ၶွပ်ႇလႅၼ်ၽႅၼ်ႇလိၼ်ဝူင်ႈၵၢင် RCSS တင်းၾၢႆႇမိူင်းထႆး ၶဵင်ႈၶႅင်လွင်ႈႁူမ်ႇလူမ်ႈ ၵူတ်ႇထတ်းလူမ်းမႆႈ ၵူၼ်းပိုၼ်ႉတီႈ ၸိူဝ်း လတ်းၽၢၼ်ႇၵႂႃႇမႃး။
လႅၼ်ၶႅၼ်ႈ RCSS ၵုမ်းၵမ် ပၵ်းယူႇဝႆႉၸွမ်းလႅၼ်လိၼ်တႆး – ထႆး မိူၼ်ၼင်ႇ တၢင်းပွတ်းၵွင်းမုင်ႈမိူင်း – ရၵ်းထႆး၊ လွႆလမ် – ဝဵင်းႁႅင်၊ လွႆသၢမ်သိပ်း – မိူင်းၾၢင် ၸဵမ်ၸိူဝ်းၼႆႉ ၸဝ်ႈၼႃႈတီႈတၢင်းၾၢႆႇလႂ် ၾၢႆႇၼၼ်ႉ ဢဝ် ပုၼ်ႈၽွၼ်းသေ ပႂ်ႉၵူတ်ႇ ထတ်း ၵူၼ်းၶဝ်ႈဢွၵ်ႇၵႂႃႇမႃးယူႇ ၸဝ်ႈႁၢၼ်ၶမ်းၸၢမ်ႇ လၢတ်ႈၼႄၼင်ႇၼႆ။
ၸဝ်ႈႁၢၼ် ၶမ်းၸၢမ်ႇ ၽူႈၶၢၼ်ပၢၵ်ႇ RCSS လၢတ်ႈတီႈၽူႈတွႆႇႁွၵ်ႈဝႃႈ “ တၢင်းၶိုၼ်ႈမႃး ငဝ်ႈၸိုင်ႈလွႆတႆးလႅင်းတႄႉ ၸဝ်ႈ ၼႃႈတီႈတၢင်းသွင်ၾၢႆႇ ၵူတ်ႇထတ်းၵူၼ်းၶဝ်ႈဢွၵ်ႇၵႂႃႇမႃး ႁၢဝ်ႈႁႅင်းလိူဝ်ၵဝ်ႇ။ လွင်ႈဝႃႈ ဢိုတ်းပိၵ်ႉ ဢမ်ႇပၼ်ၵႂႃႇမႃးတႄႉ ဢမ်ႇၸႂ်ႈၼင်ႇၵဝ်ႇၶႃႈ။ လွင်ႈၵူတ်ႇထတ်းၼၼ်ႉတႄႉ ၾၢႆႇပၢႆးယူႇလီတၢင်းႁဝ်းသေ တင်းၾၢႆႇပၢႆးယူႇလီ တၢင်းထႆးၶဝ် ပႂ်ႉ တႅၵ်ႈလူမ်းမႆႈ ၵူၼ်းၶဝ်ႈဢွၵ်ႇၵႂႃႇမႃးယူႇ ႁဝ်းၶႃႈပႂ်ႉၵူတ်ႇထတ်းမႃးၼႆႉ တေမီးၶၢဝ်းတၢင်းဝူင်ႈပၢႆယဝ်ႉ” ဝႃႈၼႆ။
မိူဝ်ႈၼႆႉ ဝၼ်းတီႈ 20/3/2020 ယၢမ်းၵၢင်ၼႂ် လၢၼ်ႇၶဝ်ႈဢွၵ်ႇ တႆး – ထႆး တီႈၼႃႈလိၼ်သိုၵ်းၵဵင်းတုင် မၢႆ 1 လွႆၵေႃႇဝၼ်း တင်း ဝၢၼ်ႈႁိၼ်တႅၵ်ႇ ဢၼ်မီးၼႂ်းၸႄႈဝဵင်းမႄႈသၢႆ ၸိုင်ႈထႆးၼၼ်ႉ လႆႈဢိုတ်းလၢၼ်ႇ ၶဝ်ႈဢွၵ်ႇၵႂႃႇမႃးဝႆႉၸူဝ်ႈၶၢဝ်းယဝ်ႉ။
ၽူႈမီးပုၼ်ႈၽွၼ်း တီႈလွႆၵေႃႇဝၼ်း လၢတ်ႈတီႈၽူႈတွႆႇႁွၵ်ႈဝႃႈ “ၸႂ်ႈၶႃႈဢေႃႈ၊ တႄႇဢဝ် မိူဝ်ႈၼႆႉၵႂႃႇ လႆႈဢိုတ်းၽၵ်းတူ (လၢၼ်ႇ) ဝႆႉယဝ်ႉ။ ၵူၺ်းၵႃႈ သင်ဝႃႈ မီးၵၢၼ်လမ်ႇလွင်ႈၶိုၵ်ႉၶၵ်ႉ မီးၵူၼ်းပဵၼ်သေၸိူဝ်ႉသေပိူင်ၸိုင် ၶဝ်ႈဢွၵ်ႇၵႂႃႇမႃး လႆႈယူႇ” ဝႃႈၼႆ။
တၢင်းၶဝ်ႈဢွၵ်ႇ လၢၼ်ႇလႅၼ်လိၼ် မိူၼ်ၼင်ႇ BP1 ၵိဝ်ႇၽႃဝွၵ်ႈ – ၼွင်ဢုၵ်း၊ ပႃၶီး – ၼေႃးလႄး မိူင်းၾၢင် ၾၢႆႇထႆး လႆႈ ဢိုတ်း တင်ႈတႄႇဝၼ်း 14/3/2020 မႃး။ ၵူၺ်းၵႃႈ တီႈလၢၼ်ႇၼႃးမူၼ်း – မႄႈႁွင်ႈသွၼ်ၼၼ်ႉတႄႉ တေႃႇထိုင် ဝၼ်းတီႈ 20 တိုၵ်ႉၵႂႃႇမႃးလႆႈ ဝႃႈၼႆ။
တီႈတၢင်းၽၵ်းတူ တႃႈၶီႈလဵၵ်း – မႄႈသၢႆ ၶူဝ်မိုတ်ႈၵိုဝ်းမၢႆ 1 ၼၼ်ႉတႄႉ ဢမ်ႇဢိုတ်း ပိုတ်ႇပၼ်ၵူၼ်းထႆး/ ၵူၼ်းမိူင်းႁူမ်ႈ တုမ် ၸႃႇတိ ယိပ်းဝႂ် 7 ဝၼ်း ၶဝ်ႈဢွၵ်ႇၵႂႃႇမႃးမိူၼ်ၵဝ်ႇယူႇ။ ၵူၺ်းၵႃႈ ပေႃးပဵၼ်ၵူၼ်း ၼွၵ်ႈမိူင်း (မိူင်းတီႈသၢမ်) ၼၼ်ႉတႄႉ ဢမ်ႇပၼ်လတ်းၽၢၼ်ႇ ၵႂႃႇမႃး တင်ႈတႄႇ ဝၼ်းတီႈ 19/3/2020 ဝႃႈၼႆ။
တေႃႈလဵဝ် တၢင်းပဵၼ်ၶူဝ်ႊဝိတ်ႊ 19 ဢၼ်တႄႇပဵၼ် ၸိုင်ႈမိူင်းၶႄႇၼၼ်ႉသေ လၢမ်းၽႄႈၸွတ်ႈတူဝ်ႈ ၼႂ်းလုမ်ႈၾႃႉၵမ်ႈ ၼမ်ယဝ်ႉ။ လိူဝ်ၼၼ်ႉ မီးၵူၼ်းၸပ်းတၢင်းပဵၼ်လူႉတၢႆ ယွၼ်ႉမၼ်းၵေႃႈၼမ် ဝႃႈၼႆ။
တေႃႈလဵဝ် ၵူၼ်းၸပ်းတၢင်းပဵၼ် တၢင်းလုမ်ႈၾႃႉ မီးၵႂႃႇ 237,878 ၵေႃႉ၊ တၢႆ 9,868 ၵေႃႉ သိုဝ်ႇၶၢဝ်ႇ South China Morning Post ဢွၵ်ႇဝႆႉ။
