ၵူၼ်းဝၢၼ်ႈၼႂ်းဢိူင်ႇၼႃးမၢၵ်ႇၶေႃ ႁႄႉႁၢမ်ႈၵူၼ်းတၢင်ႇတီႈသီႇလႅၼ် ဢၼ်ပွၵ်ႈမႃး တၢင်းမိူင်းထႆး – မိူင်းၶႄႇ ၸိူဝ်းၼၼ်ႉ ဢမ်ႇပၼ်ၶဝ်ႈၼႂ်းမူႇဝၢၼ်ႈၵမ်းလဵဝ် တေပႂ်ႉတူၺ်းတၢင်းပဵၼ် တႃႇၶၢဝ်းတၢင်း 15 ဝၼ်းၵွၼ်ႇ ဝႃႈၼႆ။
ၼႂ်းဝဵင်းသီႇပေႃႉ မီးၵူၼ်းထုၵ်ႇထၢင်ႇထိူမ်ဝႃႈ ၸပ်းၸိူဝ်ႉမႅင်းၶူဝ်ႊရူဝ်ႊၼႃႊ ၼႂ်းဢိူင်ႇၼႃးမၢၵ်ႇၶေႃၵေႃႈမီးၶၢဝ်ႇဝႃႈ ၵူၼ်း ပွၵ်ႈတၢင်းမိူင်းၶႄႇ မႃးၼမ်ၼႆလႄႈ တႄႇဢဝ် ဝူင်ႈထီႉသၢမ် ၼႂ်းလိူၼ်မၢတ်ႇၶျ် 2020 ၼႆႉမႃး ယူႇတီႈၽူႈၵွၼ်းဢိူင်ႇၼႃး မၢၵ်ႇၶေႃ သင်ႇႁႂ်ႈၵူၼ်းဝၢၼ်ႈ ၵူႈမုၵ်ႉ ဝၢၼ်ႈႁႂ်ႈပႂ်ႉၵူတ်ႇထတ်း ၵူၼ်းပွၵ်ႈမႃးတၢင်းထႆးလႄႈ မိူင်းၶႄႇ ႁၢမ်ႈ/ ဢမ်ႇပၼ်ၶဝ်ႈ ဝၢၼ်ႈၵမ်းလဵဝ် ႁႂ်ႈယူႇၼွၵ်ႈဝၢၼ်ႈဝႆႉ ပႂ်ႉ တူၺ်းငဝ်းလၢႆး 15 ဝၼ်းၵွၼ်ႇ ၸင်ႇတေပၼ်ၶဝ်ႈဝၢၼ်ႈ၊ ယွၼ်ႉၵူဝ်ၸပ်းတၢင်း ပဵၼ်ၶူဝ်ႊဝိတ်ႊ 19 ဝႃႈၼႆ။
ၵူၼ်းၼုမ်ႇ ၼႂ်းဢိူင်ႇၼႃးမၢၵ်ႇၶေႃ ဢႃယုမွၵ်ႈ 30 ပီ လၢတ်ႈတီႈၽူႈတွႆႇႁွၵ်ႈဝႃႈ “ တႄႇဢဝ်ဝူင်ႈၼႆႉ မႃးၶႃႈယဝ်ႉ ၽူႈၵွၼ်း ဢိူင်ႇႁဝ်း သင်ႇလူင်းမႃး ႁၢမ်ႈၵူၼ်းဢၼ်ပွၵ်ႈတၢင်းမိူင်းထႆး၊ မိူင်းၶႄႇ ၶဝ်ႈၼႂ်းဝၢၼ်ႈၵမ်းလဵဝ် ႁႂ်ႈယူႇၼွၵ်ႈဝၢၼ်ႈဝႆႉ ပႂ်ႉ တူၺ်းတၢင်းပဵၼ်ၶဝ် တႃႇၶၢဝ်းတၢင်း 15 ဝၼ်းယဝ်ႉ ၸင်ႇတေပၼ်ၶဝ်ႈဝၢၼ်ႈ။ ၵူၺ်းၵႃႈ လွင်ႈဢိုတ်းသဵၼ်ႈတၢင်းလူင်သေ ၵူတ်ႇထတ်းၼၼ်ႉတႄႉ ဢမ်ႇမီးၶႃႈ” ဝႃႈၼႆ။
မိူဝ်ႈဝၼ်းတီႈ 14/3/2020 ၼၼ်ႉၵေႃႈ ယူႇတီႈငဝ်ႈငုၼ်းပႃႇတီႇမႂ်ႇသုင်ၸိုင်ႈတႆး/ တပ်ႉသိုၵ်းၸိုင်ႈတႆး SSPP/SSA ဢွၵ်ႇ လိၵ်ႈပိုၼ်ၽၢဝ်ႇ ပၼ်ၾၢင်ႉထိုင် ၵူၼ်းမိူင်းၼႂ်းၼႃႈတီႈၸိူဝ်းၼၼ်ႉသေ ယဝ်ႉၵေႃႈ သင်ႇထိုင်ၸူး ပေႃႈမႄႈၵူၼ်းမိူင်းဢၼ် ယူႇဝႆႉၼႂ်းၼႃႈတီႈ SSPP ၼၼ်ႉ ႁႂ်ႈဢွၼ်ၵၼ်ၾၢင်ႉသတိ ၵူၼ်းပွၵ်ႈတီႈၵႆမႃး ဝႃႈၼႆ။
ၵူၼ်းၼုမ်ႇ ၼႂ်းဢိူင်ႇၼႃးမၢၵ်ႇၶေႃ သိုပ်ႇလၢတ်ႈဝႃႈ “ တၢင်းပွတ်းၼႆႉ ပဵၼ်တၢင်းၼႃႈတီႈ SSPP ၵုမ်းၵမ်ဝႆႉလႄႈ ယူႇတီႈ SSPP တႅမ်ႈလိၵ်ႈသူင်ႇထိုင် ၽူႈၵွၼ်းဢိူင်ႇ ၵွၼ်းဝၢၼ်ႈသေ ႁႂ်ႈဢွၼ်ၵၼ် ဝႆႉၼမ်ႉၼၵ်း လွင်ႈတၢင်းပဵၼ်ၶူဝ်ႊရူဝ်ႊၼႃႊ၊ ႁႂ်ႈပႂ်ႉ ၵူတ်ႇထတ်းၵူၼ်းၸိူဝ်းလုၵ်ႉတၢင်းထႆး မိူင်းၶႄႇၸိူဝ်းၼၼ်ႉမႃး” ဝႃႈၼႆ။
ၼႂ်းလိၵ်ႈပိုၼ်ၽၢဝ်ႇၼၼ်ႉ ဢွၵ်ႇဝႆႉဝႃႈ “ ၼင်ႇႁိုဝ် တၢင်းပဵၼ်ၼႆႉ တေဢမ်ႇၽႄႈတိူၼ်းၽႅဝ်ထိုင် ၼႂ်းၼႃႈတီႈလႄႈ တေ ဢမ်ႇၸပ်းမႅၼ်ႈၼႂ်းၼႃႈႁေႃတေႃႁိူၼ်း ပေႃႈမႄႈၵူၼ်းမိူင်း ၼႂ်းတပ်ႉ/ၼႂ်းႁွင်ႈၵၢၼ် ၸိူဝ်းၼႆႉ ႁႂ်ႈဢွၼ်ၵၼ်ၾၢင်ႉသတိ ၵူၼ်းလုၵ်ႉတီႈၵႆမႃး ၵူၼ်းပဵၼ်ၶႆႈပဵၼ်ၼၢဝ် ဢၼ်မီးၾၢင်ႁၢင်ႈၸပ်းဝႆႉတၢင်းပဵၼ်ၵႃႇလ ၶူဝ်ႊရူဝ်ႊၼႃႊ။ ႁႂ်ႈငိူင်ႉဝႄႈတီႈ ၵူၼ်းၸူႉ ၵူၼ်းတုမ်ၵၼ်ၼမ်(တီႈပွႆးလၢမ်း)၊ ၵႆႉသုၵ်ႈမိုဝ်းႁႂ်ႈၸိုၼ်ႈၸၢင်ႇမူတ်းသႂ်၊ ပေႃးၵႂႃႇတၢင်းၼွၵ်ႈၼႂ်းၵႄႈၵၢင်ၵူၼ်း ႁႂ်ႈသႂ်ႇၽႅၼ်ႇပူၵ်ႉသူပ်း (Mask) ၸိူဝ်းၼႆႉ” ဝႃႈၼႆ။
လိူဝ်ၼၼ်ႉ ႁႂ်ႈဝႆႉၼမ်ႉၼၵ်းလွင်ႈလုမ်းလႃး ပၢႆးယူႇလီတူဝ်ၵဝ်ႇလႄႈ ၵႆႉၵႆႉၵိၼ်ပၼ်ၼမ်ႉဢုၼ်ႇ/မႆႈ ၵႆႉဢဝ်ၼမ်ႉၵိူဝ်ပူၼ်ႈ ပၼ်ပၢၵ်ႇ၊ ႁႂ်ႈဢွၼ်ၵၼ်ဝႆႉၼမ်ႉၼၵ်းလဵပ်ႈႁဵၼ်း ႁဵတ်းၸွမ်းၼင်ႇပိုၼ်ႉႁူႉမုၵ်ႉၸုမ်းပၢႆးယူႇလီၵူႈမိူင်းမိူင်း ဢွၵ်ႇဝႆႉၼၼ်ႉ။ သင်မီးၾၢင်ႁၢင်ႈၸပ်းတၢင်းပဵၼ်ၸိုင် ႁႂ်ႈဢဝ်သူင်ႇတီႈႁူင်းယႃ ဢၼ်ၸမ်သုတ်းလႄႈ ပွင်ႇၶၢဝ်ႇတီႈၽူႈမီးပုၼ်ႈၽွၼ်း ၶိုတ်းၸမ်။ တေလႆႈငိူင်ႉဝႄႈလွင်ႈၶီႈၸၢမ်၊ လွင်ႈဢႆ ၼႂ်းၵႄႈၵၢင်ၵူၼ်းၼမ်။ ဢိင်ၼိူဝ်ၶေႃႈႁႄႉႁၢမ်ႈၸိုင်ႈမိူင်းတၢင်ႇမိူင်း မီး ၶေႃႈမၵ်းတတ်းသေ ၸူဝ်ႈၶၢဝ်းၼႆႉ ႁႂ်ႈဢွၼ်ၵၼ်ငိူင်ႉဝႄႈ လွင်ႈၶဝ်ႈဢွၵ်ႇၵႂႃႇမႃးၼွၵ်ႈမိူင်း တီႈၵူၼ်းၵိုၼ်း၊ ပွႆးလၢမ်း ၸိူဝ်း ၼႆႉ၊ သင်ၵႂႃႇၵၢတ်ႇၵႂႃႇသႃးၵေႃႈ ႁႂ်ႈသႂ်ႇၽႃႈႁႄႉတူမ်းပၢၵ်ႇၶူးလင် ၸိူဝ်းၼႆႉ၊ လိူဝ်ၼၼ်ႉ လူဝ်ႇၵႆႉၵႆႉ လၢင်ႉမိုဝ်း ပၼ်ၶႅမ်ႉၶႅမ်ႉ ဝႃႈၼႆ။
