ပလိၵ်ႈထႆး သူင်ႇတူဝ်ႁႅင်းၵၢၼ်မိူင်းႁူမ်ႈတုမ် 92 ၵေႃႉ ပၼ်ၸဝ်ႈၼႃႈတီႈတၢင်းတႃႈၶီႈလဵၵ်း ၼႂ်းၼၼ်ႉ တႃႇ 11 ၵေႃႉ မီး လူမ်းမႆႈသုင်လႄႈတိုၵ်ႉသူင်ႇတူဝ်ဝႆႉတီႈႁူင်းယႃ ပႂ်ႉတူၺ်း တၢင်းပဵၼ်ၶူဝ်ႊဝိတ်ႊ 19 ဢၼ်တင်းၼမ်ႁူႉၸၵ်းဝႃႈတၢင်းပဵၼ် ဝူႊႁၢၼ်ႉ။
ဝၼ်းတီႈ 23/3/2020 ၼႆႉ ယူႇတီႈပလိၵ်ႈထႆး ဢဝ်တူဝ်ႁႅင်းၵၢၼ် မွပ်ႈပၼ်တၢင်းၾင်ႇ တႃႈၶီႈလဵၵ်း တႃႇၵူၼ်း 92 ၵေႃႉ ဝႃႈ ၼႆ။
Dr. ၵျၼ်ႇယၼ်သႅတ်ႉ ၸုမ်းတူင်ႉၼိုင်ၸွႆႈထႅမ်တႃႇတၢင်းပဵၼ် ၶူဝ်ႊဝိတ်ႊ 19 လၢတ်ႈတီႈသိုဝ်ႇၶၢဝ်ႇ မႄႈၶၢဝ်ဝႃႈ “ ၵူၼ်းမိူင်း ႁူမ်ႈတုမ် 92 ၵေႃႉ ဢၼ်ပလိၵ်ႈထႆး သူင်ႇမွပ်ႈတူဝ်ၶဝ်ပၼ် တၢင်းၾင်ႇ တႃႈၶီႈလဵၵ်းၼႆႉ ပဵၼ်ၵူၼ်းပူၼ်ႉတူတ်ႈၶွၵ်ႈမႃး။ ၼႂ်းၼၼ်ႉ ၵူၼ်း 11 ၵေႃႉ မီးလူမ်းမႆႉသုင်လႄႈ ထုၵ်ႇၵုမ်းတူဝ်ဝႆႉပႂ်ႉတူၺ်းတၢင်းပဵၼ် ၶူဝ်ႊဝိတ်ႊ 19 ။ ၵိုတ်းထႅင်ႈ 81 ၵေႃႉ ၼၼ်ႉ ဢမ်ႇမီးလူမ်းမႆႈ။ ၵူၺ်းၵႃႈ ၵုမ်းတူဝ်ၶဝ်ဝႆႉၶၢဝ်းတၢင်း 14 ဝၼ်း တႃႇပႂ်ႉတူၺ်း ငဝ်းလၢႆး တၢင်းပဵၼ် ၶူဝ်ႊဝိတ်ႉ ၼင်ႇ ၵဝ်ႇ ” ဝႃႈၼႆ။
ၵဵဝ်ႇၵပ်းလွင်ႈၼႆႉ ယူႇတီႈၽူႈတွႆႇႁွၵ်ႈလႆႈၵပ်းသိုပ်ႇတွင်ႈထၢမ် တီႈၽူႈမီးပုၼ်ႈၽွၼ်းၾၢႆႇတႃႈၶီႈလဵၵ်းၵေႃႈ ဢမ်ႇႁပ်ႉသၢႆ ဝႃႈၼႆ။
ၵူၼ်း 11 ၵေႃႉၼၼ်ႉ သူင်ႇဝႆႉတီႈႁူင်းယႃတႃႈၶီႈလဵၵ်းသေ တႃႇ 81 ၵေႃႉၼၼ်ႉတႄႉ လႆႈယႅၵ်ႈသူင်ႇတူဝ်ဝႆႉတီႈႁူင်းႁေႃး (မိုးကုတ်ဝိပဿနာရိပ်သာ) ဝႃႈၼႆ။
