ၸဝ်ႈၼႃႈတီႈၽူႈမီးပုၼ်ႈၽွၼ်းၸႄႈဝဵင်းတႃႈၶီႈလဵၵ်းပိုၼ်ၽၢဝ်ႇဝႃႈ ၵူၼ်းၵႃႉၵူၼ်းၶၢႆၶူဝ်းၵုၼ်ႇၼႂ်းၸႄႈဝဵင်းတႃႈၶီႈလဵၵ်း တေဢမ်ႇလႆႈၶိုၼ်ႈၶၼ်ၶူဝ်းၵုၼ်ႇသုင် သင်ဝႃႈထူပ်းႁၼ်တေထုၵ်ႇ ဢဝ်လိူင်ႈ ၸွမ်းၼင်ႇမၢႆမီႈတမ်းဝၢင်းဝႆႉၼၼ်ႉ။

ဝၼ်းတီႈ 23/3/2020 ယူႇတီႈၶွမ်ႊမတီႊၸတ်းၵၢၼ် ၸႄႈတွၼ်ႈတႃႈၶီႈလဵၵ်း ဢွၵ်ႇလိၵ်ႈပိုၼ်ၽၢဝ်ႇဝႃႈ ၽွင်းပိၵ်ႉ ဢိုတ်း ၽၵ်းတူလၢၼ်ႇလႄႈ ၽွင်းၶၢဝ်းၵႅတ်ႇၶႄႁႄႉၵင်ႈတၢင်းပဵၼ်ဝူႊႁၢၼ်ႉ (ၶူဝ်ႊဝိတ်ႉ -19) ၼႆႉၼၼ်ႉ သင်ဝႃႈ ၵူၼ်းၶၢႆ ႁၢၼ်ႉ၊ ၶၢႆၵုၼ်ႇ ၼႂ်းၸႄႈဝဵင်းတႃႈၶီႈလဵၵ်း ၸိုင်ႈတႆးပွတ်းဢွၵ်ႇၶူင်း ၶၢႆၵုၼ်ႇၵႃႈၶၼ်သုင် ၸိုင် တေဢဝ်လိူင်ႈပၼ်တူတ်ႈ တၢမ်ႇၵႂႃႇ ဝႃႈၼႆ။

တႃႇတေၵုမ်းတၢင်းပဵၼ်ၶူဝ်ႊဝိတ်ႊ 19 ယႃႇႁႂ်ႈၽႄႈလၢမ်းတိတ်းၸပ်းၵၼ်ၼမ် ယႃႇႁႂ်ႈမီးၵူၼ်းလူႉတၢႆၼမ်ၼႆသေ ဝၼ်းတီႈ 23/3/2020 ပူၼ်ႉမႃးၼႆႉ ၸဝ်ႈၼႃႈတီႈတၢင်း ၾင်ႇမိူင်းထႆးလႄႈ မိူင်းႁူမ်ႈတုမ် လႆႈဢိုတ်းၽၵ်းတူ မိုတ်ႈၵိုဝ်း ၶူဝ်မၢႆ 1 လႅၼ်လိၼ်တႆး – ထႆးဝႆႉၸူဝ်ႈၶၢဝ်း။ တေပိုတ်ႇၶိုၼ်းမိူဝ်ႈလႂ် ပႆႇၸၢင်ႈလၢတ်ႈ။ ယွၼ်ႉၼၼ် ၵူၼ်းမိူင်း ႁိပ်ႈၼႅတ်ႈႁႃသိုဝ်ႉၶူဝ်းၶွင်ၵိၼ်ယမ်ႉဝႆႉႁင်းၽႂ်မၼ်း။ ၵွပ်ႈၼႆၾၢႆႇဢုပ်ႇပိူင်ႇတႃႈၶီႈလဵၵ်းၸင်ႇမီးလိၵ်ႈပိုၼ်ၽၢဝ်ႇဝႃႈ တေဢမ်ႇလႆႈယုၵ်ႉၵႃႈၶၼ်ၶူဝ်းၵုၼ်ႇၶိုၼ်ႈသုင်တေႃႇၵူၼ်းမိူင်း၊ တေလႆႈၶၢႆၵႃႈၶၼ်မိူၼ်ၵဝ်ႇၵူႈပွၵ်ႈၵူၺ်း ဝႃႈၼႆ။

လိူဝ်ၼၼ်ႉ တွၼ်ႈတႃႇ လွင်ႈပၢႆးယူႇလီၵူၼ်းမိူင်း၊ လွင်ႈၵိၼ်ယမ်ႉၵူၼ်းမိူင်းပေႃးတေ ဢမ်ႇႁူပ်ႉထူပ်းလွင်ႈယၢပ်ႇၽိုတ်ႇ ၼၼ်ႉ ယူႇတီႈလူင်ပွင်ၸိုင်ႈ တၢင်းသွင်မိူင်း ဢုပ်ႇဢူဝ်းၵၼ်သေ တၢင်းၾင်ႇမိူင်းထႆး တေတေႃႉ ၼမ်ႉမၼ်းရူတ်ႉ၊ ၶူဝ်းၵုၼ်ႇ၊ ၶွင်ၵိၼ် ၸိူဝ်းၼႆႉ တေႃႉသူင်ႇၶဝ်ႈ ပၼ်တၢင်းၶူဝ်မိုတ်ႈၵိုဝ်းမၢႆ 2 ဝႃႈၼႆ။

ၼႂ်းလိၵ်ႈပိုၼ်ၽၢဝ်ႇၼၼ်ႉ ယင်းပၼ်ၾၢင်ႉတုၵ်းသူၼ်းပႃးဝႃႈ – ယိင်ႈဢွၼ်ၵၼ်တိုၼ်ႇသၢၼ်ႈႁႃသိုဝ်ႉၶူဝ်းၶွင်ၵိၼ်ဝႆႉၼမ် ယိင်ႈႁဵတ်းႁႂ်ႈ ၵူၼ်းၶၢႆၵုၼ်ႇၶႂ်ႈၶိုၼ်ႈၵႃႈၶၼ်ၶၢႆလႄႈ ႁႂ်ႈၵူၼ်းမိူင်းဝႆႉသတိယႂ်ႇၼမ် -ဝႃႈၼႆ။