ၵူၼ်းမိူင်းၶႄႇ 500 ပၢႆ ဢၼ်မႃးၶမ်ဝႆႉတီႈတႃႈၶီႈလဵၵ်းၼၼ်ႉ ပႆႇၸၢင်ႈပွၵ်ႈၶဝ်ႈၶိုၼ်းတၢင်း ၾင်ႇမိူင်းထႆး ၼႂ်းၼၼ်ႉ ၵေႃႉ ၼိုင်ႈ ဢႆ၊ ၶေႃးၸဵပ်းလႄႈ ၾၢႆႇယူႇလီ ဝဵင်းတႃႈၶီႈလဵၵ်း လႆႈၵၵ်းတူဝ်ထတ်းတူၺ်းငဝ်းလၢႆးဝႆႉ ယူႇတီႈႁူင်းယႃတႃႈၶီႈလဵၵ်း။
ဝၼ်းတီႈ 18/3/2020 ၼၼ်ႉ ၵူၼ်းမိူင်းၶႄႇ 537 ၵေႃႉ ဢၼ်ၶမ်ယူႇဝႆႉတီႈႁူင်းႁႅမ်း 9 ၸၼ်ႉ ၸႄႈဝဵင်းတႃႈၶီႈလဵၵ်း ၸိုင်ႈတႆး ပွတ်းဢွၵ်ႇၶူင်းၼၼ်ႉ ထူပ်းႁၼ် ထၢင်ႇထိူမ် မိူၼ်ၾၢင်ႁၢင်ႈ ၵူၼ်းၸပ်းတၢင်းပဵၼ်ၶူဝ်ႊဝိတ်ႊ 19 သေ လႆႈၵၵ်းတူဝ်ဝႆႉတီႈ ႁူင်းယႃ။
ၼၢင်းႁွမ် ၽူႈၵႃႉၶၢႆ ၼႂ်းတႃႈၶီႈလဵၵ်း လၢတ်ႈတီႈၽူႈတွႆႇႁွၵ်ႈဝႃႈ “ မိူဝ်ႈဝႃး ႁၼ်ၶႄႇ ထႅင်ႈ 1 ၵေႃႉ မီးယူႇတီႈႁူင်းႁႅမ်း 9 ၸၼ်ႉဢေႃႈ၊ ဢၼ်သွင်ၵေႃႉ မိူဝ်ႈသိုၼ်းတႄႉ ဢမ်ႇၸႂ်ႈၶႃႈ။ မိူဝ်ႈဝႃး ႁၼ်ၵူၼ်းၶႄႇမီးၾၢင်ႁၢင်ႈတၢင်းပဵၼ်လႄႈ ၺႃးၵုမ်း တူဝ်ဝႆႉယဝ်ႉ” ဝႃႈၼႆ။
ၵူၼ်းၶႄႇ 537 ၵေႃႉ ဢၼ်မႃးၶမ်ဝႆႉၼႂ်းၸႄႈဝဵင်းတႃႈၶီႈလဵၵ်းသေ ပႆႇၸၢင်ႈပွၵ်ႈၶိုၼ်းၼၼ်ႉ ယွၼ်ႉတၢင်းၾင်ႇမိူင်းထႆး ႁၢမ်ႈဢိုတ်းဢမ်ႇပၼ်ၶဝ် ပွၵ်ႈၶိုၼ်းၼႂ်းမိူင်းထႆး။ လိူဝ်ၼၼ်ႉ လိူဝ်သေၵူၼ်းပိုၼ်ႉတီႈတႆး မၢၼ်ႈ/ ထႆး ၵူၼ်းတၢင်ႇၸၢတ်ႈ တႄႉ ဢမ်ႇပၼ်ၵႂႃႇမႃးယဝ်ႉ ဝႃႈၼႆ။
ၵၼ်းမိူင်းၶႄႇ 537 ၵေႃႉၼၼ်ႉ လုၵ်ႉတၢင်းပိုၼ်ႉတီႈ သျိင်ႊၵျၢၼ်ႊ မိူင်းၶႄႇမႃး မိူဝ်ႈဝၼ်းတီႈ 6 လိူၼ်မၢတ်ႉၶျ် ၶဝ်ႈမႃး တၢင်း မိူင်းၵွၵ်ႇ ၸိုင်ႈထႆး ယဝ်ႉၵေႃႈ သိုပ်ႇမႃးတၢင်း ၵဵင်းမႆႇ မႄႈသၢႆသေ ႁဵတ်းဝႂ်ၶၢမ်ႈမိူင်း EP (Entry Permit) သေ ၶဝ်ႈ မႃးဢႅဝ်ႇတၢင်းၾင်ႇတႃႈၶီႈလဵၵ်း ထုၵ်ႇထႆးႁၢမ်ႈဢမ်ႇပၼ်ၶဝ်ႈၶိုၼ်းလႄႈ ဢဝ်ၶမ်ဝႆႉယူႇတီႈၾင်ႇတႃႈၶီႈလဵၵ်း ဝႃႈၼႆ။
ၼၢင်းႁွမ် လၢတ်ႈဝႃႈ “ ဢိင်ၼိူဝ် ထူပ်းႁၼ်ထၢင်ႇထိူမ် မိူၼ်ၵူၼ်းပဵၼ် တီႈႁူင်းႁႅမ်း 9 ၸၼ်ႉၼၼ်ႉသေ ႁဝ်းၶႃႈတႄႉ ဢွၼ် ၵၼ်မႆႈၸႂ်ၵၼ်ဝႆႉ ႁၢၼ်ႉၶၢႆၶူဝ်းၼႆႉ တေပိၵ်ႉၵေႃႈဢမ်ႇၸၢင်ႈ တေပိုတ်ႇၵေႃႈဢမ်ႇပေႃးၶႂ်ႈႁတ်း ၵူဝ်တၢင်းပဵၼ်ၵၼ်ၼၼ်ႉ ၶႃႈယဝ်ႉ” ဝႃႈၼႆ။
မိူဝ်ႈဝၼ်းတီႈ 16 ၼၼ်ႉၵေႃႈ ထၢင်ႇထိူမ်ထူပ်းႁၼ် မိူၼ်ၵူၼ်းပဵၼ် ၶူဝ်ႊဝိတ်ႊ 19 ၵူၼ်းၸၢဝ်းၶႄႇ ၵေႃႉၼိုင်ႈ တီႈႁူင်းႁႅမ်း 9 ၸၼ်ႉၼၼ်ႉသေ ႁူမ်ႈပႃး ဢူၺ်းၵေႃႉ ယူႇၸွမ်းထႅင်ႈၵေႃႉၼိုင်ႈ ယူႇတီႈၾၢႆႇမေႃယႃၶဝ် လႆႈၵၵ်းဢဝ်တူဝ် ၵႂႃႇၵူတ်ႇထတ်း တူၺ်းလိူတ်ႈၶဝ်သေ ဢွၵ်ႇမႃးၵႂၢမ်းတွပ်ႇဝႃႈ ၸၢဝ်းၶႄႇ ၽူႈၸၢႆး 2 ၵေႃႉၼၼ်ႉ ဢမ်ႇၸႂ်ႈၵူၼ်းၸပ်းတၢင်းပဵၼ် ၶူဝ်ႊဝိတ်ႊ 19 ဝႃႈၼႆ။
