ၸဝ်ႈသိလ်ထမ်းဝုၼ်းၸုမ်ႉ မဵတ်ႉတႃႇ/ပၼ်ၾၢင်ႉထိုင် ၵူၼ်းမိူင်း ႁႂ်ႈၾၢင်ႉယူႇ ၾၢင်ႉၵိၼ်ၵၼ် ၵူဝ်ၸပ်း တၢင်းပဵၼ်ႁၢႆႉတၢႆ ၼမ် ႁႂ်ႈႁၵ်ႉသႃပႃႇထိူၼ်ႇသတ်းမႅင်း ဝႃႈၼႆ။
ၼႂ်းဝၼ်းလိူၼ်သီႇမူၼ်း ဝၼ်းတီႈ 8/3/2020 ၼၼ်ႉ ၸဝ်ႈသိလ်ထမ်းဝုၼ်းၸုမ်ႉ (ၶူးဝႃးဝုၼ်းၸုမ်ႉ) မဵတ်ႉတႃႇတႅမ်ႈလိၵ်ႈ ထိုင် တၵ်ႉၵႃႇသတ်ႉထႃး လုၵ်ႈသိတ်ႇ တပႄး ၵူႈၵေႃႉၵူႈၵူၼ်း ယႃႇယူႇမဝ်လိုမ်းတူဝ် ႁႂ်ႈမေႃယူႇ မေႃၵိၼ် ၸွမ်းသိလ်ထမ်း တြႃး ဢွၼ်ၵၼ်ဝႆႈၽြႃး ဝၢၼ်းပရိတ်ႈၽႃႇဝၼႃႇ သူင်ႇမဵတ်ႉ တႃႇၼမ်ၼမ် ဝႃႈၼႆ။
ၸဝ်ႈၶူး ၺႃႇၼ သီႇရိ (ၸဝ်ႈမၢၼ်ႇတႃဢွၼ်ႇ) လၢတ်ႈတီႈၽူႈတွႆႇႁွၵ်ႈဝႃႈ “ ၽိုၼ်လိၵ်ႈ မဵတ်ႉတႃႇ ၸဝ်ႈၶူးဝႃး ပေႃးသိလ် ထမ်းဝုၼ်းၸုမ်ႉ 4 ၽိုၼ်ၼၼ်ႉ ပဵၼ်တူဝ်ၸဝ်ႈၶူးဝႃးပေႃႈ ၵေႃႉတႅမ်ႈမဵတ်ႉတႃႇထိုင်မႃး တီႈတၵ်ႉၵႃႇသတ်ႉထႃး တင်းသဵင်ႈ ၶႃႈယဝ်ႉ” ဝႃႈၼႆ။
ၼႂ်းၽိုၼ်လိၵ်ႈမဵတ်ႉတႃႇတြႃး ၸဝ်ႈသိလ်ထမ်းဝုၼ်းၸုမ်ႉၼၼ်ႉ တႅမ်ႈဝႆႉဝႃႈ “ ႁႂ်ႈၵူႈၵေႃႉ ၵူႈၵူၼ်း လႆႈႁူႉပွင်ႇၸႂ်ၽႂ်မၼ်း ႁဝ်းၸဝ်ႈပေႃႈဝုၼ်းၸုမ်ႉ မီးတူဝ်ၵတ်းယဵၼ် သျၢမ်းသႃႇယူႇလီသုင်းဝၢၼ် ႁဵတ်းၵၢၼ်တြႃး ၽႃႇဝၼႃႇၵေႃႈလီ မႃးတႄႉ ယဝ်ႉ။ တူဝ်မဝ် ၸႂ်မဝ် လူမ်ၸႂ် ၵူႈယၢင်ႇ ၵူႈပိူင်။ ဢမ်ႇမီးလွင်ႈၼွင်ႇတႃႉၼႅင်ၸႂ်သင် ပွႆႇဝၢင်းသဵင်ႈသဵင်ႈယဝ်ႉ” ဝႃႈၼႆ။
ၶူးဝႃးဝုၼ်းၸုမ်ႉ ပၼ်ၾၢင်ႉပႃးထႅင်ႈ ႁႂ်ႈၵူႈၵေႃႉ မေႃယူႇမေႃၵိၼ်ႁႂ်ႈဢွၼ်ၵၼ်ဝႄႈၼိူဝ်ႉသတ်း၊ ၸၢင်ႈပဵၼ်ရေႃးၵႃႇသေတၢႆ ၼမ်။ ႁႂ်ႈၵိၼ်ၽၵ်းယိူဝ်ႈၼၢင်းၶဵဝ်ၼမ်ၼမ် တေၸၢင်ႈၵၢင်းယၢၼ်တၢင်းပဵၼ်ၵႃႇလ ဝႃႈၼႆ။
ယၢမ်းမိူဝ်ႈလဵဝ် ပုတ်ႉထသႃသၼႃ တူၵ်းၶိုင်ႈလိူဝ်မႃး ၼႂ်းလေႃးၵၼႆႉ ဢၼ်မုၼ်ၶမ်းၽြႃး ပဵၼ်ၸဝ်ႈႁေႃးဝႆႉၼၼ်ႉ တိုၼ်း ပဵၼ်မႃးၸွမ်းၵၢပ်ႈၸွမ်းသၽႃႇဝ။ ၵူၼ်းၼႂ်းလေႃးၵၶူင်းၵၢင်ၼႆႉ ဢမ်ႇမီးသိလ်ထမ်းဢမ်ႇမီးၸႂ်မဵတ်ႉတႃႇ ၵရုၼႃႇၼိူဝ်ၵၼ် လႄႈ ၽေးၵၢပ်ႈလူင်သၢမ်ပႃး တေပဵၼ်မႃးဢမ်ႇႁၢင်ႉ။ ၵွပ်ႈၼႆႁႂ်ႈ ႁဵတ်းသၢင်ႈၵၢၼ်လီမီးၵုသူလ်တႃႇၼ သီႇလ ၽႃႇဝၼႃႇ သမထဝိပသ်ႉသၼႃႇ သတိပထၢၼ်ႇၵၼ် ဝႃႈၼႆ။
ၼွၵ်ႈလိူဝ်ၼၼ်ႉ ၸဝ်ႈသိလ်ထမ်းဝုၼ်းၸုမ်ႉ မဵတ်ႉတႃႇထိုင် တၵ်ႉၵႃႇသတ်ႉထႃး ပီႈၼွင်ႉမိူင်းၵႅတ်ႇ သွင်လိူၼ် ၼိုင်ႈပွၵ်ႈ ၸင်ႇႁႂ်ႈမႃးသူင်ႇၶဝ်ႈၼမ်ႉတၢင်းၵိၼ် ဝႃႈၼႆ။
ၸဝ်ႈၶူး ၺႃႇၼ သီႇရိ (ၸဝ်ႈမၢၼ်ႇတႃဢွၼ်ႇ) လၢတ်ႈဝႃႈ “ ပီၼႆႉ ၼိုင်ႈလိူၼ်ၼိုင်ႈပွၵ်ႈ ဢဝ်ၶူဝ်းလူႇ တၢင်းၵိၼ် ၵႂႃႇလူႇ တၢၼ်းပၼ်။ ပေႃးပီၼႆႉယဝ်ႉ ၸဝ်ႈၶူးဝႃးပေႃႈ မဵတ်ႉတႃႇထိုင် ႁႂ်ႈတၵ်ႉၵႃႇသတ်ႉထႃး သွင်လိူၼ်ၼိုင်ႈပွၵ်ႈ ၸင်ႇမိူဝ်းလူႇ တၢၼ်း ၶူဝ်းလူႇၶွင်ၵိၼ်” ဝႃႈၼႆ။
လိူဝ်ၼၼ်ႉ ၶူးဝႃးဝုၼ်းၸုမ်ႉ သင်ႇလၢတ်ႈႁႂ်ႈႁၵ်ႉပႃႇထိူၼ်ႇလႄႈ ဢီးလူတူဝ်သတ်း ဝႃႈၼႆ။
ၸဝ်ႈသိလ်ထမ်းဝုၼ်းၸုမ်ႉၼႆႉ တႄႇယေႃးတူဝ်ၶဝ်ႈထမ်ႈတိုဝ်းၵမ်သိလ် ၼႂ်းၶၢဝ်းတၢင်း 3 ပီ 3 လိူၼ် 3 ဝၼ်း တီႈထမ်ႈ မိူင်းၵႅတ်ႇ ဢိူင်ႇမိူင်းၵႅတ်ႇ ၸႄႈဝဵင်းမိူင်းတူၼ် ၸႄႈတွၼ်ႈမိူင်းသၢတ်ႇ ၸိုင်ႈတႆးပွတ်းဢွၵ်ႇၶူင်း။ တႄႇၶဝ်ႈထမ်ႈ တိုဝ်းၵမ် မိူဝ်ႈႁၢင်လိူၼ်ဢေႊပရိူဝ်ႊ 2019 မႃး။ ပေႃးထိုင်မႃး ဝၼ်းတီႈ 28 လိူၼ်ဢေႊပရိူဝ်ႊ 2020 ၼႆႉ တေတဵမ်ၼိုင်ႈပီယဝ်ႉ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ