ၾႆးမႆႈႁိူၼ်းၵူၼ်းဝၢၼ်ႈၼွင်ၽုၵ်ႈ ၸႄႈဝဵင်းမိူင်းၶၢၵ်ႇ 8 လင် မၢတ်ႇၸဵပ်း လူႉတၢႆ ဢမ်ႇမီး ၶူဝ်းႁိူၼ်းယေး မႆႈၸွမ်းၾႆး တင်းၼမ်။
ဝၼ်းတီႈ 19/3/2020 ယၢမ်းဝၢႆးဝၼ်း 2 မူင်းပၢႆ ၾႆးမႆႈပႃႇ လၢမ်ႈမႆႈႁိူၼ်းၵူၼ်းဝၢၼ်ႈၼွင်ၽုၵ်ႈ ဢိူင်ႇဝၢၼ်ႈၶုမ်ႉ ၸႄႈဝဵင်းမိူင်းၶၢၵ်ႇ ၸႄႈတွၼ်ႈၵဵင်းတုင် ၸိုင်ႈတႆးပွတ်းဢွၵ်ႇၶူင်း တင်းမူတ်း လၢမ်းမႆႈလင်ႁိူၼ်းၵူၼ်းဝၢၼ်ႈ 8 လင် ၶူဝ်းၶွင် ၼႂ်းႁိူၼ်းယေး ၽႃႈႁူမ်ႇၶူဝ်းၼွၼ်းလႄႈ ၶဝ်ႈပိူၵ်ႇ ဢိၵ်ႇပႃး ငိုၼ်းတွင်း ၸဵမ်ၸိူဝ်းၼႆႉ လႆႈမႆႈၵႂႃႇၸွမ်းၾႆး။
ၸၢႆးၼုမ်ႇ ဢႃယု 30 ပၢႆ ၵူၼ်းဢိူင်ႇဝၢၼ်ႈၶုမ်ႉ လၢတ်ႈတီႈၽူႈတွႆႇႁွၵ်ႈဝႃႈ “ ၾႆးပႃႇလၢမ်းမႆႈၶႃႈဢေႃႈ။ ၾႆးၼႆႉ မႆႈမႃးတၢင်းတႂ်ႈဝၢၼ်ႈၼွင်ၽုၵ်ႈၼၼ်ႉသေ လၢမ်ႈမႆႈၶဝ်ႈၼႂ်းဝၢၼ်ႈ တင်းမူတ်း လင်ႁိူၼ်း 8 လင် ၺႃးၾႆးမႆႈၵႂႃႇ လူမ်း ထွင်ႁႅင်း လၢမ်းမႆႈၵႂႃႇၶႃႈယဝ်ႉ။ ပီၼႆႉ လႅတ်ႇၵေႃႈမႆႈႁႅင်း။ ၾူၼ်ၵေႃႈဢမ်ႇတူၵ်းၶႃႈ” ဝႃႈၼႆ။
ဝၢၼ်ႈၼွင်ၽုၵ်ႈၼႆႉ တင်းမူတ်းမီးလင်ႁိူၼ်းယူႇ 95 လင် ယၢၼ်ၵႆဝဵင်းမိူင်းၶၢၵ်ႇ မွၵ်ႈ 2 လၵ်းပၢႆ ၵမ်ႈၼမ် ပဵၼ်ပီႈၼွင်ႉလႃး ႁူႇယူႇသဝ်း ဝႃႈၼႆ။
ၸၢႆးၼုမ်ႇသိုပ်ႇလၢတ်ႈဝႃႈ “ လွင်ႈၵူၼ်းဝၢၼ်ႈလူႉတၢႆ မၢတ်ႇၸဵပ်းတႄႉ ဢမ်ႇမီး ဢၼ်ၵူၼ်းဝၢၼ်ႈႁဝ်းၶႃႈ လႆႈသုမ်းၵႂႃႇတႄႉၵေႃႈ ၶဝ်ႈပိူၵ်ႈ၊ ၶူဝ်းႁိူၼ်းယေး၊ ၽႃႈႁူမ်ႇၶူဝ်းၼွၼ်းလႄႈ ငိုၼ်းတွင်း ၵမ်ႈၽွင်ႈ ၸဵမ်ၸိူဝ်းၼႆႉ။ ၾႆးမႆႈၵႂႃႇ ယၢမ်းဝၢႆးဝၼ်း 2 မူင်း ပၢႆၼႆႉ” ဝႃႈၼႆ။
ယူႇတီႈၵူၼ်းဝၢၼ်ႈ၊ ၾၢႆႇပလိၵ်ႈၶႄႇ မိူင်းၶၢၵ်ႇလႄႈ တပ်ႉသိုၵ်းလူင်ပွင်ၸိုင်ႈမၢၼ်ႈ ၸွႆႈၵၼ် ၵႅတ်ႇ ၶႄၾႆးႁူတ်းၾႆးသေ ၸင်ႇမွတ်ႇၵႂႃႇ ဝႃႈၼႆ။
“ ၾႆးမႆႈၵႂႃႇတင်းမူတ်းလင်ႁိူၼ်း 8 လင် ၵူၼ်းဝၢၼ်ႈ 35 ၵေႃႉ ႁူပ်ႉလွင်ႈယၢပ်ႇၽိုတ်ႇၵၼ်ၶႃႈဢေႃႈ တေႃႈလဵဝ် ဢၼ်လူဝ်ႇ ၸႂ်ႈတႄႉ လွင်ႈၶူဝ်းၸႂ်ႉတိုဝ်း ဢၼ်လူဝ်ႇၸႂ်ႉ ၵၼ်ဝၼ်းဝၼ်းလႄႈ လွင်ႈၼုင်ဝႆ ၸိူဝ်းၼႆႉၵေႃႈ လူဝ်ႇတင်းၼမ်။ ယၢမ်းလဵဝ် ၾႆးတိုၵ်ႉမႆႈယဝ်ႉၵူၺ်းလႄႈ တင်းမူတ်း မီးလွင်ႈလူႉသုမ်းၵႃႈႁိုင်ဢၼ်ဝႃႈၼၼ်ႉတႄႉ ပႆႇလႆႈႁူႉ” ၵူၼ်းဢိူင်ႇဝၢၼ်ႈၶုမ်ႉ လၢတ်ႈၼႄၼင်ႇၼႆ။
မိူဝ်ႈဝၼ်းတီႈ 12/2/2020 ၼၼ်ႉၵေႃႈ ၾႆးမႆႈဝၢၼ်ႈဢႅၼ်ႇ ဢိူင်ႇဝၢၼ်ႈဢွၼ်ႇ ၸႄႈဝဵင်းမိူင်းၶၢၵ်ႇ မႆႈၵႂႃႇလင်ႁိူၼ်း 60 လင် ၼၼ်ႉၵေႃႈ မီးလွင်ႈလူႉသုမ်း ၶူဝ်းႁိူၼ်းယေးလႄႈ ၶဝ်ႈပိူၵ်ႇ ငိုၼ်းတွင်း ၸွမ်းတင်းၼမ်လၢႆ။ လွင်ႈၵူၼ်းမၢတ်ႇၸဵပ်း လူႉတၢႆ ဢမ်ႇမီး၊ ႁူဝ်ၵူၼ်း 300 ပၢႆ လႆႈယၢပ်ႇၽိုတ်ႇၵၼ် ဝႃႈၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ