ပွႆးသၢင်ႇလွင်း ဝတ်ႉ/ ၵျွင်းပၢင်ႇ လၢႆးၶႃႈ လႄႈ ဝတ်ႉဝေႇလုဝၼ်ႇ ဝဵင်းၵႃလိ ၸိူဝ်းၼႆႉ ၼႂ်းပီၼႆႉ တေဢမ်ႇၸတ်းႁဵတ်းယဝ်ႉ ယွၼ်ႉတၢင်းပဵၼ်ၸိူဝ်ႉမႅင်းၶူဝ်ႊရူဝ်ႊၼႃႊ(ၶူဝ်ႊ ဝိတ်ႊ – 19) ၽႄႈလၢမ်းၸပ်းငၢႆႈဝႆး။
ယူႇတီႈၸုမ်းပွင်ၵၢၼ် ၵျွင်းပၢင်ႇ ပွင်ႇလႅင်းထိုင် တၵ်ႉၵႃႇသတ်ႉထႃးၵူႈၵေႃႉဝႃႈ လွင်ႈၸတ်းႁဵတ်းပွႆးသၢင်ႇလွင်း တီႈၵျွင်း ပၢင်ႇ ၸႄႈဝဵင်းလၢႆးၶႃႈၼႆႉ ပီၼႆႉ တေဢမ်ႇပဵၼ်ၸတ်းႁဵတ်းယဝ်ႉ ဢိင်ၼိူဝ်သၢႆငၢႆပၢႆးယူႇလီ ၼႂ်းလူၵ်ႈ(ၵမ်ႇၽႃႇ) ၸိူဝ်ႉမႅင်း ၶူဝ်ႊရူဝ်ႊၼႃႊ (ၶူဝ်ႊဝိတ်ႊ-19) ဢၼ်ပဵၼ်ၽေး ၽႄႈလၢမ်းၸပ်းငၢႆႈဝႆးၼႆႉ ဝႃႈၼႆ။
ၸဝ်ႈၶူး ၽူႈတူင်ႉၼိုင် ၼႂ်းမုၵ်ႉၸုမ်းသင်ၶၸဝ်ႈ တူင်ႇဝဵင်းလၢႆးၶႃႈ လၢတ်ႈတီႈၽူႈတွႆႇႁွၵ်ႈဝႃႈ “ တီႈၵျွင်းပၢင်ႇတႄႉ ပိုၼ် ၽၢဝ်ႇဢွၵ်ႇဝႆႉ တႅတ်ႈတေႃးယဝ်ႉၶႃႈ ပီၼႆႉ တေဢမ်ႇၸတ်းႁဵတ်းယဝ်ႉ ပွႆးသၢင်ႇလွင်း။ ယွၼ်ႉဝႃႈ ၵူဝ်ၸပ်းတၢင်း ပဵၼ်ၵၼ် ၼႆႉၶႃႈယဝ်ႉ။ လိူဝ်ၼၼ်ႉ တၢင်ႇၵျွင်း တႄႉ ဢမ်ႇပႆႇလႆႈႁူႉ။ တေၸတ်းႁိုဝ် ဢမ်ႇၸတ်းႁိုဝ် ဢၼ်ဝႃႈၼၼ်ႉ” ဝႃႈၼႆ။
တီႈဝတ်ႉၵျွင်းပၢင်ႇ ပီၼႆႉ ဢၢၼ်းႁဵတ်း သၢင်ႇလွင်း 56 တူၼ် ဝႃႈၼႆ။
ၼႂ်းတူင်ႇဝဵင်းလၢႆးၶႃႈ ဢၼ်တေၸတ်းႁဵတ်းပွႆးသၢင်ႇလွင်းသမ်ႉ မိူၼ်ၼင်ႇ ဝတ်ႉ/ ၵျွင်းပၢင်ႇ၊ ဝတ်ႉႁူၺ်ႈယဵၼ်ႇ၊ ဝတ်ႉ ၵျွင်းတေႃႇႁူဝ်ဝဵင်း၊ ဝတ်ႉၼမ်ႉလိူဝ်ႇလႄႈ ဝတ်ႉဝႃႇသူဝ်ႇ ၸိူဝ်းၼႆႉ။
ၸဝ်ႈၶူး သိုပ်ႇလၢတ်ႈဝႃႈ “ တီႈၵျွင်းဝႃႇသူဝ်ႇ၊ ၵျွင်းႁူၺ်ႈယဵၼ်ႇ၊ ၵျွင်းတေႃႇ ႁူဝ်ဝဵင်း သၢမ်ၵျွင်းၼႆႉတႄႉ ဢမ်ႇပႆႇယုၵ်ႉလိူၵ်ႈ ပေႃးငဝ်းလၢႆးလီ လင်လိူၼ်ဢေႊပရိူဝ်ႊ တေၸတ်းယူႇ။ ၵူၺ်းၵႃႈ ဝၼ်းမၼ်းတႄႉ ပႆႇတႅပ်းတတ်း။ တီႈဝတ်ႉဝၢၼ်ႈၸႅၼ်ႇ တႄႉ တႄႇႁဵတ်းပွႆးမိူဝ်ႈ ၼႆႉၵႂႃႇယဝ်ႉ။ ၵူၺ်းၵႃႈ တီႈဝၢၼ်ႈၼမ်ႉလိူဝ်ႇသမ်ႉ ၸုမ်းပွင်ၵၢၼ်ပွင်ပဵၼ်ပၢင်ပွႆး တိုၵ်ႉတေဢုပ်ႇ ဢူဝ်းၵၼ် မိူဝ်ႈၼႆႉ ယၢမ်း ၵၢင်ၶမ်ႈ လွင်ႈဝႃႈတေၸတ်း ဢမ်ႇၸတ်း ဢၼ်ဝႃႈၼၼ်ႉ” ဝႃႈၼႆ။
လိူဝ်ၼၼ်ႉ ပွႆးတၢင်ႇထီးၵွင်းမူးမၢၵ်ႇႁိၼ်ၼမ်ႉ ဢၼ်ၵေႃႇသၢင်ႈဝႆႉတီႈလွႆသၢမ်လုၵ်ႈ ၼႂ်းဢိူင်ႇဝၢၼ်ႈသၢင်းၼၼ်ႉ ဢၢၼ်း တေတၢင်ႇထီးလိူၼ်ႁႃႈမႂ်ႇ 13 ၶမ်ႈၼႆႉၵေႃႈ လႆႈယုၵ်ႉလိူၵ်ႈပႅတ်ႈ ဝႃႈၼႆ။
ၼွၵ်ႈလိူဝ်ၼၼ်ႉ ယူႇတီႈၸုမ်းၵေႃပွင်ပဵၼ်ပၢင်ပွႆးတီႈဝတ်ႉဝေႇလုဝၼ်ႇ ဝဵင်းၵႃလိၵေႃႈ ပိုၼ်ၽၢဝ်ႇထိုင် တၵ်ႉၵႃႇသတ်ႉထႃး ဝႃႈ တေဢမ်ႇၸတ်းႁဵတ်းပွႆးသၢင်ႇလွင်းယဝ်ႉ ယွၼ်ႉတၢင်းပဵၼ် ၸၢင်ႈၸပ်းငၢႆႈတၢႆဝႆး (ၶူဝ်ႊရူဝ်ႊၼႃႊ) ဢၼ်လၢမ်း ၽႄႈဝႆး တၢင်းမိူင်းၶႄႇၼၼ်ႉ ဝႃႈၼႆ။
မိူဝ်ႈဝၼ်းတီႈ 13/3/2020 ၼၼ်ႉၵေႃႈ တီႈၸၼ်ႉၸွမ် ပုတ်ႉထ မိူင်းတႆးၵေႃႈ ဢွၵ်ႇလိၵ်ႈပိုၼ်ၽၢဝ်ႇ ထိုင်တီႈၽူႈပွင်ၵၢၼ်၊ လုၵ်ႈႁဵၼ်းလႄႈ ၵူၼ်းႁဵတ်းၵၢၼ် တင်းသဵင်ႈဝႃႈ တေဢမ်ႇလႆႈၸတ်းပၢင်ယႂ်ႇလူင်သေ ဢၼ်ဢၼ် တီႉၸၼ်ႉၸွမ်။ ပေႃး ၽႂ်လုၵ်ႉၼွၵ်ႈမိူင်း ပွၵ်ႈမႃးၶိုၼ်းတီႈၸၼ်ႉၸွမ်ၸိုင် တေဢမ်ႇလႆႈၶဝ်ႈဢွၵ်ႇ ႁူပ်ႉထူပ်းၽႂ် (ယူႇသဝ်းဝႆႉ ႁင်းတူဝ်ၸဝ်ႈၵဝ်ႇ ၼႂ်းႁွင်ႈ) တႃႇၶၢဝ်းတၢင်း 14 ဝၼ်း။
လိူဝ်သေၼၼ်ႉ ၸၼ်ႉၸွမ်ၶႂ်ႈပၼ်တၢင်းၶႆႈၸႂ်ဝႃႈ ယႃႇပေဢွၵ်ႇၶၢဝ်းတၢင်းၼႂ်းမိူင်း လူၺ်ႈတၢင်းႁိူဝ်းမိၼ်၊ ႁႂ်ႈၾၢင်ႉသတိ ႁၢဝ်ႈႁႅင်း မိူဝ်ႈဢွၵ်ႇတႃႈပႆတၢင်းၼႂ်းမိူင်း ဝႃႈၼႆ။
မိူဝ်ႈဝၼ်းတီႈ 14/3/2020 ၼၼ်ႉၵေႃႈ ယူႇတီႈငဝ်ႈငုၼ်းမုၵ်ႉၸုမ်းလူင် သင်ႇၶႃႇၸိုင်ႈတႆးၵေႃႈ ဢွၵ်ႇလိၵ်ႈပိုၼ်ၽၢဝ်ႇ တိုၵ်း သူၼ်းပၼ်သတိထိုင် သင်ႇၶႃႇၸဝ်ႈ ၵူႈၸႄႈဝဵင်းလႄႈ ၵူၼ်းမိူင်းတႆး တင်းသဵင်ႈႁႂ်ႈဝႆႉသတိၵၼ် ဝႃႈၼႆ။
