ၵူၼ်းဝၢၼ်ႈႁူဝ်လိုင်း တုၵ်းယွၼ်းထိုင်တီႈလူင်ပွင်ၸိုင်ႈ ႁႂ်ႈပူၵ်းပွင်မူၼ်ႉမႄးပၼ် လွင်ႈသဵၼ်ႈတႃႈသၢႆတၢင်း၊ ၼမ်ႉၸႂ်ႉလႄႈ ၾႆးၾႃႉ ၸိူဝ်းၼႆႉ။
ဝၼ်းတီႈ 8/3/2020 ဝၼ်းလိူၼ်သီႇမူၼ်းၼၼ်ႉ မီးသင်ၶၸဝ်ႈလႄႈ ၵူၼ်းဝၢၼ်ႈၵူၼ်းမိူင်း ၶဝ်ႈပွႆးလူႇတၢၼ်းဝႆႈသႃ ထၢတ်ႈၸႅတ်ႈမူၺ်ႇတေႃႇ ႁူဝ်လိုင်း ဢၼ်မီးႁိမ်းၾင်ႇၼမ်ႉၶူင်း ၼႂ်းဢိူင်ႇပႅတ်ႇၵၢင်ႉ ၸႄႈဝဵင်းမိူင်းပဵင်း ၵိုၼ်းၶွၼ်ႈၼမ်လီ မိူၼ်ၵူႈပီ။
ထၢတ်ႈမူၺ်ႇတေႃႇႁူဝ်လိုင်းၼႆႉ တင်ႈယူႇ ၵၢင်ၸိုင်ႈတႆး၊ ပီႈၼွင်ႉမိူင်းတႆး ပွတ်းႁွင်ႇ၊ ပွတ်းၸၢၼ်း၊ ပွတ်းဢွၵ်ႇ မႃးဝႆႈသႃငၢႆႈ လႄႈ ဢမ်ႇၸႂ်ႈလိူၼ်သီႇၵေႃႈ ၵူၼ်းမႃးဝႆႈမႃးဢႅဝ်ႇယဵမ်ႈၵိုၼ်းၶွၼ်ႈယူႇတႃႇသေႇ။ ၵွပ်ႈၼႆ ယူႇတီႈၵူၼ်းဝၢၼ်ႈႁူဝ်လိုင်း ဢွၼ်ၵၼ် တုၵ်းယွၼ်းထိုင်တီႈ လူင်ပွင်ၸိုင်ႈ ႁႂ်ႈၶပ်းၶိုင်ပၼ် လွင်ႈၼမ်ႉၸႂ်ႉ၊ ၾႆးၾႃႉလႄႈ သဵၼ်ႈတႃႈသၢႆတၢင်း ၸိူဝ်းၼႆႉ ႁႂ်ႈလီလိူဝ်ၵဝ်ႇ ဝႃႈၼႆ။
ပႃႈၼၢင်းမျႃႉၼွႆႇ ၵူၼ်းဝၢၼ်ႈႁူဝ်လိုင်း လၢတ်ႈတီႈၽူႈတွႆႇႁွၵ်ႈဝႃႈ “ ယူႇတီႈႁဝ်းၶႃႈ ၵူၼ်းဝၢၼ်ႈတႄႉ ၶႂ်ႈတုၵ်းယွၼ်းထိုင် တီႈၽူႈမီးပုၼ်ႈၽွၼ်း လူင်ပွင်ၸိုင်ႈၶဝ် ႁႂ်ႈမႃးသိူဝ်ႇတၢင်းပၼ် ႁႂ်ႈပေႃးႁွတ်ႈထိုင်တီႈထၢတ်ႈမူၺ်ႇတေႃႇ။ သဵၼ်ႈတၢင်းႁူဝ် ၵေႃႈၼႆႉၶႃႈဢေႃႈ။ လိူဝ်ၼၼ်ႉ ၼမ်ႉၸႂ်ႉလႄႈ ၾႆးၾႃႉ ၸဵမ်ၸိူဝ်းၼႆႉ။ ယွၼ်ႉဝႃႈ သဵၼ်ႈတၢင်းၼႆႉ ပေႃးၶၢဝ်းႁႅင်ႈၼႆၾုၼ်ႇ မုၵ်ႉၼမ်၊ ပေႃးၶၢဝ်းၾူၼ်သမ်ႉ ၵႂႃႇမႃးယၢပ်ႇႁႅင်းၼႃႇ” ဝႃႈၼႆ။
ပၢင်ပွႆးၶိုၼ်ႈထၢတ်ႈ မူၺ်ႇတေႃႇထၢတ်ႈၸႅတ်ႈႁူဝ်လိုင်းၼႆႉ ၸိုဝ်ႈသဵင်လိုဝ်းလင်၊ ဢႅဝ်ႇယဵမ်ႈမုင်ႈသႃႇလႄႈ မီးပီႈၼွင်ႉတၢင်ႇ ဝၢၼ်ႈတၢင်ႇဝဵင်း ဢွၼ်ၵၼ်လႆမႃးဝႆႈၽြႃး ႁဵတ်းတၢင်းလီၵုသူလ်ႇၼမ်။
တႃႇတေလႆႈတၢင်ႇသွမ်းတေႃႇ ဝၼ်းလိူၼ်သီႇမူၼ်း တီႈမူၺ်ႇတေႃႇႁူဝ်လိုင်းၼၼ်ႉ ပီႈၼွင်ႉလႆႈမႃးၼွၼ်းၶၢင်ႉၶိုၼ်းဝႆႉ၊ ယွၼ်ႉသဵၼ်ႈတၢင်းပႆႇလီ ဝႃႈၼႆ။
ပီၼႆႉ တၢင်းၸႄႈဝဵင်းၵေးသီး၊ မိူင်းၵိုင် ငဝ်းလၢႆးဝၢၼ်ႈမိူင်းဢမ်ႇပေႃးၼိမ်လႄႈ ပီႈၼွင်ႉမၢင်ၸိူဝ်းမႆႈၸႂ်သေ ဢမ်ႇပဵၼ် မႃး ဝႆႈၽြႃးၵေႃႈမီး။
တၢင်းပဵၼ်ၸိူဝ်ႉမႅင်းဝႆးရတ်ႉသ် (Covid – 19) ၽႄႈၸပ်း လူႉတၢႆၼမ်ၼႂ်း 100 ၸိုင်ႈမိူင်းပၢႆ ၼႂ်းလုမ်ႈၾႃႉသေတႃႉ၊ ၸွမ်းၼင်ႇလွင်ႈယုမ်ႇ ယမ်လႄႈ ပီႈၼွင်ႉတႆးတႄႉ လၢႆလၢႆၸႄႈဝဵင်းၸတ်းပၢင်ပွႆးလိူၼ်သီႇမူၼ်းယူႇ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ