3/2020 ဢမ်ႇပၼ်ၵူၼ်းၶၢမ်ႈၵႂႃႇမႃး။ တေ ပိုတ်ႇပၼ်ၶိုၼ်းမိူဝ်ႈလႂ်ယင်းပႆႇႁူႉ။ ၵူၺ်းၵႃႈ ႁႅင်းၵၢၼ်ၸိူဝ်း ၵႂႃႇႁဵတ်းၵၢၼ်တီႈ တၢင်ႇၸႄႈဝဵင်း တီႈၵႆၸိူဝ်းၼၼ်ႉ မႃးဢမ်ႇတၼ်းၶိုၼ်းလႄႈ ဝၼ်းတီႈ 23 ယၢမ်းၵၢင်ၼႂ်ၼၼ်ႉ ၶၢင်ႉၶမ်ဝႆႉတီႈႁူဝ်ၶူဝ်မႄႈသၢႆ မွၵ်ႈ 200 ၵေႃႉ။ ဝၼ်းတီႈ 24 ၵၢင် ၼႂ်ၵေႃႈႁွတ်ႈထိုင်ထႅင်ႈတီႈႁူဝ်ၶူဝ် 199 ၵေႃႉ။ ၸဝ်ႈၼႃႈတီႈသွင်ၾင်ႇၸိုင်ႈမိူင်းဢုပ်ႇၵုမ်လႆႈၸႂ်ၵၼ်သေ သူင်ႇၸိူဝ်းၶဝ် ပွၵ်ႈၶိုၼ်းတႃႈၶီႈလဵၵ်းယဝ်ႉ။
ဢမ်ႇပၼ်ၵူၼ်းၶဝ်ႈဢွၵ်ႇၶၢမ်ႈလႅၼ်လိၼ်ၼႆသေတႃႉ တွၼ်ႈတႃႇၶူဝ်းၵုၼ်ႇတႄႉ တေသူင်ႇပၼ်တၢင်းၶူဝ်မၢႆ 2 ၼၼ်ႉယူႇ ဝႃႈၼႆ။
တေႃႈလဵဝ် လူင်ပွင်ၸိုင်ႈမိူင်းထႆး ပိုၼ်ၽၢဝ်ႇဝႃႈ ၼႂ်းမိူင်းထႆး ၵူၼ်းၸပ်းတၢင်းပဵၼ် ၶူဝ်ႊဝိတ်ႉ 19 တင်းမူတ်းမီးၵႂႃႇ 872 ၵေႃႉလႄႈ လူႉတၢႆၵႂႃႇယဝ်ႉ 4 ၵေႃႉ ။
ၼွၵ်ႈလိူဝ်ၼၼ်ႉ တၢင်းမိူင်းႁူမ်ႈတုမ်ၵေႃႈ ယူႇတီႈႁွင်ႈၵၢၼ်ပၢႆးယူႇလီလႄႈ ၾၢႆႇလဵၼ်ႈႁႅင်း ပိုၼ်ၽၢဝ်ႇ မိူဝ်ႈဝႃး ဝၼ်းတီႈ 23/3/2020 ယၢမ်းၵၢင်ၶိုၼ်း 11:45 မူင်းဝႃႈ မီးၵူၼ်းၸပ်းတၢင်းပဵၼ်ၶူဝ်ႊဝိတ်ႉ 19 ၽူႈၸၢႆး 2 ၵေႃႉ ဝႃႈၼႆ။
မိူဝ်ႈဝႃး ဝၼ်းတီႈ 23/3/2020 ႁႅင်းၵၢၼ် 92 ၵေႃႉ ဢၼ်ထုၵ်ႇပလိၵ်ႈထႆးသူင်ႇတူဝ်မွပ်ႈပၼ်တၢင်းတႃႈၶီႈလဵၵ်းၼၼ်ႉ ၼႂ်း 92 ၵေႃႉၼၼ်ႉ ၵူတ်ႇထတ်းထူပ်းႁၼ် မိူၼ်ၾၢင်ႁၢင်ႈၵူၼ်းၸပ်းတၢင်းပဵၼ် 11 ၵေႃႉဝႆႉ ဝႃႈၼႆ။
ဢူးမိၼ်ႉၼၢႆႇ ၽူႈၵွၼ်းၸႄႈတွၼ်ႈတႃႈၶီႈလဵၵ်း လၢတ်ႈဝႃႈ “ မိူဝ်ႈဝႃးမီး 11 ၵေႃႉ မိူဝ်ႈၼႆႉၼႂ်းဢၼ်ပ်ႂႉတူၺ်း 81 ၵေႃႉၼၼ်ႉသမ်ႉ မီးလူမ်းမႆႈႁၢဝ်ႈႁႅင်းထႅင်ႈ 1 ၵေႃႉလႄႈ လႆႈယႅၵ်ႈဢဝ်မႃးပႂ်ႉတူၺ်းငဝ်းလၢႆးဝႆႉ” ဝႃႈၼႆ။
ၵူၼ်းမိူင်းပိုၼ်ႉတီႈ တႃႈၶီႈလဵၵ်း ၵူႈၵေႃႉ သင်ဢမ်ႇမီးၵၢၼ်လမ်ႇလွင်ႈသင် ယႃႇပေၵႂႃႇတၢင်းလႂ် ႁႂ်ႈယူႇဝႆႉၼႂ်းႁိူၼ်းၽႂ်မၼ်း ။ ယႃႇပေဢွၵ်ႇတၢင်းၵႂႃႇတၢင်ႇတီႈတၢင်ႇဝဵင်း ယူႇတီႈဢူးမိၼ်ႉၼၢႆ ၽူႈၵွၼ်းၸႄႈတွၼ်ႈ တႃႈၶီႈလဵၵ်း တိုၵ်းသူၼ်း လၢတ်ႈ ၼႄၼင်ႇၼႆ။
