သိုၵ်းလူင်ပွင်ၸိုင်ႈ ဢဝ်ထူဝ်ႈၵူၼ်းဝၢၼ်ႈ ၵႂႃႇတူၵ်းႁူၺ်ႈ

သိုၵ်းလူင်ပွင်ၸိုင်ႈမၢၼ်ႈ ဢဝ်ထူဝ်ႈၵူၼ်းဝၢၼ်ႈ ၵႂႃႇတၢင်ႇၶဝ်ႈၼမ်ႉတၢင်းၵိၼ် သမ်ႉႁေႃႈတူၵ်းႁူၺ်ႈ မီးလွင်ႈမၢတ်ႇၸဵပ်း ၸွမ်း။

ဝၼ်းတီႈ 6/3/2020 ယၢမ်းႁူဝ်ၶမ်ႈ တပ်ႉသိုၵ်းမၢၼ်ႈ ၵႂႃႇၶၢၼ်းထူဝ်ႈၵူၼ်းဝၢၼ်ႈ ၼႂ်းဢိူင်ႇမိူင်းတုင် ၸႄႈဝဵင်းသီႇပေႃႉ ၸိုင်ႈတႆးပွတ်းႁွင်ႇ 4 လမ်း တႃႇတၢင်ႇၶဝ်ႈၼမ်ႉတၢင်းၵိၼ် ၵႂႃႇသူင်ႇတီႈတပ်ႉပၢင်သဝ်းၶဝ်။ သိုၵ်းမၢၼ်ႈႁေႃႈၵႂႃႇ ပိၼ်ႈတူၵ်း ႁူၺ်ႈ လမ်း 1 ၼႂ်းၵႄႈဢိူင်ႇသူပ်းတုင် လႄႈ ဢိူင်ႇမိူင်းတုင် ၸႄႈဝဵင်းသီႇပေႃႉ ၸိုင်ႈတႆးပွတ်းႁွင်ႇ ဝႃႈၼႆ။

ၸၢႆးၸၢမ်ႇမိူင်း ၽူႈတႅၼ်းသၽႃးၸႄႈမိူင်း ၶဵတ်ႇလိူၵ်ႈတင်ႈမၢႆ 1 ၸႄႈဝဵင်းၵေးသီး လၢတ်ႈတီႈၽူႈတွႆႇႁွၵ်ႈဝႃႈ “ ၵူၼ်းဝၢၼ်ႈ ႁဝ်းသမ်ႉ ဝႆႉမဝ်မၢင်ဢိတ်းၼိုင်ႈၶႃႈဢေႃႈ။ သိုၵ်းမၢၼ်ႈထၢမ်ပၼ်ၵႃႈၼမ်ႉမၼ်းယူႇ ၵူၺ်းၵႃႈ ၵူၼ်းဝၢၼ်ႈႁဝ်းၶႃႈသမ်ႉ ၶၢၼ်ႉသုၵ်ႉသၵ်ႉသေ ဝႃႈႁေႃႈမိူဝ်းႁင်းၵူၺ်းလႃႈၼႆၼၼ်ႉၶႃႈၼႃႇ၊ ၼႂ်းထူဝ်ႈၼၼ်ႉတႄႉ ဢမ်ႇပႃးၵူၼ်းဝၢၼ်ႈၵႂႃႇၸွမ်းသေ ၵေႃႉ။ ၶဝ်ႁေႃႈၵႂႃႇသေ ဢဝ်ၵႂႃႇပိၼ်ႈႁင်းၵူၺ်းၶႃႈဢေႃႈ” ဝႃႈၼႆ။

သိုၵ်းမၢၼ်ႈ ဢၼ်ၶီႇၸွမ်းၵၼ်ၼႂ်းထူဝ်ႈၼၼ်ႉ လွင်ႈလူႉတၢႆတႄႉ ဢမ်ႇမီး၊ လွင်ႈ မၢတ်ႇၸဵပ်းတႄႉ မီးၽွင်ႈ ဝႃႈၼႆ။

ၸၢႆးၸၢမ်ႇမိူင်း လၢတ်ႈဝႃႈ “လႆႈငိၼ်းဝႃႈတႄႉ လွင်ႈလူႉတၢႆတႄႉ ဢမ်ႇမီး၊ မီးလွင်ႈမၢတ်ႇၸဵပ်း မိူၼ်ၼင်ႇ ဢႅဝ်ႁၵ်း၊ ၶႃႁၵ်း ၸိူဝ်းၼႆႉတႄႉ မီးယူႇ။ လွင်ႈသၢႆႈတႅၼ်းထူဝ်ႈၵူၼ်းမိူင်းၼၼ်ႉတႄႉ ယင်းပႆႇလႆႈႁူႉ လႆႈငိၼ်းၸွမ်းၶႃႈ”ဝႃႈၼႆ။

ထူဝ်ႈၵူၼ်းဝၢၼ်ႈ ဢၼ်သိုၵ်းမၢၼ်ႈ ႁေႃႈၵႂႃႇပိၼ်ႈတူၵ်းႁူၺ်ႈၼၼ်ႉ ပဵၼ်ထူဝ်ႈၶွင်လုင်းသၢင်ႇလူႇ ဝၢၼ်ႈႁူဝ်ၾၢႆ ၸႄႈဝဵင်း ၵေးသီး ဝႃႈၼႆ။

သိုၵ်းမၢၼ်ႈ ဢၼ်ၵႂႃႇၶၢၼ်းႁွင်ႉဢဝ်ထူဝ်ႈၵူၼ်းဝၢၼ်ႈၼၼ်ႉ ပဵၼ်သိုၵ်းမၢၼ်ႈ ဢၼ်ပၵ်းတပ်ႉဝႆႉတီႈ ဝၢၼ်ႈၽႅတ်ႈသေ ဢွၵ်ႇၵႂႃႇတူင်ႉၼိုင် တၢင်းပွတ်းဢိူင်ႇမိူင်းတုင် ၸႄႈဝဵင်းသီႇပေႃႉ ဝႃႈၼႆ။

ၿတ်ႉၵျႅတ်ႉငိုၼ်းတွင်းတႃႇၸႂ်ႉၸၢႆႇ ႁွင်ႈၵၢၼ်ၾၢႆႇၵႅတ်ႇၶႄၸိုင်ႈမိူင်းႁူမ်ႈတုမ်တႃႇပီ 2019-2020 ၼႆႉ ၾၢႆႇတပ်ႉသိုၵ်းလႆႈ ယွၼ်းဝႆႉၼႂ်းသၽႃး 3,000 လၢၼ်ႉပျႃး။ ပၢႆယွၼ်းၼမ်လိူဝ်ပီပူၼ်ႉမႃး 100 လၢၼ်ႉပျႃးလူးၵွၼ်ႇ ၵႅမ်ၽွင်းလူင်ၾၢႆႇၵႅတ်ႇၶႄ ၸွမ်သိုၵ်းမျိၼ်ႉၼွႆႇ ယၢမ်ႈပိုၼ်ၽၢဝ်ႇလၢတ်ႈ။