RCSS တင်း တပ်ႉသိုၵ်းလူင်ပွင်ၸိုင်ႈမၢၼ်ႈ ႁူပ်ႉထူပ်းဢုပ်ႇဢူဝ်းငူပ်ႉငီႉၵၼ် တီႈၼေႇပျီႇတေႃႇ။ ၵၢၼ်ဢုပ်ႇဢူဝ်းပွၵ်ႈၼႆႉ မီးလွင်ႈၾၢင်ႁၢင်ႈၶႅမ်ႉလႅပ်ႈလီလႄႈ သင်မီးပၼ်ႁႃမႃးတေသၢၼ်မိုဝ်းၵၼ်ႁူပ်ႉထူပ်းဢုပ်ႇဢူဝ်းၵၼ်သေ ၵႄႈလိတ်ႈပၼ် ႁႃၵႂႃႇ ဝႃႈၼႆ။
ဝၼ်းတီႈ 15/3/2020 ယၢမ်းၵၢင်ၼႂ် 10 မူင်း ထိုင် 12 မူင်း ၸုမ်းဢုပ်ႇဢူဝ်းငူပ်ႉငီႉ ၶွင်ႇသီႇဢဝ်ၶိုၼ်းၸိုင်ႈတႆး/ တပ်ႉသိုၵ်း ၸိုင်ႈတႆး RCSS/SSA လႄႈ ၸုမ်းဢုပ်ႇဢူဝ်းငူပ်ႉငီႉ တပ်ႉသိုၵ်းလူင်ပွင်ၸိုင်ႈမၢၼ်ႈ ႁူပ်ႉဢုပ်ႇၵၼ် တီႈၼေႇပျီႇတေႃႇ။ ၾၢႆႇ RCSS ၸွမ်ႁၢၼ် ပွင်ၶိူဝ်း ဢွၼ်ႁူဝ်ၾၢႆႇတပ်ႉသိုၵ်းလူင်ပွင်ၸိုင်ႈမၢၼ်ႈသမ်ႉ ၸွမ်သိုၵ်းယႃႇပျေႉ ဢွၼ်ႁူဝ် ဝႃႈၼႆ။
ၸဝ်ႈသိုၵ်း ဢုမ်ႈၶိူဝ်း ၽူႈၶၢၼ်ပၢၵ်ႇ RCSS လၢတ်ႈတီႈၽူႈတွႆႇႁွၵ်ႈဝႃႈ “ သွင်ၾၢႆႇ လႆႈဢုပ်ႇဢူဝ်းၵၼ် မိူဝ်ႈဝႃးတႄႉ ၶႅမ်ႉ လႅပ်ႈဢေႃႈ။ ၵဵဝ်ႇလူၺ်ႈလွင်ႈ ၶၵ်ႉၵၢၼ်လွင်ႈငမ်းယဵၼ်၊ လွင်ႈတမ်းဝၢင်းတပ်ႉ တၢင်းသွင်ၾၢႆႇ၊ ၶၵ်ႉၵၢၼ် JMC၊ လွင်ႈၵၢၼ် ပူၵ်းပွင် ႁုၼ်ႈ မုၼ်း ၶိုၼ်ႈယႂ်ႇ ၵူၼ်းမိူင်းလႄႈ လွင်ႈပၼ်ပိုၼ်ႉႁူႉ ၵႅတ်ႇၶႄႁႄႉၵင်ႈ တၢင်းပဵၼ် ၶူဝ်ႊရူဝ်ႊၼႃႊ (ၶူဝ်ႊဝိတ်ႊ -19) ၸဵမ်ၸိူဝ်း ၼႆႉ” ဝႃႈၼႆ။
သိုပ်ႇလၢတ်ႈဝႃႈ “ၵဵဝ်ႇလူၺ်ႈလွင်ႈတမ်းဝၢင်းတီႈယူႇတပ်ႉသိုၵ်းတင်းသွင်ၾၢႆႇၼၼ်ႉတႄႉ လႆႈဢုပ်ႇၵၼ် ယႃႇႁႂ်ႈလႆႈသိုပ်ႇ ပဵၼ် ပၢင်တိုၵ်းၵၼ်ထႅင်ႈ။ ယဝ်ႉၵေႃႈ မိူဝ်းၼႃႈမႃး ထုၵ်ႇလီတမ်းဝၢင်းဝႆႉၸိူင်ႉႁိုဝ် ထုၵ်ႇလီၶၢႆႉတီႈယူႇၸိူင်ႉႁိုဝ်ၵၼ် ၼႆၸိူဝ်း ၼႆႉ တေမီးလွင်ႈထူပ်းဢုပ်ႇၵၼ်ပေႃးမီးပၼ်ႁႃမႃးၵေႃႈ တေသၢၼ်မိုဝ်းၵၼ်ၵႄႈလိတ်ႈ” ဝႃႈၼႆ။
ၸဝ်ႈသိုၵ်း ဢုမ်ႈၶိူဝ်း လၢတ်ႈဝႃႈ “ လွင်ႈပဵၼ်ပၢင်တိုၵ်းၵၼ် တၢင်းမိူင်းၵိုင်ၼႆႉၵေႃႈ ႁဝ်းၶႃႈ လႆႈဢဝ်ဢုပ်ႇပႃးၼႂ်းပၢင်ဢုပ်ႇ ဢူဝ်းၼႆႉယူႇ။ ပၢင်ဢုပ်ႇဢူဝ်းပွၵ်ႈၵမ်းၼႆႉ ပေႃးမႃးႁုပ်ႈတူၺ်းတႄႉ မီးလွင်ႈၾၢင်ႁၢင်ႈလီလႄႈ ၶိုပ်ႈၼႃႈမႃးလိူဝ်ၵဝ်ႇယူႇ” ဝႃႈၼႆ။
ၶွင်ႇသီႇဢဝ်ၶိုၼ်းၸိုင်ႈတႆး/ တပ်ႉသိုၵ်းၸိုင်ႈတႆး RCSS/SSA ၼႆႉ ပဵၼ်တပ်ႉသိုၵ်းၸိုင်ႈတႆး ဢၼ်လူင်းလၢႆးမိုဝ်းၵိုတ်း တိုၵ်းတူဝ်ႈမိူင်း NCA ဝႆႉ။ ၵူၺ်းၵႃႈ ၵႆႉၵႆႉၺႃးသိုၵ်းမၢၼ်ႈ ႁၢင်ႈသိုၵ်းလေႃႇတိုၵ်း။
မိူဝ်ႈပၢင်တိုၵ်းႁၢင်လိူၼ် ၾႅပ်ႊၿိဝ်ႊရီႊ 29/2/2020 – 3/3/2020 ၼၼ်ႉ ၾၢႆႇတပ်ႉသိုၵ်းၸိုင်ႈတႆး လႆႈၶၢႆႉထွၼ်ပၼ်တပ်ႉပၢင် သဝ်း 2 တီႈ လႄႈ ပၢင်တိုၵ်းၸင်ႇယဵၼ်ၵႂႃႇ။ ၾၢႆႇတပ်ႉသိုၵ်းမၢၼ်ႈတႄႉ ယင်းပႆႇထွၼ်ႁႅင်းသိုၵ်း တိုၵ်ႉထႅမ်ႁႅင်းသိုၵ်းထုင်ႉ လွႆႁူၼ်း ၼႂ်းၵႄႈမိူင်းၼွင် – ၵႄးသီး မိူင်းၵၢဝ် တေႃႇထိုင်မိူဝ်ႈဝႃး 15/3/2020ၼႆႉယူႇ။
