ၵၢတ်ႇလူင် ဝဵင်းတူၼ်ႈတီး ဢိုတ်း/ ပိၵ်ႉ ဢၼ်ၶၢဝ်ႇႁူင်လိုဝ်းၵၼ်ဢွၵ်ႇမႃးဝႃႈ ယွၼ်ႉလူဝ်ႇသိတ်းယႃႁႄႉၵင်ႈ ၸိူဝ်ႉမႅင်း (ၶူဝ်ႊဝိတ်ႊ 19) ၼႆၼၼ်ႉ ဢမ်ႇၸႂ်ႈပဵၼ်ၶၢဝ်ႇတႄႉ ပဵၼ်ၶၢဝ်ႇပွမ်/ ၶၢဝ်ႇႁူင်လိုဝ်းၵၢင်လၢႆၵူၺ်း ဝႃႈၼႆ။
ဝၼ်းတီႈ 18/3/2020 ၼၼ်ႉ တီႈၵၢတ်ႇလူင် ဝဵင်းတူၼ်ႈတီး ၸိုင်ႈတႆးပွတ်းၸၢၼ်း တေသိတ်းယႃႈယႃၶႃႈ ၸိူဝ်ႉမႅင်း ၼႆသေ တေဢိုတ်းၵၢတ်ႇဝႆႉဢၼ်ဝႃႈၼၼ်ႉ ပဵၼ်ၶၢဝ်ႇၵၢင်လၢႆ/ ၶၢဝ်ႇပွမ်ၵူၺ်း ဝႃႈၼႆ။
ၼၢင်းမွၵ်ႇမူဝ်ႁဵဝ်းၶမ်း ၽူႈသိုဝ်ႇၶၢဝ်ႇၽူႈတွႆႇႁွၵ်ႈ ႁၢႆးငၢၼ်းလၢတ်ႈၼႄဝႃႈ “ ၵၢတ်ႇလူင်ဢမ်ႇဢိုတ်းၶႃႈ။ မိူဝ်ႈဝႃး ၵေႃႈ ဢမ်ႇ ဢိုတ်း၊ မိူဝ်ႈၼႆႉ ဝၼ်းတီႈ 19 ၵေႃႈ ဢမ်ႇဢိုတ်း ပိုတ်ႇမိူၼ်ၵဝ်ႇယူႇ။ လွင်ႈၶၢဝ်ႇလိုဝ်း ၵၼ်ဝႃႈ ဢိုတ်း/ ပိၵ်ႉ ၵၢတ်ႇလူင်ၼၼ်ႉ ပဵၼ်ၶၢဝ်ႇပွမ်ၵၼ်ၵူၺ်း” ဝႃႈၼႆ။
ဢိင်ၼိူဝ်လွင်ႈဝႃႈ ၵၢတ်ႇလူင် ဝဵင်းတူၼ်ႈတီး တေဢိုတ်းၵၢတ်ႇသေ သိတ်းယႃႈၶႃႈၸိူဝ်ႉမႅင်းဢၼ်ဝႃႈၼၼ်ႉ ၵူၼ်းမိူင်း ဢွၼ်ၵၼ်ႁူင်လိုဝ်းၵၼ်ၵႂၢမ်းသိုပ်ႇၵႂၢမ်းသေ ဢွၵ်ႇမႃးၵူၺ်း ၵူၼ်းပိုၼ်ႉတီႈ တူၼ်ႈတီး ၵေႃႉၼိုင်ႈလၢတ်ႈၼႄ ၼင်ႇၼႆ။
တေႃႈလဵဝ်ၼႆႉ တၢင်းပဵၼ်ၶူဝ်ႊရူဝ်ႊၼႃႊ (ၶူဝ်ႊဝိတ်ႊ 19) ၼႆႉ လၢမ်းၽႄႈၸွတ်ႇတူဝ်ႈလုမ်ႈၾႃႉၵႂႃႇ တေမီး 174 မိူင်းယဝ်ႉ၊ ၵူၼ်းမိူင်းဢၼ်ၸပ်းၼမ်သေ လူႉတၢႆၼမ်သေပိူၼ်ႈပဵၼ် မိူင်းၶႄႇ။ မိူင်းဢီႊတလီႊ၊ မိူင်းဢီႇရၼ်ႊ၊ မိူင်းသပဵၼ်ႇလႄႈ မိူင်း ၵျုႊမၼီႊ ၸိူဝ်းၼႆႉ။ မိူင်းႁူမ်ႈတုမ်မၢၼ်ႈဝႃႈတႄႉ ၽူႈၶၢၼ်ပၢၵ်ႇ ၸွမ်ၸိုင်ႈယိုၼ်ယၼ်ဝႃႈ ဢမ်ႇမီးၵူၼ်းပဵၼ်ၶူဝ်ႊရူဝ်ႊ ၼႃႊသေၵေႃႉ ဝႃႈၼႆ။