ရူတ်ႉၵႃး ၸုမ်းၸၢတ်ႈသႅင်းႁႅင်းၵၢၼ်တႆး “ၵဵင်းမႆႇ” ဢၼ်ဢၢင်ႈၵႂႃႇၵႃႈၸၢတ်ႈ တီႈပွႆးသၢင်ႇလွင်းလွႆတႆးလႅင်းၼၼ်ႉ ၵႂႃႇ ပိၼ်ႈၶႂမ်ႈၸွမ်းတၢင်းလႄႈ ဢွၼ်ႇယိင်း ဢႃယု 7 ၶူပ်ႇ ၵေႃႉၼိုင်ႈ လႆႈလူႉတၢႆ ထင်တီႈ ဝႃႈၼႆ။
ဝၼ်းတီႈ 15/3/2020 ယၢမ်းဝၢႆးဝၼ်း ရူတ်းၵႃး ၸုမ်းၸၢတ်ႈတႆး 3 လမ်း လုၵ်ႉၵဵင်းမႆႇ တေၵႂႃႇၵႃႈသႅင်းတႆး တီႈပွႆးသၢင်ႇလွင်း ငဝ်ႈၸိုင်ႈလွႆတႆးလႅင်း ဢၼ်ဢၢၼ်းၸတ်းႁဵတ်းဝၼ်းတီႈ 16-19/3/2020 ၶၢဝ်းတၢင်း 3-4 ဝၼ်း။ ၼႂ်းၵႃး 3 လမ်းၼၼ်ႉ တႃႇ လမ်း႞ၵႂႃႇပိၼ်ႈ ပဵၼ်ၽေးဢုပၢတ်ႈ တၢင်းၶိုၼ်ႈလွႆ ငဝ်ႈၸိုင်ႈလွႆတႆးလႅင်း ဢွၼ်ႇယိင်း ဢႃယု 7 ၶူပ်ႇ ၵေႃႉၼိုင်ႈ ဝူင်တူၵ်း ၵႃး ၵႂႃႇသေ ၵႃးသမ်ႉလူမ်ႉတဵင်သႂ်ႇ/ ဢဝ်လူႉတၢႆထင်တီႈ ဝႃႈၼႆ။
လုင်းၸၢႆးၽူဝ်းဢွင်ႇ ၽူႈၼမ်းၸုမ်းသႅင်းတႆး ႁႅင်းၵၢၼ်ၽွမ်ႉႁူမ်ႈ လၢတ်ႈတီႈၽူႈတွႆႇႁွၵ်ႈဝႃႈ “ ႁဝ်းၶႃႈ မႃးၸွမ်းၵၼ် ၵႃး 3 လမ်း၊ တႃႇလမ်းၼိုင်ႈပဵၼ်ၽေးဢုပၢတ်ႈ ၶႃႈဢေႃႈ။ လွင်ႈၼႆႉ ႁဝ်းၶႃႈၵေႃႈ ဢမ်ႇမုင်ႈမွင်းႁႂ်ႈပဵၼ်ၶႃႈ လႆႈပဵၼ်ၵႂႃႇၸိူင်ႉၼႆ ႁဝ်းၶႃႈ ၸႂ်ဢမ်ႇလီတႄႉတႄႉ။ ႁႅင်းၸႂ်ၵေႃႈ ပေႃးတူၵ်းမူတ်းၶႃႈယဝ်ႉ။ ဢွၼ်ႇယိင်းဢၼ်လႆႈလူႉၵႂႃႇၼၼ်ႉ ပဵၼ်ၼၢင်းၸိူင်း ဢွၼ်ႇႁဝ်းၶႃႈၵေႃႉၼိုင်ႈၶႃႈ ဢေႃႈ”ဝႃႈၼႆ။
ၼႂ်းၵႃး ဢၼ်ပိၼ်ႈၶႂမ်ႈၵႂႃႇၼၼ်ႉ တင်းမူတ်းၵူၼ်းၶီႇမႃးၸွမ်းၵၼ် 9 ၵေႃႉ ၵူၼ်းလူင် 7 ၵေႃႉလႄႈ လုၵ်ႈဢွၼ်ႇ ဢႃယု 7 ၶူပ်ႇ ၵေႃႉၼိုင်ႈ တင်းလုၵ်ႈဢွၼ်ႇ ဢႃယု 11 လိူၼ်ၵေႃႉၼိုင်ႈ။ တႃႇလုၵ်ႈဢွၼ်ႇ 7 ၶူပ်ႇၼၼ်ႉတႄႉ လႆႈလူႉသဵင်ႈၵႂႃႇထင် တီႈၼၼ်ႈ။ တႃႇၵူၼ်းလူင် ၵေႃႉၼိုင်ႈ ၸိုဝ်ႈႁွင်ႉ ၼၢင်းသႅင်မွၼ်းတႄႉ လႆႈတိူဝ်ႉမၢတ်ႇၸဵပ်းဝႆႉႁၢဝ်ႈႁႅင်း ဝႃႈၼႆ။
ဢွၼ်ႇယိင်း ဢၼ်လႆႈလူႉသဵင်ႈၵႂႃႇၼၼ်ႉ ၸိုဝ်ႈႁွင်ႉ ၼွင်ႉသႅင်ယုမ်ႉ ဢႃယု 7 ၶူပ်ႇ ပဵၼ်လုၵ်ႈယိင်း ပေႃႈၸၢႆးသႃႇလူႇ လႄႈ မႄႈၼၢင်းၺုၼ်ႉ ဢၼ်လုၵ်ႉမိူင်းတႆးမႃးႁဵတ်းၵၢၼ်ၵဵင်းမႂ်ႇသေ ၶဝ်ႈပႃးၼႂ်းၸုမ်းၸၢတ်ႈသႅင်းတႆးဝႆႉ ဝႃႈၼႆ။
ႁႅင်းၵၢၼ်တႆး ၵေႃႉၼိုင်ႈ ဢၼ်ၵႆႉယၢမ်ႈၵႂႃႇၶဝ်ႈပွႆးဝၼ်းၸိူဝ်ႉၸၢတ်ႈၸိုင်ႈတႆး တီႈငဝ်ႈၸိုင်ႈလွႆတႆးလႅင်းၼၼ်ႉ လၢတ်ႈဝႃႈ “ သင်ဝႃႈ ပီႈၼွင်ႉႁဝ်းၶႃႈ တေဢွၼ်ၵၼ်ၵႂႃႇၶိုၼ်ႈလွႆတႆးလႅင်းၸိုင် ႁႂ်ႈဢွၼ်ၵၼ်ဝႆႉသတိၵၼ်ၽွင်ႈ လွင်ႈႁေႃႈရူတ်ႉၵႃးၶိုၼ်ႈ ၼႆႉ။ သင်ဢမ်ႇပေႃးလူင်ႉလႅၼ်ႇသဵၼ်ႈတၢင်းၼႆ ယႃႇပေႁေႃႈၶိုၼ်ႈၶႃႈ။ ယွၼ်ႉဝႃႈ သဵၼ်ႈတၢင်းၸၼ်း၊ ဢမ်ႇပေႃးလီၶႃႈ။ ၶႂ်ႈႁႂ်ႈပီႈၼွင်ႉႁဝ်းၶႃႈ ဢွၼ်ၵၼ်ၾၢင်ႉသတိၵၼ်ယႂ်ႇၼမ်သေၵမ်း မိူဝ်ႈၶိုၼ်ႈမိူဝ်ႈလူင်းၶႃႈ”ဝႃႈၼႆ။
ၶၢဝ်းလိူၼ်သီႇ/ လိူၼ်ႁႃႈၼႆႉ ပဵၼ်ၶၢဝ်း ၸၢဝ်းတႆး ၸိူဝ်းၵိူဝ်းလီပုတ်ႉထ ဢွၼ်ဢဝ်လုၵ်ႈလၢင်း ႁဵတ်းပွႆးသၢင်ႇလွင်း၊ ပၢင်ပွႆး ပဵၼ်ၵႂႃႇ ၵူႈဢိူင်ႇ/ ၵူႈဝဵင်း/ ပီၼႆႉ ယွၼ်ႉတၢင်းပဵၼ်ဝူႊႁၢၼ် Covid 19 ၽႄႈလႄႈ မၢင်ဝဵင်းၵေႃႈ ယုၵ်ႉလိူၵ်ႈပိုၼ်ၽၢဝ်ႇ ဢမ်ႇ ၸတ်းႁဵတ်းၵေႃႈမီးမႃးလၢႆပၢင်။
