ပၢင်ၾိုၵ်းၽွၼ်ႉမေႃသွၼ် တီႈလၢႆးၶႃႈပီၼႆႉ ၵိုၼ်းၶွၼ်ႈၼမ်လီ

ပၢင်ၾိုၵ်းၽွၼ်ႉ မေႃသွၼ် ၾိင်ႈငႄႈပုတ်ႉထ ႁူင်းႁဵၼ်းထမ်ႇမလႄႈ လိၵ်ႈလၢႆးတႆး တီႈတူင်ႇဝဵင်းလၢႆးၶႃႈ ပီၼႆႉ မီးသင်ၶ ၸဝ်ႈလႄႈ ၵူၼ်းၼုမ်ႇ ၶဝ်ႈႁူမ်ႈၾိုၵ်းၽွၼ်ႉ 280 ပၢႆ။

ယူႇတီႈၸုမ်းသင်ၶၸဝ်ႈ တူင်ႇဝဵင်းလၢႆးၶႃႈ ဢွၼ်ႁူဝ်ၼမ်းၼႃႈ ပိုတ်ႇပၢင်ၾိုၵ်းၽွၼ်ႉ ပၼ်သင်ၶၸဝ်ႈလႄႈ ၵူၼ်းၼုမ်ႇ တႃႇပဵၼ်ၶူးသွၼ် တီႈဝတ်ႉၵျွင်းၶမ်း ၸႄႈဝဵင်းလၢႆးၶႃႈ ၸႄႈတွၼ်ႈလွႆလႅမ် ၸိုင်ႈတႆးပွတ်းၸၢၼ်း ၾိုၵ်းၽွၼ်ႉပၼ် တႃႇ ၶၢဝ်းတၢင်း 4 ဝၼ်း တႄႇဢဝ် ဝၼ်းတီႈ 11-14/3/2020။

ၸဝ်ႈၶူး ၽူႈပွင်ၵၢၼ် ပၢင်ၾိုၵ်းၽွၼ်ႉ ၸဝ်ႈၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ “ ယိူင်းဢၢၼ်းတႄႉ ၼင်ႇႁိုဝ် ၼေႃႇတႅၼ်း ၶိူဝ်းဢွၼ်ႇႁဝ်း ပေႃးတေမေႃလူ၊ မေႃတႅမ်ႈ၊ မေႃဢၢၼ်ႇ လိၵ်ႈတႆးသေ မေႃႁၵ်ႉၾိင်ႈငႄႈ ၾိင်ႈထုင်းတႆးၼႆႉၵေႃႈ ပိူင်ၼိုင်ႈ။ ယဝ်ႉၵေႃႈ ႁႂ်ႈမေႃႁၵ်ႉၸိူဝ်ႉၸၢတ်ႈဝၢၼ်ႈမိူင်းၵေႃႈပိူင်ၼိုင်ႈ။ လိူဝ်ၼၼ်ႉ ပေႃးတေမေႃမီးသုၼ်ႇတူဝ် ႁူဝ်ၸႂ် ဢူၼ်ႈဢွၼ်ႇ သေဢမ်ႇၵႃး ႁႂ်ႈပေႃးႁူႉပိုၼ်းဝၢၼ်ႈမိူင်း၊ ႁူႉပိုၼ်းၽြႃးၼၼ်ႉၵေႃႈပိူင်ၼိုင်ႈသေ ၸင်ႇလႆႈၸတ်းပၢင်ၾိုၵ်း ၽွၼ်ႉၼႆႉ” ဝႃႈ ၼႆ။

ယူႇတီႈသင်ၶၸဝ်ႈ တူင်ႇဝဵင်းလၢႆးၶႃႈ ဢွၼ်ၸတ်းႁဵတ်းပၢင်ၾိုၵ်းၽွၼ်ႉ မေႃသွၼ်ပၼ်သင်ၶၸဝ်ႈလႄႈ ၵူၼ်းၼုမ်ႇၼႆႉ ပဵၼ်ပွၵ်ႈၵမ်း 6 ယဝ်ႉ ဝႃႈၼႆ။

ၼႂ်းပၢင်ၾိုၵ်းၽွၼ်ႉၼႆႉ မီးၼႃႇယၵသင်ၶၸဝ်ႈ 4 တူၼ်၊ ၽူႈပွင်ၵၢၼ်လုမ်း 6 တူၼ်၊ ၶူးပူင်သွၼ်သင်ၶၸဝ်ႈ 14 တူၼ် လႄႈ ၶူးပူင်သွၼ်ယိင်း 4 ၵေႃႉ။

ၽူႈမႃးၶဝ်ႈႁဵၼ်းပၢင်ၾိုၵ်းၽွၼ်ႉ မေႃသွၼ်ၼႆႉ မီး သင်ၶၸဝ်ႈ 50 တူၼ်၊ မေႃသွၼ်ၸၢႆး 38 ၵေႃႉလႄႈ မေႃသွၼ်ယိင်း 172 ၵေႃႉ ႁူမ်ႈတင်းမူတ်းလႄႈ ၽူႈပွင်ၵၢၼ်တင်းမူတ်း တေမီး 288 တူၼ်/ ၵေႃႉ။