ၵူၼ်းမိူင်း ပွတ်းမိူင်းၼွင် – ၵေးသီး မႆႈၸႂ် ၵူဝ်ပဵၼ်ပၢင်တိုၵ်းထႅင်ႈ ယွၼ်ႉသိုၵ်းလူင်ပွင်ၸိုင်ႈမၢၼ်ႈ တိုၵ်ႉထႅမ်ႁႅင်းသိုၵ်းမုင်ႈ ၸူးတၢင်းလွႆႁူၼ်း တီႈ RCSS/SSA ပၵ်းသဝ်းဝႆႉ။

ဝၼ်းတီႈ 15/3/2020 ၼႆႉ တပ်ႉသိုၵ်းလူင်ပွင်ၸိုင်ႈမၢၼ်ႈ ထႅမ်ႁႅင်းသိုၵ်း မုင်ႈၼႃႈၸူးတၢင်းပွတ်းလွႆႁူၼ်း ၼႂ်းၸႄႈဝဵင်း ၵေးသီး တင်းၼမ် ၵူၼ်းမိူင်းဢွၼ်ၵၼ်မႆႈၸႂ် ၵူဝ်ပဵၼ်ပၢင်တိုၵ်းၵၼ်ထႅင်ႈႁၢဝ်ႈႁႅင်း ဝႃႈၼႆ။

ၸၢႆးၸၢမ်ႇမိူင်း ၽူႈတႅၼ်းသၽႃးၸႄႈမိူင်းၶဵတ်ႇလိူၵ်ႈတင်ႈမၢႆ 1 ၸႄႈဝဵင်းၵေးသီး လၢတ်ႈတီႈၽူႈတွႆႇႁွၵ်ႈဝႃႈ “ မိူဝ်ႈဝၼ်းတီႈ 15 ၼၼ်ႉတႄႉ သိုၵ်းမၢၼ်ႈ တူင်ႉၼိုင် ထႅမ်ႁႅင်းသိုၵ်း လုၵ်ႉဢဝ် မိူင်းၼၢင်း ထိုင် မိူင်းၵၢဝ် ၼွင်သွမ်း သွင်ၾၢၵ်ႇၶၢင်ႈတၢင်း ၼႆႉ ပဵၼ်သၢႆသိုၵ်းၶဝ် ပေႃးတဵမ်တၢင်းလူင်ဝႆႉၶႃႈယဝ်ႉ”ဝႃႈၼႆ။

ၶၢဝ်းတၢင်း 2-3 ဝၼ်းမႃးၼႆႉ တပ်ႉသိုၵ်းလူင်ပွင်ၸိုင်ႈမၢၼ်ႈ ထႅမ်ႁႅင်းသိုၵ်း မုင်ႈၸူး တၢင်းပွတ်းလွႆႁူၼ်း တင်းၼမ်သေ ၵူၼ်းမိူင်းမႆႈၸႂ် ၵူဝ်ပဵၼ်ပၢင်တိုၵ်းၵၼ်တင်း တပ်ႉသိုၵ်း RCSS ထႅင်ႈ ဝႃႈၼႆ။

လုင်းသၢင်ႇၸၢႆး ၵူၼ်းၵေးသီး လၢတ်ႈတီႈၽူႈတွႆႇႁွၵ်ႈဝႃႈ “ တေႃႈလဵဝ်ၼႆႉ တၢင်းၼႃႈလွႆႁူၼ်း သိုၵ်းမၢၼ်ႈ ၶဵင်ႈၶႅင်ၵၢၼ် သိုၵ်းဝႆႉ ၶဝ်ဢမ်ႇထတ်းၵူၼ်းၵႂႃႇမႃးသေတႃႉၵေႃႈ လွမ်မႆႈၸႂ်ၵၼ်ယူႇၶႃႈဢေႃႈ ယူဝ်ၶႄးသိုၵ်းမၢၼ်ႈၶဝ် ပႂ်ႉလုၵ်ႈဢွၼ်ႇတွပ်ႇ လိၵ်ႈၸၼ်ႉသိပ်းယဝ်ႉၵူၺ်းယူဝ်ႉ” ဝႃႈၼႆ။

သိုၵ်းလူင်ပွင်ၸိုင်ႈမၢၼ်ႈ ဢၼ်ထႅမ်ႁႅင်းသိုၵ်း တူင်ႉၼိုင်ၶဝ်ႈၸူး တၢင်းပွတ်းလွႆႁူၼ်းၼႆႉ ၵမ်ႈၼမ် ပဵၼ်သိုၵ်းဢၼ်လုၵ်ႉ တၢင်းမိူင်းၼွင်မႃးၵေႃႈမီး ၸိူဝ်းလုၵ်ႉတၢင်းလွႆတွၼ်း ၵေးသီးမႃးၵေႃႈမီး ၸၢႆးၸၢမ်ႇမိူင်း ၽူႈတႅၼ်းသၽႃး လၢတ်ႈၼႄ ၼင်ႇၼႆ။

ဢိင်ၼိူဝ်လွင်ႈပဵၼ်ပၢင်တိုၵ်းၵၼ် တၢင်းပွတ်းလွႆတွၼ်း ဢိူင်ႇႁၢမ်းငၢႆး ၸႄႈဝဵင်းမိူင်းၵိုင် မိူဝ်ႈႁၢင်လိူၼ်ၾႅပ်ႊၿိဝ်ႊရီႊ ၼၼ်ႉသေ သိုၵ်းလူင်ပွင်ၸိုင်ႈမၢၼ်ႈ ၶိုၼ်ႈလေႃႇတိုၵ်း တပ်ႉသိုၵ်း RCSS ႁၢဝ်ႈႁႅင်း ထိုင်တီႈသိုၵ်း RCSS ပေႃးလႆႈ ငိူင်ႉ ဝႄႈထွၼ်ဢွၵ်ႇပိုၼ်ႉတီႈပၼ်။ လိူဝ်ၼၼ်ႉ ၵူၼ်းမိူင်းၼပ်ႉႁူဝ်ပၢၵ်ႇၵေႃႈ လႆႈပၢႆႈၽေးသိုၵ်း ဝႃႈၼႆ။

မိူဝ်ႈဝၼ်းတီႈ 15/3/2020 ၼၼ်ႉ ၸုမ်းဢုပ်ႇဢူဝ်းငူပ်ႉငီႉ RCSS တင်း ၸုမ်းဢုပ်ႇဢူဝ်းငူပ်ႉငီႉ တပ်ႉသိုၵ်းလူင်ပွင်ၸိုင်ႈ မၢၼ်ႈ ႁူပ်ႉဢုပ်ႇၵၼ် တီႈၼေႇပျီႇတေႃႇ။ ၾၢႆႇ RCSS ဝႃႈ ၵၢၼ်ဢုပ်ႇဢူဝ်းၶိုပ်ႈၼႃႈ ၶႅမ်ႉလႅပ်ႈၼႆသေတႃႉ ၼႂ်းပိုၼ်ႉတီႈ တႄႉ သိုၵ်းမၢၼ်ႈယင်းပႆႇလူတ်းယွမ်းႁႅင်းသိုၵ်း ဢွၵ်ႇပိုၼ်ႉတီႈသေဢမ်ႇၵႃး ယင်းတိုၵ်ႉထႅမ်ႁႅင်းသိုၵ်း ထႅင်ႈယူႇလႄႈ ႁဵတ်းႁႂ်ႈၵူၼ်းမိူင်းမႆႈၸႂ်ၵူဝ်ပဵၼ်ပၢင်တိုၵ်း။