ၶၢဝ်းမႆႈၼႆႉ ၾႆးမႆႈပႃႇတူၼ်းႁၢဝ်းသၼ်လွႆလၢႆႁူတ်ႈ လၢႆတူၼ်း ႁိူၼ်းၵူၼ်းဝၢၼ်ႈၼႂ်းၸႄႈဝဵင်းသီႇပေႃႉ လင် ႞ ၺႃးၾႆးမႆႈပႃႇလၢမ်းမႆႈလႄႈ ဢမ်ႇတၼ်းလႆႈသင်။
ဝၼ်းတီႈ 16/3/2020 ယၢမ်းၵၢင်ဝၼ်းၼၼ်ႉ ၾႆးမႆႈပႃႇသေလၢမ်းမႆႈမႃးႁိူၼ်း ၸၢႆးတဵင်းမွင်ႇလႄႈ ၼၢင်းၶိၼ်ႇတၢၼ်း ဝၢၼ်ႈၼွင်ၼိဝ်ႉ ဢိူင်ႇ ၼႃးၼိဝ်ႉ ၸႄႈဝဵင်းသီႇပေႃႉ ၸိုင်ႈတႆးပွတ်းႁွင်ႇ လင်ၼိုင်ႈ ၶူဝ်းၶွင်ႁိူၼ်းယေး ဢမ်ႇတၼ်းလႆႈသင် ပႃးၵႂႃႇၸွမ်းၾႆးမူတ်း။
ၸၢႆးဢွင်ႇ ၵူၼ်းၼႂ်းဢိူင်ႇၼႃးၼိဝ်ႉ လၢတ်ႈတီႈၽူႈတွႆႇႁွၵ်ႈဝႃႈ “ ၾႆးမႆႈပႃႇသေ ၶႆႇၾႆး မႃးတူၵ်းသႂ်ႇ တီႈသိုင်ႇယွင်ၶဝ်ႈၶဝ် ဢွၼ်တၢင်းသေ လၢမ်းမႆႈပႃးႁိူၼ်းယေးၼၼ်ႉၶႃႈၼႃႇ။ မိူဝ်ႈၽွင်းၼၼ်ႉ ၸဝ်ႈႁိူၼ်းဢမ်ႇယူႇ ဢွၼ်ၵၼ်ၵႂႃႇႁဵတ်းၵၢၼ်။ ၶူဝ်းၶွင်ႁိူၼ်းယေး ဢမ်ႇတၼ်းလႆႈသင် ပႃးၵႂႃႇၸွမ်းၾႆးတင်းမူတ်းၶႃႈယဝ်ႉ” ဝႃႈၼႆ။
သိုပ်ႇလၢတ်ႈဝႃႈ “ တီႈဝၢၼ်ႈၼွင်ၼိဝ်ႉႁဝ်းၶႃႈၼၼ်ႉ ႁိူၼ်းၵူၼ်းၵေႃႈ ဢမ်ႇပေႃးၼမ် မိူဝ်ႈၽွင်းၼၼ်ႉ ၵူၼ်းဝၢၼ်ႈဢွၼ် ၵၼ်ၵႂႃႇႁဵတ်းၵၢၼ်ၵၼ် ဢၼ်ပႂ်ႉႁိူၼ်းသမ်ႉ ပဵၼ်ၵူၼ်းထဝ်ႈၵူၺ်း။ တေၵႂႃႇတၵ်းၼမ်ႉၵေႃႈၵႆ ၼမ်ႉၵေႃႈယၢပ်ႇၼၼ်ႉ ၶႃႈၼႃႇ” ဝႃႈၼႆ။
ဝၢၼ်ႈၼွင်ၼိဝ်ႉၼႆႉ တင်းမူတ်း မီးလင်ႁိူၼ်း 9 လင် ဝႃႈၼႆ။
ၾႆးဢၼ်လႆႈမႆႈႁိူၼ်းယေး ၸၢႆးတဵင်းမိၼ်ႉ ၼၢင်းၶိၼ်ႇတၢၼ်းၼႆႉ ပဵၼ်ႁိူၼ်းတိၼ်သုင် ၵင်ႈၽၢၵ်ႈ မုင်းၶႃး။ ယဝ်ႉၵေႃႈ မႆႈပႃးရူတ်ႉၶိူင်ႈလမ်းၼိုင်ႈ လႄႈ ၶဝ်ႈပိူၵ်ႇၼႂ်းယွင်လၢႆလၢႆၸေႃး ဝႃႈၼႆ။
ၾၢႆႇပႃႇမႆႉ လူင်ပွင်ၸိုင်ႈၵေႃႈႁၢမ်ႈၵူၼ်းဝၢၼ်ႈၸုတ်ႇပႃႇ၊ ပေႃးၾႆးမႆႈပႃႇၸမ်ဝၢၼ်ႈ ၸၢင်ႈမႆႈပႃးႁိူၼ်းယေးၵူၼ်းဝၢၼ်ႈ။
မိူဝ်ႈဝၼ်းတီႈ 8/3/2020 ၼၼ်ႉ ၾႆးမႆႈႁိူၼ်းၵူၼ်းဝၢၼ်ႈပဵင်းသႃႇ 5 လင် ၼႂ်းဢိူင်ႇဝၢၼ်ႈမွၼ်း ဝဵင်းၼမ်ႉလၼ်ႈ ၸႄႈဝဵင်း သီႇပေႃႉ။ ၼၼ်ႉၵေႃႈ ပဵၼ်ယွၼ်ႉၾႆးမႆႈပႃႇလၢမ်းမႆႈၼင်ႇၵဝ်ႇ ဝႃႈၼႆ။
