ၵူၼ်းမူႇၸေႊ တုၵ်းယွၼ်းႁႂ်ႈၾၢႆႇၽူႈမီးပုၼ်ႈၽွၼ်း ဢိုတ်းၽၵ်းတူမိူင်း လႅၼ်လိၼ်တႆး – ၶႄႇ ဝႆႉၵမ်းၼိုင်ႈ ၼႂ်းၶၢဝ်းတၢင်း တၢင်းပဵၼ်ၶူဝ်ႊရူဝ်းၼႃႊ (ၶူဝ်ႊဝိတ်ႊ 19 ) လိူင်ႇၽႄႈၸပ်းငၢႆႈဝႆးၼႆႉ ၵူဝ်ၵူၼ်းမိူင်းတိတ်းၸပ်းၵၼ် ဝႃႈၼႆ။

ၽၵ်းတူမိူင်းလႅၼ်လိၼ် တႆး – ၶႄႇ ဢၼ်ပိုတ်ႇပဵၼ်တၢင်းၵၢၼ် ၵႂႃႇမႃးၶဝ်ႈဢွၵ်ႇ ၼႂ်းၸႄႈဝဵင်းမူႇၸေႊ ၸိုင်ႈတႆးပွတ်းႁွင်ႇ မိူၼ်ၼင်ႇ ၽၵ်းတူႁေႃၶမ်းလူင်၊ ၽၵ်းတူၸၢင်ႉၽိူၵ်ႇလႄႈ ၽၵ်းတူမၢၼ်ႈဝဵင်း ၸိူဝ်းၼႆႉ။ တေႃႈလဵဝ် မီးၵူၼ်းၶဝ်ႈဢွၵ်ႇ ၵႂႃႇ မႃး တင်းၼမ်လၢႆ ဝႃႈၼႆ။

ထႅင်ႈၾၢႆႇၼိုင်ႈၵေႃႈ ယွၼ်ႉပီႈၼွင်ႉႁႅင်းၵၢၼ် တၢင်းမိူင်းႁူမ်ႈတုမ် ဢွၼ်ၵၼ်ႁႄႇၶဝ်ႈမိူဝ်းႁဵတ်းၵၢၼ်တၢင်းမိူင်းၶႄႇၵေႃႈ ၼမ် ဝႃႈၼႆ။

ၸၢႆးႁိၼ်လဵၵ်း ၵူၼ်းမူႇၸေႊလၢတ်ႈတီႈၽူႈတွႆႇႁွၵ်ႈဝႃႈ “ ႁဝ်းၶႃႈမႆႈၸႂ်တႄႉ သင်ပဵၼ်လႆႈ ဢိုတ်းပႅတ်ႈၽၵ်းတူသွင်ၽၢၵ်ႇ မိူင်းၵမ်းၼိုင်ႈတေလီ။ ပေႃးဢိုတ်း မၼ်းတေတုမ်ႉတိူဝ်ႉပၢႆးမၢၵ်ႈမီး လႄႈလွင်ႈၵိၼ်ယႅမ်ႉဢၼ်ဝႃႈၼၼ်ႉ ၸႂ်ႈယူႇၵူၺ်း။ ၵူၺ်းၵႃႈ ပေႃးပဵၼ်မႃးတၢင်းပဵၼ်ၼႆႉ တၢင်းမိူင်းႁဝ်းၶႃႈၼႆႉ တေဢမ်ႇၵႄႈ လိတ်ႈလႆႈ။ ယႃႈယႃတၢင်းပဵၼ်ၵေႃႈဢမ်ႇမီး” ဝႃႈၼႆ။

သိုပ်ႇလၢတ်ႈဝႃႈ “ သင်ပဵၼ်လႆႈ ႁႂ်ႈငိူင်ႉဝႄႈပႅတ်ႈၵမ်းၼိုင်ႈ ဢမ်ႇၶႂ်ႈႁႂ်ႈမိူင်းႁဝ်း ပဵၼ်ၵႂႃႇၸိူင်ႉၼင်ႇမိူင်းဢီႊတလီႊၶဝ် ၵူၼ်း ပဵၼ် ၵူၼ်းတၢႆၶဝ် ၵိုင်ႉၵၢင်ႉ ပုင်ႈၶိုၼ်ႈမႃး ၵူၼ်းတၢႆ မီးသွင်ႁဵင်ပၢႆယဝ်ႉ။ ယွၼ်ႉၼၼ် တီႈႁဝ်းၵေႃႈ လီၵူဝ်ပဵၼ်ၸိူင်ႉၼၼ်၊ ပေႃး ပဵၼ်မႃးၼႆ ၽႂ် ၵေႃႈဢမ်ႇၸၢင်ႈႁၢမ်ႈသီးလႆႈ လွင်ႈၼႆႉ” ဝႃႈၼႆ။

ၼွၵ်ႈလိူဝ်ၼၼ်ႉ တီႈပၢင်ၵၢတ်ႇ 105 လၵ်း ၸႄႈဝဵင်းမူႇၸေႊၵေႃႈ ပိုၼ်ၽၢဝ်ႇပၼ်ၾၢင်ႉထိုင် ႁႂ်ႈလူတ်းယွမ်းၵူၼ်းၼမ် ၵူၼ်းၵိုၼ်းၽွင်ႈ ယွၼ်ႉၵူဝ်ၽႄႈၸပ်းတၢင်းပဵၼ်ၶူဝ်ႊဝိတ်ႊ 19 ၵၼ် ဝႃႈၼႆ။

ၸၢႆးၶိၼ်ႇမွင်ႇ ၵႅမ်ႁူဝ်ပဝ်ႈ ပၢင်ၵၢတ်ႇမၢၵ်ႇမႆႉ 105 လၵ်း လၢတ်ႈတီႈၽူႈတွႆႇႁွၵ်ႈဝႃႈ “ တႄႇဢဝ် ဝၼ်းတီႈ 19 ၼႆႉၵႂႃႇ ပိုၼ် ၽၢဝ်ႇပၼ်သတိဝႃႈ တႄႇဢဝ်ၵူၼ်းၶဝ်ႈ/ ဢွၵ်ႇတီႈပၢင်ၵၢတ်ႇ 105 လၵ်းႁဝ်း ႁႂ်ႈယွမ်းလူင်းၵႂႃႇ ၵွပ်ႈပိူဝ်ႈ တၢင်းပဵၼ် ၶူဝ်ႊ ဝိတ်ႊ 19 ၼႆႉသေ တီႈပၢင်ၵၢတ်ႇႁဝ်းသမ်ႉ ၵူၼ်းၵိုၼ်းၶွၼ်ႈၼမ်လႄႈ မၼ်းတေဢမ်ႇသၢင်ႇထုၵ်ႇ။ ယွၼ်ႉၼၼ် ႁဝ်းၶႃႈ ႁႂ်ႈယွမ်းလူင်း ယႃႇႁႂ်ႈၵူၼ်းၶိုၼ်ႈမႃး တီႈပၢင်မၢၵ်ႇမႆႉၼႆႉၼမ်” ဝႃႈၼႆ။

သိုပ်ႇလၢတ်ႈဝႃႈ “ လွင်ႈမၢၵ်ႇမႆႉတႄႉ သူင်ႇၶိုၼ်ႈမႃးလႆႈယူႇ၊ ၵူၼ်းဢမ်ႇၵဵဝ်ႇၶွင်ႈ ယႃႇပေဢွၼ်ၵၼ်ၶိုၼ်ႈ မႃးၶွၼ်ႈၵၼ်ၼမ် ” ဝႃႈၼႆ။

တေႃႈလဵဝ်ၼႆႉ ႁႅင်းၵၢၼ်မိူင်းႁူမ်ႈတုမ် ဢၼ်လုၵ်ႉတၢင်းမိူင်းၶႄႇမႃးၵေႃႈမီး ၸိူဝ်းဢၼ်ဢွၼ်ၵၼ်ၶဝ်ႈၵႂႃႇႁႃႁဵတ်းၵၢၼ် ၶိုၼ်းတၢင်းမိူင်းၶႄႇၵေႃႈၼမ် ဝႃႈၼႆ။

ၸၢႆးႁိၼ်လဵၵ်း လၢတ်ႈဝႃႈ “တႄႇဢဝ် မိူဝ်ႈဝႃး 18 မႃးၼႆႉ တၢင်းၾင်ႇမိူင်းၶႄႇၶဝ် ပိူၼ်ႈၵုမ်းၵူၼ်းမိူင်းပိူၼ်ႈလႆႈယဝ်ႉ။ သင် ဝႃႈ ၵူၼ်းမိူင်းၶႄႇၶဝ် ၶၢမ်ႈမႃးတၢင်းၾင်ႇႁဝ်းသေ ပွၵ်ႈမိူဝ်းၸိုင် ၺႃးႁွင်ႉၵၵ်းတူဝ်ပႂ်ႉတူၺ်း 14 ဝၼ်းယဝ်ႉ ၸင်ႇပွႆႇတူဝ်။ ၵူၺ်းၵႃႈ ၵူၼ်းမိူင်းတၢင်းၼႆႉ ဢၼ်လုၵ်ႉတၢင်းၼႆႉသေၵႂႃႇတႄႉ တီႈၽၵ်းတူၶၢမ်ႈမိူင်းၼၼ်ႉ တေတႅၵ်ႈလူမ်းမႆႈပၼ်သေ ၶဝ်ႈၵႂႃႇ” ဝႃႈၼႆ။

တေႃႈလဵဝ် လူင်ပွင်ၸိုင်ႈၼေႇပျီႇတေႃႇဝႃႈ ၼႂ်းမိူင်းႁူမ်ႈတုမ် ၵူၼ်းၸပ်းတၢင်းပဵၼ် ၶူဝ်ႊဝိတ်ႊ 19 ပႆႇထူပ်းႁၼ်သေၵေႃႉ ယၢမ်းလဵဝ် တိုၵ်ႉပႂ်ႉတူၺ်း ၵူၼ်းထၢင်ႇထိူမ်သေ ထုၵ်ႇၵုမ်းထတ်းတူၺ်း မီး 133 ၵေႃႉ။

တေႃႈလဵဝ် ၵူၼ်းမိူင်းတၢင်းလုမ်ႈၾႃႉ ၸပ်းတၢင်းပဵၼ်ၶူဝ်ႊရူဝ်ႊၼႃႊ(ၶူဝ်ႊဝိတ်ႊ 19) ၼႆႉ မီးၵႂႃႇ 210,732 ၵေႃႉ၊ ၵူၼ်းတၢႆ ၵေႃႈ ၸမ် 9,000 ယဝ်ႉ ဝႃႈၼႆ။