Friday, March 29, 2024

RCSS ပိုတ်ႇႁူင်းတိုတ်းယႃႈ ပဵၼ်တၢင်းၵၢၼ်

Must read

RCSS ပိုတ်ႇႁူင်းတိုတ်းယႃႈမဝ်းၵမ် ပၼ်ၵူၼ်းမိူင်း တီႈငဝ်ႈၸိုင်ႈလွႆတႆးလႅင်း ဝႃႈၼႆ။

Photo by – Tai Freedom/ ပၢင်ပိုတ်ႇႁူင်းတိုတ်းယႃႈမဝ်းၵမ် တီႈလွႆတႆးလႅင်း

ဝၼ်းတီႈ 9/3/2020 ယၢမ်းၵၢင်ၼႂ် 8 မူင်းပၢႆ ယူႇတီႈၶွင်ႇသီႇဢဝ်ၶိုၼ်းၸိုင်ႈတႆး/ တပ်ႉသိုၵ်းၸိုင်ႈတႆး RCSS/SSA ပိုတ်ႇႁူင်း တိုတ်းယႃႈမဝ်းၵမ်ပၼ်ၵူၼ်းမိူင်း တီႈငဝ်ႈၸိုင်ႈလွႆတႆးလႅင်း မီးသင်ၶၸဝ်ႈ၊ ၽူႈယႂ်ႇၵူၼ်းလူင် ၵူႈႁွင်ႈၵၢၼ်လႄႈ ၵူၼ်းမိူင်း ၶဝ်ႈႁူမ်ႈ တင်းၼမ်လၢႆ။

- Subscription -

ၸဝ်ႈႁၢၼ် ၶမ်းၸၢမ်ႇ ၽူႈၶၢၼ်ပၢၵ်ႇ RCSS လၢတ်ႈတီႈၽူႈတွႆႇႁွၵ်ႈဝႃႈ “ ႁူင်းတိုတ်းယႃႈမဝ်းၵမ် တီႈငဝ်ႈၸိုင်ႈႁဝ်းၶႃႈတႄႉ ပိုတ်ႇမႃးႁိုင်ယဝ်ႉ၊ ၵူၺ်းၵႃႈ ပႆႇလႆႈႁဵတ်းဢွင်ႈတီႈတႃႇတိုတ်းယႃႈမူၼ်ႉမႄးတူဝ်ၸႂ်ပၼ်ၵူၼ်းမိူင်းႁဝ်းၶႃႈ ၶေႃၶေႃၸိူင်ႉၼႆ လႄႈ ႁဝ်းၶႃႈ ၸင်ႇႁႃဢွင်ႈတီႈမၼ်းသေ ႁဵတ်းသၢင်ႈမႃးႁူင်းတိုတ်းယႃႇမဝ်းၵမ်ၼႆႉ။ ဢမ်ႇၸႂ်ႈၶွၵ်ႈၶင်ၵူၼ်းတိုတ်း ယႃႈ ပဵၼ်ႁူင်းတိုတ်းယႃႈ မူၼ်ႉမႄးပၼ်ၵူၼ်းမိူင်းၵမ်းလဵဝ်” ဝႃႈၼႆ။

ၵူၼ်းမိူင်းဢၼ်မႃးတိုတ်းယႃႈမဝ်းၵမ် တီႈငဝ်ႈၸိုင်ႈလွႆတႆးလႅင်း ပွၵ်ႈၼႆႉ တင်းမူတ်းတေမီးယူႇႁူဝ်ၵူၼ်း 223 ၵေႃႉ ဝႃႈၼႆ။

Photo by – Zaione Tai/ ႁူင်းတိုတ်းယႃႈမဝ်းၵမ် တီႈလွႆတႆးလႅင်း

ၸဝ်ႈႁၢၼ် ၶမ်းၸၢမ်ႇ လၢတ်ႈဝႃႈ “ ၵူၼ်းတီႈမႃးတိုတ်းယႃႈမဝ်းၵမ်လႄႈ ၶဝ်ႈမူၼ်ႉမႄးတူဝ်ၸႂ်ၼႆႉ ပွၵ်ႈၵမ်းၼႆႉ တေမီး 223 ၵေႃႉ။ ၼိုင်ႈပွၵ်ႈလႂ် ႁဝ်းၶႃႈ တေဝႆႉၶၢဝ်းယၢဝ်းၵႃႈႁိုဝ်၊ ၶၢဝ်းပွတ်းၵႃႈႁိုဝ် ဢၼ်ဝႃႈၼၼ်ႉ ဢိင်ၼိူဝ်ၵူၼ်းတိတ်းယိၼ်ႉယႃႈ ၶႃႈဢေႃႈ။ မၢင် ၵေႃႉသမ်ႉ ပၢႆးတူဝ်ၶဝ်တိုတ်းယႃႈလႆႈ ၵူၺ်းၵႃႈပၢႆးၸႂ်ၶဝ်သမ်ႉ ဢမ်ႇတိုတ်းယႃႈလႆႈ ၸဵမ်ၸိူဝ်းၼႆႉၵေႃႈမီး” ဝႃႈၼႆ။

လိူဝ်ၼၼ်ႉ ၸွမ်းၼင်ႇ ၼႃႈတီႈၶွင် RCSS/SSA ၵုမ်းၵမ်ဝႆႉၼၼ်ႉ ၵူၼ်းမိူင်းၸိူဝ်းၸပ်းယႃႈ ဢမ်ႇဝႃႈ ပွတ်းၸၢၼ်း၊ ပွတ်း ႁွင်ႇလႄႈ ပွတ်းဢွၵ်ႇၶူင်း ႁပ်ႉဢဝ်မႃးမူၼ်ႉမႄးတူဝ်ၸႂ်ပၼ်ၵႂႃႇ ၸွမ်းၼင်ႇ ၼႂ်းပိုၼ်ႉတီႈၵုမ်းၵမ်ဝႆႉၼၼ်ႉ ဝႃႈၼႆ။

Photo by – Zaione Tai/ ႁူင်းတိုတ်းယႃႈမဝ်းၵမ် တီႈလွႆတႆးလႅင်း

ၼွၵ်ႈလိူဝ်ၼၼ်ႉ တီႈလွႆၵေႃႇဝၼ်းၵေႃႈ ႁပ်ႉတိုတ်းယႃႈမဝ်းၵမ် မူၼ်ႉမႄးတူဝ်ၸႂ်ပၼ်မႃး ပေႃးထိုင်မႃးဝၼ်းၸိူဝ်ႉၸၢတ်ႈ ၸိုင်ႈတႆး ၵူႈပီၼႆ ပၼ်ၶႂၢင်ႉ ၵူၼ်းမိူင်းမႃးတိုတ်းယႃႈလႄႈ ၵူၼ်းႁိူၼ်းၸိူဝ်းၶဝ်မႃး ႁူပ်ႉထူပ်းၵၼ် ၼိုင်ႈပီလႂ် ၼိုင်ႈပွၵ်ႈ ဝႃႈ ၼႆ။

ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ

- Subscription -
- SHAN's Apps -spot_img

ၶၢဝ်ႇလိုၼ်းသုတ်း