ၾႆးမႆႈႁိူၼ်းၵူၼ်းဝၢၼ်ႈပဵင်းသႃႇ ဝဵင်းၼမ်ႉလၼ်ႈ ၶူဝ်းၶွင်ႁိူၼ်းယေး ဢမ်ႇတၼ်းလႆႈ လွင်ႈၵူၼ်းမၢတ်ႇၸဵပ်း လူႉတၢႆ ဢမ်ႇမီး ဝႃႈၼႆ။
ဝၼ်းတီႈ 8/3/2020 ယၢမ်းဝၢႆးဝၼ်း ၾႆးမႆႈ ႁိူၼ်းၵူၼ်းဝၢၼ်ႈပဵင်းသႃႇ 5 လင်ႁိူၼ်း ၼႂ်းဢိူင်ႇဝၢၼ်ႈမွၼ်း(ဝၢၼ်ႈၵျွင်း) ဝဵင်း ၼမ်ႉလၼ်ႈ ၸႄႈဝဵင်းသီႇပေႃႉ ၸိုင်ႈတႆးပွတ်းႁွင်ႇ။ ၵူၼ်းဝၢၼ်ႈ မွၵ်ႈ 16 ၵေႃႉ ထူပ်းတၢင်းယၢပ်ႇၽိုတ်ႇ လွင်ႈၶွင်ၵိၼ်ယႅမ်ႉ လႄႈ ၶူဝ်းၼုင်ႈတၢင်းဝႆ ဝႃႈၼႆ။
ၸဝ်ႈၶူး Dr. ၼုမ်ႇလႅင်း လၢတ်ႈတီႈၽူႈတွႆႇႁွၵ်ႈဝႃႈ “ မိူဝ်ႈဝၼ်းတီႈ 8 ၼၼ်ႉ ၾႆးလႆႈမႆႈႁိူၼ်းၵူၼ်းဝၢၼ်ႈႁဝ်းၶႃႈ တီႈဝၢၼ်ႈ ပဵင်းသႃႇ ဢၼ်ထုၵ်ႇမႆႈၵႂႃႇ တင်းမူတ်း 5 လင်လႄႈ သိုင်ႇၶွၵ်ႈမူႇ 1 လင်။ ႁိူၼ်းယေး ဢၼ်မႆႈၵႂႃႇၼၼ်ႉ ဢမ်ႇတၼ်းလႆႈ ၶူဝ်း ၶွင် သင်ပႃးၵႂႃႇၸွမ်းၾႆးမူတ်း”ဝႃႈၼႆ။
ၸဝ်ႈၶူး သိုပ်ႇလၢတ်ႈဝႃႈ “လွင်းတၢင်းၾႆးမႆႈၼၼ်ႉတႄႉ ၽွင်းၸဝ်ႈႁိူၼ်းၵႂႃႇႁဵတ်းၵၢၼ်သူၼ်ၼၼ်ႉ ၾႆးမႆႈပႃႇသေ လၢမ်းမႆႈ ပႃးႁိူၼ်းၵူၼ်းဝၢၼ်ႈဝႃႈၼႆ။ ဢိင်ၼိူဝ်လွင်ႈၼႆႉ ႁဝ်းၸဝ်ႈၶဝ် လႆႈ ငိၼ်း ၶၢဝ်ႇၾႆးမႆႈၼႆသေ မိူဝ်ႈဝႃး ဝၼ်းတီႈ 9 ၸွမ်းၼင်ႇ ပွင်ပဵၼ်လႆႈ ႁဝ်းၸဝ်ႈၶဝ်ဢဝ်ၽႃႈႁူမ်ႇၶူဝ်းၼွၼ်း ၶဝ်ႈၼမ်ႉတၢင်းၵိၼ် လႆႈၵႂႃႇၵမ်ႉထႅမ်ၸွႆႈ တႃႇႁူဝ်ၵူၼ်း 16 ၵေႃႉ”ဝႃႈၼႆ။
ဝၢၼ်ႈပဵင်းသႃႇၼႆႉ တင်းမူတ်း လင်ႁိူၼ်းတေမီး မွၵ်ႈ 25 လင် မီးၾၢႆႇၸဵင်ႇႁွင်ႇဝၼ်းတူၵ်း ၼမ်ႉလၼ်ႈ။
လုင်းၸၢႆးၶမ်းဢွင်ႇ ၽူႈတႅၼ်းသၽႃးၸႄႈမိူင်းၶဵတ်ႇလိူၵ်ႈတင်ႈ မၢႆ 2 ၸႄႈဝဵင်းသီႇပေႃႉ လၢတ်ႈတီႈၽူႈတွႆႇႁွၵ်ႈဝႃႈ “ ၸႂ်ႈၶႃႈ ဢေႃႈ ၾႆးမႆႈ လင်ႁိူၼ်းၵူၼ်းဝၢၼ်ႈ ယွၼ်ႉၾႆးမႆႈပႃႇသေ လၢမ်းမႆႈ။ လွင်းၵူၼ်းမၢတ်ႇၸဵပ်းလူႉတၢႆတႄႉ ဢမ်ႇမီး။ ၵူၺ်းၵႃႈ ၶူဝ်းၶွင် ၼႂ်းႁိူၼ်းယေးၵူၼ်းဝၢၼ်ႈႁဝ်းတႄႉ ဢမ်ႇတၼ်းလႆႈသင်သေဢိတ်း”ဝႃႈၼႆ။
တေႃႈလဵဝ်ၼႆႉ ၵူၼ်းဝၢၼ်ႈပဵင်းသႃႇ လင်ႁိူၼ်းဢၼ်ၺႃးၾႆးမႆႈၼၼ်ႉ လူဝ်ႇတၢင်းၸွႆႈထႅမ် လွင်ႈၵိၼ်ယမ်ႉ၊ ၶူဝ်းၼုင်ႈတၢင်း ဝႆ ၸဵမ်ၸိူဝ်းၼႆႉ ဝႃႈၼႆ။
ၸဝ်ႈၶူး Dr. ၼုမ်ႇလႅင်း လၢတ်ႈထႅင်ႈဝႃႈ “ တေႃႈလဵဝ်ၼႆႉ လူဝ်ႇၵူႈၸိူဝ်ႉၵူႈလွင်ႈၶႃႈယဝ်ႉ ၸဵမ်လွင်ႈယူႇ လွင်ႈၵိၼ် လွင်ႈ ၼုင်ႈဝႆ ၸိူဝ်း ၼႆႉ လူဝ်ႇၼႃႇၶႃႈ။ ဝၢၼ်ႈပဵင်းသႃႇႁဝ်းၶႃႈၼႆႉ သမ်ႉယၢၼ်ဝၢၼ်ႈၵူၼ်းဝႆႉၽွင်ႈ ႁိမ်းဝၢၼ်ႈပဵင်းသႃႇၼၼ်ႉသမ်ႉ မီးဝႆႉဝၢၼ်ႈ ၼႃးၸေႃးလွမ်းၵူၺ်းၶႃႈ ဢၼ်ယူႇႁိမ်းၸမ်ၵၼ်။ သင်ပဵၼ်လႆႈ ၼင်ႇပွင်ပဵၼ်လႆႈတႄႉ ဢမ်ႇဝႃႈတီႈၸမ်ၵႆ ဢွၼ်ၵၼ် မိူဝ်းၵမ်ႉၸွႆႈထႅမ်ပၼ်ၵၼ် ယဝ်ႉၵေႃႈ ၵႂႃႇပၼ်ႁႅင်းၸႂ် ၵူၼ်းဝၢၼ်ႈႁဝ်း ဢၼ်ထူပ်းၽေးဝႆႉၸိူဝ်းၼၼ်ႉဢေႃႈ” ဝႃႈၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ