ပီၼႆႉ ၼႂ်းမိူင်းၵဵင်းမႂ်ႇ ၸိုင်ႈထႆး တႅမ်ႈပႃးလိၵ်ႈတႆးဝႆႉဝႃႈ တေဢမ်ႇၸတ်းပွႆးသွၼ်းၼမ်ႉ ယွၼ်ႉၵူဝ်ၵူၼ်းမိူင်းၸပ်းတၢင်း ပဵၼ်ၶူဝ်ႊ ဝိတ်ႊ 19 ဢၼ် လၢမ်းၽႄႈၸပ်းငၢႆႈဝႆးၼၼ်ႉ ဝႃႈၼႆ။
ၸွမ်းၼင်ႇ ၾိင်ႈႁိတ်ႈႁွႆး ပီႈၼွင်ႉၵူၼ်းယူၼ်း(ၵူၼ်းမိူင်း) ၵူၼ်းထႆး မီးၼၼ်ႉသေ ၼိုင်ႈပီၼိုင်ႈပွၵ်ႈ ၸတ်းႁဵတ်းပွႆးႁူတ်း ၼမ်ႉ ၼႂ်းလိူၼ်ဢေႊပရိူဝ်ႊၵူႈပီ။ ပီၼႆႉ ယူႇတီႈၾၢႆႇၸဝ်ႈၼႃႈတီႈ ၼႂ်းမိူင်းၵဵင်းမႂ်ႇ ပိုၼ်ၽၢဝ်ႇဢွၵ်ႇဝႃႈ လွင်ႈပွႆးသွၼ်းၼမ်ႉ ၼႆႉ တေ ဢမ်ႇၸတ်းႁဵတ်းယဝ်ႉ။ ယဝ်ႉၵေႃႈ ဢိၵ်ႇထႅင်ႈ ပွႆးလၢမ်းထႅင်ႈတၢင်ႇဢၼ် ၸိူဝ်းၼႆႉၵေႃႈ တေပႆႇႁဵတ်းသင် ဝႃႈၼႆ။
လိူဝ်ၼၼ်ႉ ၸွမ်းၼႂ်းၶူးဝဵင်း ၵဵင်းမႂ်ႇ လႆႈႁၼ် ႁဵတ်းပၢႆႉ တႅမ်ႈဝႆႉလိၵ်ႈထႆး၊ လိၵ်ႈဢင်းၵိတ်း၊ လိၵ်ႈၶႄႇလႄႈ လိၵ်ႈတႆး တင်း မူတ်း 4 ၽႃသႃ ဝႃႈၼႆ။
ၼႂ်းလိၵ်ႈတႆး တႅမ်ႈဝႆႉဝႃႈ “ ယွၼ်းလွင်ႈႁူမ်ႈမိုဝ်း ဢမ်ႇလဵၼ်ႈသွၼ်းၼမ်ႉလိူၼ်ႁႃႈ တွၼ်ႈတႃႇႁႄႉၵင်ႈတၢင်းပဵၼ်ၶူဝ်ႊဝိတ်ႊ 19” ဝႃႈၼႆ။
တေႃႈလဵဝ် ၵူၼ်းၸပ်းတၢင်းပဵၼ်ၶူဝ်ႊရူဝ်ႊၼႃႊ(ၶူဝ်ႊဝိတ်ႊ 19) ၼႂ်းၵဵင်းမႂ်ႇ ၸိုင်ႈထႆးၼၼ်ႉ တင်းမူတ်း မီးၵႂႃႇ 7 ၵေႃႉ၊ ဢၼ်တိုၵ်ႉပႂ်ႉတူၺ်းငဝ်းလၢႆးသမ်ႉ 24 ၵေၢႉ ယူႇတီႈသိုဝ်ႇၶၢဝ်ႇ Thai PBS ဢွၵ်ႇဝႆႉ။
ၼွၵ်ႈလိူဝ်ၼၼ်ႉ ၵူၼ်းမိူင်း ၼႂ်းမိူင်းထႆး ဢၼ်ၸပ်းတၢင်းပဵၼ် ၶူဝ်ႊဝိတ်ႊ 19 မီးၵႂႃႇ 27 ၸႄႈတွၼ်ႈ ႁူဝ်ၵူၼ်း 322 ၵေႃႉ၊ တၢႆ 1 ၵေႃႉ သိုဝ်ႇၶၢဝ်ႇ Chiang Mai News ပိုၼ်ၽၢဝ်ႇဢွၵ်ႇဝႆႉ မိူဝ်ႈၼႆႉ 20/3/2020 ယၢမ်းၵၢင်ဝၼ်း 11 မူင်းၶိုင်ႈ။
