ၵူၼ်းၶဝ်ႈပွႆး ၵူၼ်းၶၢႆၶူဝ်း ပွႆးလိူၼ်သီႇ မိူင်းၵိုင် ပႅတ်ႈယုၵ်းယၵ်း မၢၵ်ႇမိူဝ် ၸွမ်းၼႂ်းပၢင်ပွႆး လႄႈ ၸွမ်းႁိမ်းႁွမ်းဝၢင်း ထၢတ်ႈမူၺ်ႇတေႃႇ။
ၵူၼ်းမႃးၶဝ်ႈပွႆး မႃးလူႇမႃး တၢၼ်းလႄႈ ၸဝ်ႈတၢင်းၶၢႆ ၼႂ်းပွႆးလိူၼ်သီႇမိူင်းၵိုင် ပႅတ်ႈယုၵ်းယၵ်း မၢၵ်ႇမိူဝ် ႁိမ်းႁွမ်း ဝၢင်း ထၢတ်ႈမူၺ်ႇတေႃႇ ၵၢၼ်ပႅတ်ႈယုၵ်းယၵ်းပီၼႆႉ တေလႆႈဝႃႈ ယူပ်ႈယွမ်း လိူဝ်ၵူႈပီ ဝႃႈၼႆ။
လုင်းၸၢႆးလူင် ၽူႈတႅၼ်းသၽႃးၸႄႈမိူင်း ၶဵတ်ႇလိူၵ်ႈတင်ႈမၢႆ 2 ၸႄႈဝဵင်းမိူင်းၵိုင် လၢတ်ႈတီႈၽူႈတွႆႇႁွၵ်ႈဝႃႈ “ ပီၼႆႉ လွင်ႈ ၶဝ်ႈၽဵဝ်ႈၼႂ်းပွႆးလႄႈ လွင်ႈတမ်းၵူၺ်ယုၵ်းယၵ်းၼႆႉ ယူပ်ႈယွမ်းလိူဝ်ၵူႈပီ။ ထႅင်ႈၾၢႆႇၼိုင်ႈၵေႃႈ ဢွၼ်ၵၼ်ပႅတ်ႈ၊ ယုၵ်း ယၵ်း မၢၵ်ႇမိူဝ်ဢႃးလႃး” ဝႃႈၼႆ။
ယၢမ်းလဵဝ် ယူႇတီႈၵေႃပွင်ၵၢၼ်ပၢင်ပွႆးလိူၼ်သီႇ မိူင်းၵိုင် ၸၢင်ႈၵူၼ်းပတ်းၽဵဝ်ႈ မႃးႁဵတ်းလွင်ႈမူတ်းသႂ်ဝႆႉ၊ ၵႃႈၸၢင်ႈသဵင်ႈ ငိုၼ်း 4 သႅၼ်ပျႃးပၢႆ။
လုင်းၸၢႆးလူင် လၢတ်ႈဝႃႈ “ မိူဝ်ႈဝႃး တင်းမိူဝ်ႈၼႆႉ ၸၢင်ႈၵူၼ်းမႃးပတ်းၽဵဝ်ႈဝႆႉယူႇ။ ၵႃႈၸၢင်ႈၽဵဝ်ႈ ယုၵ်းယၵ်းၵေႃႈ ၵႃႈယႂ်ႇမႃးယူႇၵူႈပီ။ ပီၼႆႉ သဵင်ႈ 450,000 ပျႃး။ ယဝ်ႉၵေႃႈ ပီၼႆႉ ယုၵ်းယၵ်းၶႂ်ႈဝႃႈ ၼမ်လိူဝ် ၵူႈပီပူၼ်ႉမႃး ၼၼ်ႉ” ဝႃႈၼႆ။
ၵူၼ်းမိူင်းၵိုင် ဢႃယု 30 ပၢႆ ၽူႈၸၢႆးၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ “ ၵူၼ်းမိူင်းႁဝ်းၶႃႈတႄႉ လွင်ႈပႅတ်ႈယုၵ်းယၵ်း ၼႆႉ ဢမ်ႇပေႃးႁူႉၵၼ်ၶႃႈ။ ၵိၼ်တီႈလႂ်ၵေႃႈ ပႅတ်ႈတီႈၼၼ်ႈ ပေႃးမၢၵ်ႇမိူဝ်လူင်ၵႂႃႇ။ ၼႂ်းပွႆးလိူၼ်သီႇမူၼ်းႁဝ်းၶႃႈပီၼႆႉ ၵေႃႈ ၸဵမ်ၵူၼ်းၶဝ်ႈပွႆး၊ ၵူၼ်းၶၢႆ ၶူဝ်းၶႃႈယဝ်ႉ ပႅတ်ႈမၢၵ်ႇမိူဝ် လူင်ဝႆႉ” ဝႃႈၼႆ။
“မိူဝ်ႈၵူႈပီတႄႉ ၶႃႈႁဝ်းပဵၼ်ႁူဝ်ပဝ်ႈ ၸုမ်းၸွႆႈထႅမ်တူင်ႇဝူင်းၵူၼ်းၼႃႇၼေႃႈ။ ပေႃးပဵၼ်ထိုင် မွၵ်ႈ 12-13 ၶမ်ႈၼႆႉ ႁဝ်းၶႃႈ ဢဝ်ၵႃးသေ ၵႂႃႇၽဵဝ်ႈၸွမ်းၼႂ်းပွႆး ၵဵပ်းၽဵဝ်ႈ ထူင်ယုၵ်းယၵ်းၵူႈဝၼ်းၶႃႈယဝ်ႉ။ ပီၼႆႉ ၸုမ်းၸွႆႈထႅမ်တူင်ႇဝူင်းႁဝ်းၶႃႈၵေႃႈ ဢမ်ႇမႃး။ ယဝ်ႉၵေႃႈ သွင်းၵူၺ်ပႅတ်ႈယုၵ်းယၵ်းၵေႃႈ ဢမ်ႇတမ်းပၼ်မူတ်း၊ ၵိုတ်းလိူဝ်ဝႆႉ မွၵ်ႈ 30-40 ၵူၺ်ၼႆႉယူႇ ဢၼ်ပႆႇ လႆႈၸႂ်ႉမၼ်း။ ၵူႈပီတႄႉ ထူင်ပႅတ်ႈယုၵ်းယၵ်း ႁဝ်းၶႃႈ ဢဝ်ၵႂႃႇတမ်းဝႆႉ ၸွမ်းပၢင်ပွႆး ဢမ်ႇယွမ်း 80 ထူင်ၼႆႉ” လုင်းၸၢႆးလူင် ၽူႈတႅၼ်းသၽႃးလၢတ်ႈၼႄၼင်ႇၼႆ။
ပွႆးလိူၼ်သီႇ တီႈမိူင်းၵိုင် ပီၼႆႉ ၵူၼ်းမႃးၶဝ်ႈႁူမ်ႈပၢင်ပွႆး ဢေႇလိူဝ်ၵူႈပီ ၵူၺ်းၵႃႈ ယုၵ်းယၵ်း ဢၼ်ပႅတ်ႈၸွမ်းၼႂ်းပၢင်ပွႆး သမ်ႉ ၶႂ်ႈဝႃႈၼမ်လိူဝ်ၵူႈပီ ဝႃႈၼႆ။
သင်ပဵၼ်လႆႈ ၵူၼ်းမႃးၶဝ်ႈပွႆးလႄႈသင် ၵူၼ်းၶၢႆၶူဝ်းလႄႈသင် ၵိၼ်ယဝ်ႉ ၸႂ်ႉယဝ်ႉ ယုၵ်းယၵ်းၸိူဝ်းၼၼ်ႉ ႁႂ်ႈပႅတ်ႈတီႈၵူၺ် ယုၵ်းယၵ်း ပေႃးပႅတ်ႈယုၵ်းယၵ်းမၢၵ်ႇမိူဝ် ယွၼ်ႉတေၸၢင်ႈတုမ်ႉတိူဝ်ႉၾိင်ႈတိုၼ်း ပဵၼ် သၽႃႇဝလႄႈ တေယၢပ်ႇၽိုတ်ႇ ပႃး ၵူၼ်းၵဵပ်းၵူၼ်းၽဵဝ်ႈ ႁဵတ်းလွင်ႈမူတ်းသႂ် ၵူၼ်းမိူင်းၵိုင် တုၵ်းယွၼ်း လၢတ်ႈၼႄၼင်ႇၼႆ။
