မီးၵူၼ်းပိုၼ်လိၵ်ႈ သၢၼ်ၶတ်း တေႃႇဢွင်ႇသၢၼ်းသူႉၵျီႇ ၽွင်းႁွတ်ႈထိုင်လႃႈသဵဝ်ႈ တႃႇႁူပ်ႉထူပ်းၵူၼ်းမိူင်း။
မိူဝ်ႈၼႆႉ ဝၼ်းတီႈ 10/3/2020 ယၢမ်းၵၢင်ၼႂ် တေႃႇဢွင်ႇသၢၼ်းသူႉၵျီႇ တီႈၵိူဝ်းၵုမ်ၸိုင်ႈမိူင်းႁွတ်ႈဝဵင်းလႃႈသဵဝ်ႈ ႁူပ်ႉ ထူပ်းၵူၼ်းမိူင်း တီႈႁူင်းႁေႃ ၵၢင်ဝဵင်း။ ၽွင်းၼၼ်ႉ ၼႂ်းဝဵင်းလႃႈသဵဝ်ႈၵေႃႈ မီးၽိုၼ်လိၵ်ႈသၢၼ်ၶတ်း ပိဝ်မၢၵ်ႇမိူဝ် ဢမ်ႇ ႁူႉပဵၼ်ၽႂ်ႁဵတ်း။
ၽိုၼ်လိၵ်ႈဢၼ်ပိုၼ်ၽႄႈသၢၼ်ၶတ်းတေႃႇဢွင်ႇသၢၼ်းသူႉၵျီႇၼၼ်ႉ ပိဝ်မၢၵ်ႇမိူဝ် ၸွမ်းတီႈၵူၼ်းၵႂႃႇမႃးၼမ်၊ ၸွမ်း ၵၢင်ဝဵင်းလႃႈသဵဝ်ႈ၊ တၢင်းၼႃႈလုမ်းပႃႇတီႇၼူၵ်ႉယုင်း၊ တီႈၵႃးၵဵတ်ႉၼႃးမၢၵ်ႇၶေႃ လႄႈ တိတ်းၸွမ်းလၵ်း သဝ်ၾႆးၾႃႉ ၸဵမ်ၸိူဝ်းၼႆႉ။
ၽိုၼ်လိၵ်ႈသၢၼ်ၶတ်းၼၼ်ႉ တႅမ်ႈဝႆႉၾၢႆႇလိၵ်ႈဢင်းၵိတ်းဝႃႈ “ WE NEVER BELIEVE NEO-NAZI MA MA” ၼႆသေ ပႃးဝႆႉဝႃႈ လုၵ်ႈယိင်းဢွင်ႇသၢၼ်း ဢမ်ႇႁဵတ်းၸွမ်းၵႂၢမ်းမၼ်ႈဢွင်ႇသၢၼ်း။ ၶႅၵ်ႇယူႇသဝ်းတဵမ် 90 ဝၼ်းၵေႃႈ ပၼ်သုၼ်ႇ တွတ်ႈၶႅပ်းမႄးႁႃႉ? ယႃႇၸၼ်မိူင်းတႆးၶဝ်ႈယူႇတႂ်ႈပိူင်သိုၵ်းၼႃႇၸီႇပၢၼ်မႂ်ႇၶွင်မၢၼ်ႈ ၸဵမ်ၸိူဝ်းၼႆႉ။
ၸဝ်ႈၵႃး လႃႈသဵဝ်ႈ ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ “ ၽိုၼ်လိၵ်ႈသၢၼ်ၶတ်းၼၼ်ႉ ႁဝ်းၶႃႈ လႆႈႁၼ် တိတ်းၸွမ်း လၵ်းသဝ်ၾႆးၾႃႉ ၸွမ်းၶၢင်ႈတၢင်း။ ယဝ်ႉၵေႃႈ တီႈၵႃးၵဵတ်ႉ ၼႃးမၢၵ်ႇၶေႃ။ ၽိုၼ်လိၵ်ႈၼႆႉ ပဵၼ်ၽႂ်မႃးပိုၼ်ၽႄႈတႄႉ ၵေႃႈဢမ်ႇႁူႉ။ ႁဝ်းၶႃႈလႆႈႁၼ်မိူဝ်ႈၼႆႉ ၵၢင်ၼႂ် 9 မူင်း” ဝႃႈၼႆ။
လိူဝ်ၼၼ်ႉ မၢင်တီႈၵေႃႈမီးပႃးလိၵ်ႈဢၼ်တႅမ်ႈဝႆႉဝႃႈ ယႃႇႁဵတ်းႁႂ်ႈမိူင်းတႆးယူႇတႂ်ႈၼမ်ႉပၢင်ႇလၢႆႇ(ယႃႇသၢင်ႈၾၢႆတိၵ်း တိၵ်း) ဝႃႈၼႆ။
တေႃႇဢွင်ႇသၢၼ်းသူႉၵျီႇ ႁူပ်ႉထူပ်းၵူၼ်းမိူင်းတီႈလႃႈသဵဝ်ႈၼၼ်ႉ မၼ်းၼၢင်းလၢတ်ႈလွင်ႈတၢင်းပဵၼ် ၶူဝ်ႊရူဝ်ႊၼႃႊ လိူဝ်ၼၼ်ႉ မၼ်းၼၢင်းတွပ်ႇပၼ်ဢၼ်ၽူႈၶိုၼ်ႈႁွတ်ႈတွင်ႈထၢမ်ၸိူဝ်းၼၼ်ႉ။
ၽူႈၶိုၼ်ႈႁွတ်ႈပၢင်ႁူပ်ႉထူပ်းၵေႃႉၼိုင်ႈလၢတ်ႈဝႃႈ ၸမ်ပၢင်လိူၵ်ႈတင်ႈၵေႃႈပိူင်ၼိုင်ႈႁင်းမၼ်း။ မိူၼ်လူင်းသူၼ်းတုမ် ႁႃသဵင်တႃႇပၢင်လိူၵ်ႈတင်ႈ။ လွင်ႈႁူပ်ႉထူပ်းၵူၼ်းမိူင်းၼႆႉ ဢမ်ႇမီးလွင်ႈသင်တႄႉတႄႉ ဝႃႈၼႆ။
ၸၢႆးဢွင်ႇ ၵူၼ်းလႃႈသဵဝ်ႈလၢတ်ႈတီႈၽူႈတွႆႇႁွၵ်ႈဝႃႈ “ ၸဵမ်မိူဝ်ႈတႄႇတႄႇ ၶဝ်ၵေႃႈဢမ်ႇလၢတ်ႈဝႃႈ ပၢင်ႁူပ်ႉထူပ်းဢုပ်ႇ ၵုမ်။ ၵွပ်ႈၼႆလႄႈ လီဝူၼ်ႉဝႃႈပၢင်လိူၵ်ႈတင်ႈၸမ်ယဝ်ႉလႄႈ မႃးႁႃသဵင်ႁႃႉ ၼႆၼၼ်ႉၼႃႇ” ဝႃႈၼႆ။
တေႃႈလဵဝ်ၼႆႉ တၢင်းလုမ်းၾႃႉၵေႃႈ ဢွၼ်ၵၼ်ၵူဝ်ႁႄတိုၼ်ႇသၢၼ်ႈ ယွၼ်ႉတၢင်းပဵၼ်ၶူဝ်ႊရူဝ်ႊၼႃႊ ဢၼ်ၽႄႈလၢမ်း ဝႆႉ ယူႇတီႈႁွင်ႈၵၢၼ်ပၢႆးယူႇလီလႄႈ ၾၢႆႇလဵၼ်ႈႁႅင်းၵေႃႈ ပိုၼ်ၽၢဝ်ႇဢွၵ်ႇဝႆႉဝႃႈ ႁၢမ်ႈၸတ်းႁဵတ်းပွႆးလၢမ်း၊ ႁၢမ်ႈၸူႉတုမ် ၵၼ် ၵိုၼ်းၶွၼ်ႈၼႆဝႆႉ။ ၵူၺ်းၵႃႈ ယၢမ်းလဵဝ်တူဝ်တေႃႇဢွင်ႇသၢၼ်းသူႉၵျီႇသမ်ႉ ႁူပ်ႉထူပ်းၵူၼ်းမိူင်းၼႆႉ မၼ်းပွင်ႇဝႃႈ သင် ၼၢင်းၶမ်း ၵူၼ်းလႃႈသဵဝ်ႈလၢတ်ႈ။
ၼၢင်းၶမ်း သိုပ်ႇလၢတ်ႈတီႈၽူႈတွႆႇႁွၵ်ႈဝႃႈ “ ဝဵင်းလႃႈသဵဝ်ႈၼႆႉ ၸမ်လႅၼ်လိၼ်ယဝ်ႉလူး။ ယိင်ႈၶႅၼ်းလီမႆႈၸႂ်ၵႂႃႈ” ဝႃႈၼႆ။
