သိုၵ်းလူင်ပွင်ၸိုင်ႈမၢၼ်ႈ ၶဝ်ႈသွၵ်ႈတဝ်ယႃႉၶူဝ်းၶွင်ႁိူၼ်းယေး ၵူၼ်းဝၢၼ်ႈၵုင်းၺွင်ႇၽႃသႃး သွၵ်ႈတဝ်ယႃႉၶူဝ်းၶွင်လူႉ သုမ်း တင်းၼမ်လၢႆ။

တႄႇဢဝ် ဝၼ်းတီႈ 26/2/2020 ထိုင် ဝၼ်းတီႈ 6/3/2020 မႃးၼႆႉ ၵူၼ်းဝၢၼ်ႈၵုင်းၺွင်ႇၽႃသႃး လႆႈဢွၼ်ၵၼ်ပၢႆႈၽေး သိုၵ်း မႃးသွၼ်ႈယူႇတီႈ ဝတ်ႉလွႆၸၢၵ်ႈ တင်း ဝတ်ႉၵုင်းၸူင် ဢိူင်ႇႁၢမ်းငၢႆး ၸႄႈဝဵင်းမိူင်းၵိုင် ၶၢဝ်းတၢင်းႁိုင် မွၵ်ႈ 10 ဝၼ်း ၼႆႉ တပ်ႉသိုၵ်းမၢၼ်ႈ သွၵ်ႈတဝ်ယႃႉၶူဝ်းၶွင်ႁိူၼ်းယေးၵူၼ်းဝၢၼ်ႈ လႆႈလူႉသုမ်းၸွမ်းတင်းၼမ်လၢႆ။

ၸၢႆးပၢင်ႇ ၽူႈတႅၼ်းသၽႃးၸႄႈမိူင်း ၶဵတ်ႇလိူၵ်ႈတင်ႈမၢႆ 1 ၸႄႈဝဵင်းမိူင်းၵိုင် လၢတ်ႈတီႈၽူႈတွႆႇႁွၵ်ႈဝႃႈ “ ၶူဝ်းၶွင်ၵူၼ်း ဝၢၼ်ႈၵုင်းၺွင်ႇၽႃသႃးႁဝ်းၶႃႈတႄႉ ၺႃးသွၵ်ႈတဝ်လူႉသုမ်းၼမ်လၢႆၶႃႈဢေႃႈ။ ၶႂ်ႈဝႃႈ သိုၵ်းမၢၼ်ႈၶဝ် သွၵ်ႈတဝ်ယႃႉၵူႈ ႁိူၼ်းၶႃႈယဝ်ႉ။ ႁိူၼ်းဢၼ်ဢမ်ႇၺႃးတႄႉ ဢမ်ႇၶႂ်ႈမီးၶႃႈယဝ်ႉ” ဝႃႈၼႆ။

သိုပ်ႇလၢတ်ႈဝႃႈ “ၶွင်ၵိၼ်ၶွင်ယမ်ႉတႄႉ ဢမ်ႇလူဝ်ႇလၢတ်ႈယဝ်ႉ။ ၸဵမ်ၶူဝ်းၼုင်ႈတၢင်းဝႆ ဢၼ်လီမၼ်းၸိူဝ်းၼႆႉ ဢဝ်ၵႂႃႇ။ ၼွၵ်ႈလိူဝ်ၼၼ်ႉ ၸဵမ်ၶူဝ်းႁိူၼ်းယေး ၸိူဝ်းၼႆႉၵေႃႈဢဝ် တေႃႈလဵဝ် တိုၵ်ႉၵဵပ်းသဵၼ်ႈမၢႆမၼ်းဝႆႉယူႇ။ တင်းမူတ်း လူႉသုမ်း ၵႂႃႇၵႃႈႁိုဝ် ဢၼ်ဝႃႈၼၼ်ႉတႄႉ ပႆႇလႆႈၶေႃႈမုလ်းတႅပ်ႈတေႃး” ဝႃႈၼႆ။

ဝၢၼ်ႈၵုင်းၺွင်ႇၽႃသႃးၼႆႉ တင်းမူတ်းမီးလင်ႁိူၼ်းယူႇ 40 ပၢႆ။ တႄႇဢဝ် မိူဝ်ႈႁၢင်လိူၼ်ၾႅပ်ႊၿိဝ်ႊရီႊၼၼ်ႉမႃးသေ ယွၼ်ႉသိုၵ်းမၢၼ်ႈ ႁႅၼ်းသိုၵ်းလေႃႇယိုဝ်း RCSS တီႈလွႆတွၼ်းႁၢဝ်ႈႁႅင်း ၵူၼ်းဝၢၼ်ႈဢွၼ်ၵၼ်ၵူဝ် ငိူင်ႉ ပၢႆႈၽေးဢွၵ်ႇ မႃးၵၼ် ဝႃႈၼႆ။

ထိုင်မႃးမိူဝ်ႈဝၼ်းတီႈ 1/3/2020 ၼႆႉ သိုၵ်းမၢၼ်ႈ တင်း RCSS ဢုပ်ႇဢူဝ်ငူပ်ႉငီႉၵၼ်လႆႈသေ သိုၵ်းမၢၼ်ႈ ထွၼ်သိုၵ်းဢွၵ်ႇ မႃးတူင်ႉၼိုင် ယူႇသဝ်းၸွမ်းၼႂ်းမူႇဝၢၼ်ႈ ၸိူဝ်းယူႇႁိမ်းတိၼ်လွႆတွၼ်းၸိူဝ်းၼၼ်ႉ ဝႃႈၼႆ။

ၸၢႆးပၢင်ႇ ၽူႈတႅၼ်းသၽႃး ၸႄႈမိူင်း သိုပ်ႇလၢတ်ႈဝႃႈ “ ဝၢၼ်ႈၵူၼ်းဢၼ်ထုၵ်ႇၺႃးသိုၵ်းမၢၼ်ႈ သွၵ်ႈတဝ်ယႃႉၼႆႉ ဝၢၼ်ႈ ၵုင်းၺွင်ႇၽႃသႃး ၺႃးၼမ်ၶႃႈယဝ်ႉ ၵႆႇၵေႃႈ တၢႆၼမ်ၶႃႈယဝ်ႉ။ လိူဝ်ၼၼ်ႉ တီႈဝၢၼ်ႈႁူဝ်ၼွင်ၵေႃႈ ႁိူၼ်းၵူၼ်းဝၢၼ်ႈ 4 လင် ၺႃးသိုၵ်းမၢၼ်ႈ ဢဝ်ၵွင်ႈယိုဝ်းသႂ်ႇ” ဝႃႈၼႆ။

ၵဵဝ်ႇၵပ်းလွင်ႈၼႆႉ ႁႂ်ႈၵူၼ်းဝၢၼ်ႈဢွၼ်ၵၼ်ၵဵပ်းသဵၼ်ႈမၢႆ ၶေႃႈမုလ်းတႅတ်ႈတေႃးလီသေ ႁႂ်ႈတၢင်ႇထိုင် တီႈလူင်ပွင်ၸိုင်ႈ မိူင်းတႆး ဝႃႈမီးလွင်ႈလူႉသုမ်းၸိူင်ႉႁိုဝ်လႄႈ ၵႃႈၶၼ်ၵႃႈႁိုဝ် ၸဵမ်ၸိူဝ်းၼႆႉ။

“တေႃႈလဵဝ် ႁဝ်းၶႃႈၵေႃႈ တိုၵ်ႉၵဵပ်းသဵၼ်ႈမၢႆၶေႃႈမုလ်းမၼ်းယူႇ ပေႃးလႆႈၶေႃႈမုလ်းယဝ်ႉ ႁဝ်းၶႃႈတေဢဝ်ၵႂႃႇ တၢင်ႇတီႈ လူင်ပွင်ၸိုင်ႈမိူင်းတႆး၊ ၾၢႆႇၸွႆႈထႅမ်တူင်ႇဝူင်းၵူၼ်း ၸိူဝ်းၼႆႉသေ ယွၼ်းတၢင်းၸွႆႈထႅမ်။ လွင်ႈငိုၼ်းသၢႆႈတႅၼ်း တေဝႃႈ ၸိူင်ႉႁိုဝ်ဢၼ်ဝႃႈၼၼ်ႉ တိုၵ်ႉပႂ်ႉထွမ်ႇ တီႈလူင်ပွင်ၸိုင်ႈၶဝ်ယူႇ” ၸၢႆးပၢင်ႇလၢတ်ႈၼႄ ၼင်ႇၼႆ။

တေႃႈလဵဝ်ၼႆႉ သိုၵ်းမၢၼ်ႈ တိုၵ်ႉတူင်ႉၼိုင်ယူႇဝႆႉၸွမ်းၼႂ်းဝၢၼ်ႈ ၵူၼ်းမိူင်း ဢၼ်ယူႇၸွမ်းတိၼ်လွႆတွၼ်း ၸိူဝ်းၼၼ်ႉယူႇ ၵူၼ်းဝၢၼ်ႈၵုင်းၺွင်ႇၽႃသႃး လၢတ်ႈၼႄၼင်ႇၼႆ။