ၸဝ်ႈၼႃႈတီႈလႅၼ်လိၼ် မိူင်းမၢၼ်ႈ – မိူင်းထႆး တူၵ်းလူင်းၵၼ်ပိၵ်ႉဢိုတ်းၽၵ်းတူမိူင်း တီႈၶူဝ်မႄႈသၢႆတႃႈၶီႈလဵၵ်း ဝၼ်းမိူဝ်ႈၼႆႉ၊ ႁႅင်းၵၢၼ်ယၢၼ်မိူင်းၸိူဝ်းမႃးဢမ်ႇတၼ်းၶိုတ်း တႃႇၶၢမ်ႈၶူဝ် မီး 200 ပၢႆ ။
ထႆးပိုၼ်ၽၢဝ်ႇဝႃႈ တေပိၵ်ႉၽၵ်းတူမိူင်း ဝၼ်းတီႈ 23/3/2020 ၼႆသေ ပိၵ်ႉၵႂႃႇၸဵမ်မိူဝ်ႈတဵင်ႈၶိုၼ်းလႄႈ မိူဝ်ႈၼႆႉယၢမ်းၵၢင်ၼႂ် ၸဝ်ႉ ႁႅင်းၵၢၼ်ယၢၼ်မိူင်း ၸိူဝ်းလုၵ်ႉတၢင်ႇတီႈၶိုၼ်ႈမႃး ဢမ်ႇၶိုတ်းတၼ်း မႃးၶၢင်ႉၶမ်တီႈမႄႈသၢႆမီး 200 ပၢႆ။ၸဝ်ႈၼႃႈတီႈ တၢင်းသွင်ၾင်ႇ ဢုပ်ႇဢူဝ်းငူပ်ႉငီႉၵၼ် သေ ၵူတ်ႇထတ်းလူမ်းမႆႈယဝ်ႉ ၸင်ႇပၼ်ၶၢမ်ႈၶူဝ် သူင်ႇၶိုၼ်းမိူဝ်း ၾင်ႇတႃႈၶီႈလဵၵ်း လီငၢမ်းယဝ်ႉ ဝႃႈၼႆ။
ၸၢႆးၼုမ်ႇတုၺ်ႈ ႁူဝ်ပဝ်ႈပႃႇတီႇႁူဝ်သိူဝ် SNLD ၸႄႈဝဵင်းတႃႈၶီႈလဵၵ်း လၢတ်ႈတီႈၽူႈတွႆႇႁွၵ်ႈဝႃႈ “ ႁႅင်းၵၢၼ် ဢၼ်လုၵ်ႉတၢင်းမိူင်းထႆးသေ ဢွၵ်ႇမႃးတၢင်းၶူဝ် မႄႈသၢႆ – တႃႈၶီႈလဵၵ်းၼႆႉ ၵမ်းၼမ် ပဵၼ်ႁႅင်းၵၢၼ် ဢၼ်လုၵ်ႉ တၢင်းမိူင်းၵွၵ်ႇ(ၵုင်းထဵပ်ႈ)၊ ၵဵင်းမႆႇ၊ ၵဵင်းႁၢႆးလႄႈ ဢိၵ်ႇထႅင်ႈလၢႆလၢႆတီႈမႃး ” ဝႃႈၼႆ။
ယွၼ်ႉတၢင်းပဵၼ် ၶူဝ်ႊဝိတ်ႊ 19 လၢမ်းၽႄႈဝႆးသေ ၵူဝ်ၵူၼ်းမိူင်း တိတ်းၸပ်းၵၼ်၊ ၼင်ႇႁိုဝ် ပေႃးတေၵုမ်းထိင်းလႆႈ တၢင်းပဵၼ်ၼၼ်ႉၼႆသေ ၽူႈၵွၼ်းၸႄႈတွၼ်ႈၵဵင်းႁၢႆး မိူင်းထႆးၸီႉသင်ႇ ဢိုတ်း ၽၵ်းတူၶၢမ်ႈမိူင်း လႅၼ်လိၼ်တႆး – ထႆး (မႄႈသၢႆ – တႃႈၶီႈလဵၵ်း) ဢမ်ႇပၼ်ၵူၼ်းၵႂႃႇမႃးၶဝ်ႈဢွၵ်ႇ။ ၶူဝ်မၢႆ 2 လႆႈပိၵ်ႉဢိုတ်းၵႂႃႇမိူဝ်ႈဝၼ်းတီႈ 21/3/2020 ။ ၶူဝ်မၢႆ 1 တႄႉ သင်ႇဢိုတ်းဝၼ်းမိူဝ်ႈၼႆႉ 23/3/2020 ။ ၵူၺ်းၵႃႈ လွင်ႈၼမ်ႉမၼ်းရူတ်ႉ၊ ၶူဝ်းၵုၼ်ႇၵႃႉၶၢႆလႄႈ ၶွင်ၵိၼ်ယမ်ႉတႄႉ တေပၼ်တေႃႉၶဝ်ႈမႃးတၢင်းတႃႈၶီႈလဵၵ်း တီႈၶူဝ် မိုတ်ႈၵိုဝ်းမၢႆ 2 ၼၼ်ႉယူႇ။
ၼၢင်းႁွမ် ၵူၼ်းတႃႈၶီႈလဵၵ်း လၢတ်ႈတီႈၽူႈတွႆႇႁွၵ်ႈဝႃႈ “ လၢၼ်ႇတႄႉ တႄႇဢဝ် မိူဝ်ႈဝႃး ဝၼ်းတီႈ 22/3/2020 ယၢမ်းၵၢင် ၶမ်ႈ 8 မူင်းၶိုင်ႈ(ယၢမ်းမိူင်းမၢၼ်ႈ) ႁဝ်းၼႆႉ ၽၵ်းတူတၢင်းသွင်ၾၢႆႇတႄႇဢိုတ်းၵႂႃႇယဝ်ႉၶႃႈ။ မိူဝ်ႈဝႃးၼၼ်ႉ ၵူၼ်းတၢင်းၾင်ႇ တႃႈၶီႈလဵၵ်း ၼႅတ်ႈဢွၼ်ၵၼ်ၵႂႃႇသိုဝ်ႉၶူဝ်းၶွင်ၵိၼ် တၢင်းၾင်ႇမိူင်းထႆး မႃးဝႆႉၶႃႈ။ ၵူၼ်းဢၼ်ၶမ်ဝႆႉ တၢင်းၾင်ႇမႄႈသၢႆသေ ဢွၵ်ႇမႃးၵေႃႈၼမ်။ ၵူၼ်းတၢင်းတႃႈၶီႈလဵၵ်း ၸိူဝ်းလဵၼ်ႈၵႂႃႇသိုဝ်ႉၶူဝ်းၶွင် တၢင်းၾင်ႇမႄႈသၢႆ ၵေႃႈၼမ် မိူဝ်ႈဝႃး ဝၼ်းတီႈ 22 တႄႉ ၵူၼ်းၵိုၼ်းလူင်ဝႆႉၶႃႈယဝ်ႉ တီႈၶူဝ်ၶဝ်ႈဢွၵ်ႇၼႆႉ” ဝႃႈၼႆ။
ၶူဝ်မႄႈသၢႆ – တႃႈၶီႈလဵၵ်းၼႆႉ တႄႇဢဝ် မိူဝ်ႈၼႆႉ ဝၼ်းတီႈ 23/3/2020 ၵႂႃႇ ႁၢမ်ႈၵူၼ်းမိူင်းတၢင်းသွင်ၾင်ႇ ၶဝ်ႈဢွၵ်ႇၵႂႃႇမႃး ၸူဝ်ႈၶၢဝ်းယဝ်ႉ။ ၵူၺ်းၵႃႈ လွင်ႈတေပိုတ်ႇၶိုၼ်းမိူဝ်ႈလႂ် ဢၼ်ဝႃႈၼၼ်ႉတႄႉ ပႆႇႁူႉ ပႆႇမီႈၶေႃႈမၢတ်ႈမၢႆသင် ဝႃႈၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ